1 Yɛ ɛ́ mam, Pɔl mot-lwoma ɛ Yezu Klisto tɔ ɛkwosak ɛ Zɛɛb. Mɛ ɛ́ wak ɛ́ étɛp ɛgoola bin tsik. Yɛ ɛ́ tsik ɛ Zɛɛb djɛ mena kɔ ɛsu ɛgwakel ɛ lena nɛ Yezu Klisto ɛ.

2 Mɛ kwyal mɛkana mak ɛ́ nɛ wɔy Timote mɔn'am mɛ di ekwyɛl ɔ: beta náá, enɛm nɛ embɛɛ, nɛ lyem ghoŋ, nɛ egwyem ɛ Zɛɛb Sɛɛg bɛ nɛ Ghɛŋ'enaka Yezu Klisto di nɛ nɔ.

3 Mɛ ɛpebulal bhɔɔ nɛ Zɛɛb, mot mɛ di esa mɛsa mɛ nɛ lyem sɛŋ dáa bɛbhaab'am nasa ɛ. Mwos nɛ pum é sok mɛ di edjaala Zɛɛb ɛ, mɛ nɛ dyeebadjaala étɛp'ɔ. 4 Mɛ ɛpetaala meŋal mɔ, é di'enek, mɛ ɛ́ nɛ gwyes ɛbee wɔ, étɛp lyem'am neelwood nɛ mɛmyaala. 5 Mɛ ɛpebaataala dɔɔ nɛ ɛdum ɛ koŋ nɛ Zɛɛb, wɔ zedum nɛ lyem wat ɛ. Yɛ ɛ́ kɔkɔ mbi ɛdum ɛ koŋ nɛ Zɛɛb yii naye yɔ Loyis nɛ nyoog Enis nadi nɛ yɛ ɛ. Mɛ eemyaal náá, kɔkɔ mbi ɛdum ɛ koŋ ɛlenek ɛ́ tɔ lɔ.

6 Yɛ ɛ́ étɛp tak ɛ mɛ baadi elɛɛ nɛ nɔ náá: sa náá, ɛkɛɛ ɛ Zɛɛb nadjɛ wɔ é sok mɛ nakɛl wɔ mɛmbɔ ɛ di nɛ tsik. 7 Etɛɛ náá, Sisim Zɛɛb nadjɛ mena ɛ, ye nabɛ ɛ́ ààbɛ, etɛɛ náá, mena needika bot ɛ bwoo, tin, Sisim djɛ mena ɛ́ ghwyil, kwyɛl nɛ ɛdil ɛ lyem.

8 Sa wɔ ààdi nɛ sen ɛgoola Mbɛɛ Bhaadal ɛ Ghɛŋ'enaka. Sa wɔ ààbaadi nɛ sen nɛ nam, mot di é membok kɔ ɛsu ɛ lɛ ɔ. Deenek, myaala ɛzuk sama nɛ nam étɛp Mbɛɛ Bhaadal. Tin, dia nɛ ɛbwaalel nɛ ghwyil Zɛɛb di edjɛ mena ɛ. 9 Nyɛy ɛ́ natsik mena, nɛ ɛsa náá, mena dika bot ɛ mbyak'ɛ. Ye nabɛ ɛ́ ààbɛ kɔ ɛsu ɛ enɛm esa bena, ye nabɛ ɛ́, kɔ ɛsu ɛ egeka bɛ met nɛ enɛm nɛ embee bɛ met. Tin, Zɛɛb nadjɛ mena enɛm nɛ embɛɛ binek ɛ, é ze ɛ Yezu Klisto, ɛsok nɛ nyɛ nɛkus bhwak. 10 Tin, ɛkɛɛ ɛ enɛm nɛ embɛɛ tak kazɛnyen mos ɛ́ é ɛtuula ɛ Mɛtsik-bot menaka Yezu Klisto. Nyɛy mot nakwak ɛsyee ɔ, yɛ ɛ́ dum nɛ Mbɛɛ Bhaadal ɛ nyɛ natel mena tsik na kɔm-kɔm.

11 Zɛɛb naadjɛ mɛ mɛsa mɛ ɛdi mot-lwoma nɛ lyoel, étɛp ɛkɛgoola Mbɛɛ Bhaadal. 12 Kɔ ɛsu ɛ tak ɛ, mɛ di ebee mezuk mɛ mɛ di ezuk'aak. Mɛ tok nɛ sen étɛp tak, etɛɛ náá, mɛ nɛ gu mot mɛ wa ɛbwaalel ɛ lam nɛ nɛ ɔ ɛnyɔɛpe. Tin, mɛ ɛpemyaal náá, Zɛɛb ɛ́ nɛ ghwyil ɛbaal sa nyɛ nadjɛ mɛ ɛ kɛkum dwoo epɛ́ɛ.

13 Deenek, mɛkpa mɛ etsɛɛtsɛ wɔ nagwak nɛ nam ɛ, yɛ ɛ́ mɛkpa mɛ wɔ di goka nɛ ɛkɛ nɛ yɛ tɔ tsik'ɔ ɛ. Tin, pyeta tɔ ɛdum ɛ koŋ nɛ Zɛɛb, kwyɛla bot nɛ kwyɛl di edus pɛ daa Yezu Klisto ɛ. 14 Deenek, baala mbɛɛ mɛlyo djas nazedjɛaa wɔ nɛ ghwyil Sisim na Dɛɛ di tɔ lena ɛ.

15 Wɔ nɛ gu náá, bot ɛ kyee dik Azi djas naazekaab mɛ, tɔ sama bot ɛ tak, ye nabɛ ɛ́ nɛ Fizɛl bɛ nɛ Ɛɛmozɛn. 16 Beta náá, Ghɛŋ sa enɛm esa bɛ nɛ bot ɛ mɛbyel ɛ Onezifɔɔd, etɛɛ náá, nyɛ naadyeebadjɛ mɛ mɛghaaz. Tin, nyɛ nabɛ ɛ́ ààgwak sen nɛ nam, mam mot membok. 17 Deenek, dáa nyɛ natuula tɔ ghaada Lɔm ɛ, nyɛ naawa zii é ɛsaŋ ɛ mɛ, batakɛbela mɛ. 18 Tin, beta náá, Ghɛŋ sa náá, nyɛ bela enɛm esa e Zɛɛb nɛ dwoo epɛ́ɛ. Wɔy ɛmet nɛ baagu ɛnyɔɛpe esa djas nyɛ nasa nɛ nam pɛ kyee dik Efɛɛz ɛ.