1 Mɛ ɛpedjaala nɛ nɔ, é mis ɛ Zɛɛb nɛ é mis ɛ Yezu Klisto, mot aapɛ́ɛ bot ɛ di nɛ tsik, nɛ bot ɛ zegwyɛ ɔ, mɛ ɛpedjaala nɛ nɔ kɔ ɛsu ɛ ɛbula ɛ Yezu Klisto, nɛ kɔ ɛsu ɛ Ɛyoŋ ɛ lɛ: 2 Wa zii tɔ ɛgoola Mɛkpa ɛ Zɛɛb, ye nakoozodi tɔ egwyem nɛghu tɔ ɛtap. Lyaka bot, dula mɛlɔ mɛ bot ɛ di esa ɛbiyo ɔ, djɛ bɛ mɛghaaz, nɛ ɛlyo bɛ tɔ ɛdil ɛ lyem. 3 Etɛɛ náá, yɛ aadi ɛ́ nɛ ɛwala di náá, bot aanàbaakwyɛl ɛgwak mbɛɛ mɛlyo ɛ. Tin, bɛ waasa membi mɛ mɛpek djas, étɛp ɛsa esa ee mɛkwosak mɛ elyem bɔɔ di ekwyɛl ɛ. Bɛ aadi ɛ́ nɛ bɛtɛ nɛ bɛmbee bɛlyoel ɛ aadi elyo bɛ etɛp ee elyem bɔɔ di ekwos ɛgwak ɛ. 4 É di'enek, bɛ waabyen ɛgwak etsɛɛtsɛ, étɛp ɛdu ɛ esesa e esua-esua. 5 Yɛ kabɛ wɔy ɔɔ, dila lyem sok bhwoob etɛp binek djas, maada lyem tɔ mezuk, wa zii é ɛgoola Mbɛɛ Bhaadal, silela mɛsa mɛ Zɛɛb djɛ wɔ ɛ.

6 Yɛ kabɛ mam ɔɔ, ɛwala di náá, ghiya yam neesee dáa buwa ɛ eezedjala, ɛwala ɛmwana nɛ bɔs'ak eezedjala. 7 Mɛ eeduu mbɛɛ tuub, mɛ eekɛkum pɛ ɛsik ɛ kaab mɛ napat ɛ, mɛ eebaal ɛdum ɛ koŋ ɛ lam nɛ Zɛɛb. 8 Nenak, efute ɛpebwood mɛ etɛɛ náá, mɛ eekwak. Efute tak ɛ́ kɔtɔ duu, yɛ ɛ́ kɔtɔ mot epiki. Yɛ ɛ́ nyɛy Ghɛŋ, mbɛɛ tetɛp ɛ kwaadjɛ mɛ yɛ é dwoo mɛpɛ́ɛa ɛ. Tin, nyɛ aanàkwaadjɛ mam ɛmet, nyɛ aadjɛ ɛ́ dɔɔ nɛ bot djas di egwaal nɛ lyem kwyɛl ɛwala ɛ nyɛ aatuula ɛ.

9 Tin, sa mɛghaaz etɛɛ náá, wɔ neeleezɛbela mɛ. 10 Dhemas naazekaab mɛ, etɛɛ náá lyem'ɛ ɛ́ tɔ kwyɛl esa e bɔs'ak. Nyɛ eetɔ́ pɛ ghaada Tesalonik. Yɛ kabɛ Kelesɔn ɔɔ, nyɛ eetɔ́ pɛ kyee dik Ghalasi. Tit naazetɔ́ yɛ pɛ ghaada Dhalmasi. 11 Luk nyɛ ɛmet ɛ́ kalik bis nɛ nɛ. É sok wɔ aazyɛ ɛ, dha bi nɛ Malak. Etɛɛ náá, nyɛ nɛ ghwyil ɛzɛkwyee mɛ tɔ mɛsa mɛ Zɛɛb. 12 Mɛ eelwom Tisik pɛ ghaada Efɛɛz. 13 É sok wɔ aazyɛ ɛ, da wɔ ɛ́ zyɛ mɛ nɛ ndjookuwa yam yii mɛ nalik pɛ ghaada Toloas pɛ tɔ ndjaŋ ɛ Kalpus ɛ. Tin, da wɔ ɛ́ baanɔɔ mɛ mɛkana mam, daŋ-daŋ ɛ mɛkana nasael nɛ eket e bɛtit ɛ. Timote eekɛbee Pɔl é membok

14 Alɛkzandɛlɛ, lulel eghwooz naadyeebasa mɛ ɛbiyo. Tin, Ghɛŋ nyɛ ɛmet waadjɛ nyɛ efute e mɛsa mɛ. 15 Tin, wɔ goka ɛ́ nɛ ɛbaadi nɛ etsoŋ nɛ nɛ, etɛɛ náá nyɛ nabɛ ɛ́, nyɛ dyeebabyen mɛlyo mɛ bis nadi elyo ɛ.

16 Tin, mot ngɔt nabɛ ɛ́ ààkɛm mɛ, é sok mɛ nadi etaŋal taŋal yam yii mɛkɛn ɛ, bot djas nakaab mɛ. Beta náá, Zɛɛb nàlaa syem tak kɔ lɔɔ. 17 Tin, Ghɛŋ naakwyee mɛ, nyɛ naadjɛ mɛ mɛghaaz! Wɔ gwaa, mɛ zɛgoola Mbɛɛ Bhaadal yɛ pɛ daa bot djas di ààbɛ tɔ mbyak eYuda ɔ. Ghɛŋ naapɛk mɛ tɔ nuub ghee. 18 Deenek, Ghɛŋ ɛ́ waabaapɛk mɛ tɔ embee etɛp djas. Tin, nyɛ waatsik mɛ, étɛp nyɛ neeniigal mɛ tɔ Ɛyoŋ ɛ lɛ di tɔ gwoo ɛ. Beta náá, duu di nɛ nɛ kɔm-kɔm sii nɛ kɔm! Amɛn!

19 Da wɔ ɛ́ swos Pilisil bɛ nɛ Akilas dɔɔ nɛ bot ɛ mɛbyel ɛ Onezifɔɔd. 20 Eelasetɛ eelik pɛ ghaada Koolɛt. Tin, mɛ eelik Tolofim pɛ ghaada Milɛ, etɛɛ náá, nyel nadi ekpaa nyɛ. 21 Deenek, sa mɛghaaz wɔ kum, ɛsok nɛ mbu bɛbhi nɛ kan. Ebulus, Pudɔɔ, Linus, Koloodya nɛ bɛdhiiti bɔn-nyoog, bɛ eeswos wɔ.

22 Beta náá, Ghɛŋ di nɛ nɔ! Beta náá enɛm nɛ embɛɛ e Zɛɛb di nɛ nen!