1 Yɛ ɛ́ mam Pɔl, mot-mɛsa ɛ Zɛɛb, mot-lwoma ɛ Yezu Klisto. Zɛɛb nalwom mɛ ɛ́, étɛp mɛ neesa náá, bot ɛ nyɛ nasɛ́ɛ ɔ dum koŋ nɛ nɛ, nɛ ɛbaasa náá, bɛ gu etsɛɛtsɛ étɛp bɛ neewa zii ɛdu ɛ etɛp e Zɛɛb. 2 Étɛp bɛ needi nɛ ɛbwaalel ɛ tsik na kɔm-kɔm. Zɛɛb mot di ààkɔɔ bot ɔ, nabɛ ɛ́ nyɛ naaloozekɛk mena tsik tak, ɛsok nɛ bɔs nɛ kusel. 3 É ghɛŋ ɛwala ɛ Zɛɛb Mɛtsik-bot menaka nalɛɛ ɛ nadjala ɛ, wɔ gwaa, nyɛ zɛtel mɛkpa mɛ. Nyɛ naadjɛ mɛ mɛkpa menek, nɛ ɛlwom ɛ mɛ náá, mɛ goola yɛ nɛ bot. 4 Tit, tɛtɛ mɔn'am tɔ ɛdum ɛ koŋ nɛ Zɛɛb mena di nɛ yɛ sama ɛ, mɛ kwyal ɛ́ wɔy mɛkana mak: Beta náá enɛm nɛ embɛɛ, nɛ egwyem e Zɛɛb Sɛɛg, nɛ yii Yezu Klisto Mɛtsik-bot menaka di nɛ nɔ.

5 Tin, yɛ bɛ náá mɛ naalik wɔ kɔ ghaada Kelɛt ɔɔ, ye nabɛ ɛ́ etɛɛ náá, wɔ neesilal ɛsa esa djas nalik ààsael ɛ. Da wɔ ɛ́ sɛ́ɛ bɛpaa, wɔ ɛ́ dil bɛ étɛp bɛ needjɛɛd zɛɛga mendjaala tɔ eghaada djas, dáa mɛ nalɛɛ wɔ ɛ. 6 Tin, mot di paa ɔ goka ɛ́ nɛ ɛdi ɛ́ mot di ààbɛ nɛ embee mɛfulu ɔ. Nyɛ goka ɛ́ nɛ ɛdi ɛ́ nɛ moma ngɔt, bɔn bɛ goka ɛ́ nɛ ɛdum ɛkoŋ nɛ Zɛɛb, sa bɔn binɔk ààdi bot ɛ mɛzɔ, ye nyɔ ɛ́ náá, bɛ kaab bɛbyael bɔɔ. 7 Deenek, mot di edjɛɛd zɛɛga mendjaala ɔ, dáa ye di náá, nyɛ ɛ́ mot-mɛsa ɛ Zɛɛb ɛ, nyɛ goka ɛ́ nɛ ɛdi ɛ́ mot di ààbɛ nɛ embee mɛfulu ɔ. Sa nyɛ ààdi mot ɛghɛɛ nyel, sa nyɛ ààdi mot di ebiyo mbɛs ɔ, sa nyɛ ààdi mot elangi, sa nyɛ ààdi mot ebhooba, sa nyɛ ààdi mot di ekwyɛl ɛbela efute tɔ embee mɛsa ɔ. 8 Tin, nyɛ goka ɛ́ nɛ ɛdi ɛ́ mot di emyaal náá, bot sulal pɛ yɛ ɔ, mot enɛm esa, mot di esiiza ɛnyɔɛpe ɔ, mot epiki, mot edɛɛ, mot ɛdil ɛ lyem. 9 Sa nyɛ ààbɛka nɛ tɛtɛ Mɛkpa ɛ Zɛɛb dáa nyɛ nalyoaa ɛ́, étɛp ɛdjɛ mɛghaaz nɛ bot é ze tɛtɛ mɛlyo, da lyaal nɛ bot ɛ di ewa zyaala ɔ náá, bɛ eekɔɔ lɛŋ.

10 Tin, yɛ ɛ́ nɛ mbula bot tɔ bot ɛ zeni beka ɔ, di náá bɛ ààlooba nɛ etsɛɛtsɛ ɔ. Yɛ ɛ́ bot ɛ di ekɔɔ bɔn-nyɛɛg bɔɔ ɔ nɛ ɛlii etɛp bes ɔ. 11 Ye nyɔ ɛ́, wɔ diyal bɛ enuub. Etɛɛ náá, bɛ ɛpepul mɛbyel djas nɛ embee mɛlyo mɛ bɛ di djɛ ɛ, étɛp ɛgwaal efute yii di edjɛ sen ɛ. 12 Tin, ngɔt tɔ bɛngoolel ɛ mɛkpa mɔɔ met naalɛɛ náá: «Bot ɛ ghaada Kelɛt ɛ́ bot ɛ etsal, bɛtit ɛ mɛnyan, bɛtsak-bel ɛ bot, bot ɛ di ekwyɛl dek dhaa tyɛ ɔ.» 13 Deenek, sa ngoolel-mɛkpa menɔk nalɛɛ ɛ́, yenek nabɛ ɛ́ etsɛɛtsɛ. Bhɛma mbi binɔk bot ɛlyelɛpe etɛɛ náá, ɛdum ɛ koŋ ɛ lɔɔ needi piki. 14 Tin, ye tok ɛnyɔɛpe náá, bɛ gwak etɛp e esua-esua e bot ɛ mbyak eYuda, nɛghu mɛtiŋ mɛ bot ɛ bɔs di edis bot kɔ ze etsɛɛtsɛ ɔ. 15 Deenek, etɛp djas ɛ́ dɛɛ nɛ bot ɛ di dɛɛ ɔ. Tin, ye tok nɛ dhiiti sonok di dɛɛ pɛ daa bot ɛ di nɛ edhuud ɔ, bot ɛ di ààdum koŋ nɛ Zɛɛb ɔ. Deenek, mɛtselal mɔɔ nɛ esiiza bɔɔ moo ɛ́ nɛ edhuud. 16 É di'enek, bɛ ɛpeke náá, bɛ nɛ gu Zɛɛb, ghuna mɛsa mɔɔ ɛpetel náá, bɛ naazebyen Zɛɛb. Tin, bɛ ɛ́ bot ɛ di ebyenaa ɔ, bɛ ɛ́ bot ɛ di kus ɛghuub ɔ, bɛ ɛ́ bot ɛ di ààbɛ nɛ ghwyil ɛsa sa ngɔt yii enɛm ɔ.