1 Gua ɛnyɔɛpe náá, é mɛlu mɛ mɛsik, yɛ aadi ɛ́ nɛ mɛlu mɛ di elyel ɛ. 2 Etɛɛ náá, bot aanàkagwyena, bot aakadi ɛ́ nɛ elyem tɔp tɔ epata, bot ɛghɛɛa nyel, bot ɛ ɛbet, bot ɛ́ waabyasal Zɛɛb, bɛ aanàkaab bɛbyael bɔɔ, bot aanàkwaamyaal bot, bɛ aanàduwal etɛp di náá, yɛ ɛ́ dɛɛ ɛ. 3 Bot ɛ tak aadi ɛ́, ààbɛ nɛ lyem kwyɛl, ààbɛ nɛ lyem ghoŋ, bot ɛ mɛbhekel, bot ɛ di ekwyɛ lyem ɔ, bot ɛ di nɛ lyem kyet ɔ, bot ɛ di ààkwyɛl enɛm esa ɔ. 4 Bot ɛ endumta, bot ɛ di ebiyo mbɛs ɔ, bot ɛ ɛghɛɛa nyel, bɛ waakwyɛl mɛnyɔ mɛ etɛp e bɔs dhaa yii Zɛɛb. 5 Bot binɔk sa ɛ́ ɛkɛɛ náá, bɛ ɛpedum koŋ nɛ Zɛɛb, ghuna yɛ ɛ́ bot ɛ di ààmyaal ghwyil di tɔ ɛdum ɛ koŋ nɛ Zɛɛb ɛ. É di'enek, dia ɛtsetaɛpe nɛ mbi binɔk bot!

6 Bɛdhiiti bot pak'ɔɔ ɛ́ nɛ mɛfulu mɛ ɛni tɔ mendjaa me bot, étɛp ɛkɔɔ boa di ààbɛ nɛ etsoŋ ɔ. Bɛ sa deenek ɛ́, étɛp boa tak neegwak bɛ. Boa tak ɛ́, boa di àànyɔ ɛtiibal ɔ, boa ɛ di tɔ tsik mesyem ɔ, bɛ nɛ dyeebakwyɛl esa e tsik epuud di ekwyɛl ɛ djas. 7 Mɛlu djas, boa tak ɛ ɛpesaa ɛgu sonok, tin, bɛ aanàkwaakogu etsɛɛtsɛ. 8 Yɛ ɛ́ dáa bot tyee Zanɛs nɛ Zambɛlɛs nadi ebyen lek ɛ Moiiz ɛ, yɛ ɛ́ deenek ɛ́ bot binɔk di ebaabyen etsɛɛtsɛ. Yɛ ɛ́ bot ɛ mbee mɛpek, ɛdum ɛ koŋ nɛ Zɛɛb tokapɛ vaŋ sonok é mis mɔɔ. 9 Tin, bɛ tok nɛ ghwyil ɛtɔ́ nɛ yɛ ɛtsetaɛpe, etɛɛ náá, bot djas ɛ́ waagu ewo bɔɔ, dáa yii Zanɛs nɛ Zambɛlɛs.

10 Yɛ kabɛ wɔy Timote ɔɔ, wɔ bɛ ɛ́ wɔ eegwak mɛlyo mam ɛnyɔɛpe, wɔ eebee mɛfulu mam, mɛsa mɛ mɛ di ekwyɛl ɛsa ɛ, ɛdum ɛ koŋ ɛ lam nɛ Zɛɛb, ɛmaad ɛ lyem'am, kwyɛl'am, nɛ zii'am, 11 wɔ eebee mɛtiiga mɛ bɛ di etiig mɛ ɛ, dɔɔ nɛ mezuk mam. Wɔ nɛ gu etɛp djas mɛ naboma nɛ yɛ pɛ ghaada Antiɔs ɛ, pɛ tɔ ghaada Ikoniɔm nɛ pɛ tɔ ghaada Lisetɛ ɛ. Wɔ nɛ gu mezuk mɛ mɛ naboma nɛ yɛ ɛ. Tin, Ghɛŋ nabɛ ɛ́, nyɛ naapɛk mɛ tɔ etɛp binek djas. 12 Tsɛɛtsɛ, mot djas di ekwyɛl ɛdi sosoob nɛ Zɛɛb, tɔ ɛgwakel nɛ Yezu Klisto ɔ, nyɛ waatiigaa. 13 Tin, bot ɛ mbee lyem nɛ bot ɛ etsal, bɛ waatɔ́ sok tɔ embee mɛsa mɔɔ, bɛ waakɔɔ bɛsɔ bɔɔ. É di'enek, é mɛsik mɛ tak, bɛ ɛ́ waakɔɔ mɛnyel mɔɔ met. 14 Yɛ kabɛ wɔy ɔɔ, baala mɛdjek mɛ wɔ nadjek ɛ, myaala yɛ nɛ lyem wat. Wɔ nɛ gu bɛlyoel ɛ wɔ nadjek pɛ daa lɔɔ ɔ. 15 Kana edhɔma bɔ, wɔ nɛ gu Ekwyala na Dɛɛ. Yɛ ɛ́ nɛ ghwyil ɛdjɛ wɔ etsoŋ ee di edjɛ mot tsik tɔ ɛdum ɛ koŋ nɛ Yezu Klisto ɛ. 16 Tɔ Ekwyala na Dɛɛ djas, yɛ ɛ́ Zɛɛb ɛ nadjɛ bot etsoŋ e ɛkwyal ɛ yɛ. Yɛ ɛ́ nɛ boo mɛtaŋ étɛp ɛlyo bot etsɛɛtsɛ, nɛ ɛlyaal ɛ́ mot ɛdjak ɛ lɛ, nɛ ɛbulal ɛ́ bot ɛ nasa ɛbiyo ɔ é ze, dɔɔ nɛ ɛlyaal ɛ mot tsik Zɛɛb di ekwyɛl ɛ. 17 Ekwyala na Dɛɛ binek nakwyalaa ɛ́ etɛɛ mot-mɛsa ɛ Zɛɛb needi mot zedjala nɛ ɛsa ɛ mɛsa ɔ. Nyɛ needi mot di náá, nyɛ ɛ́ nɛ ghwyil ɛsa membi mɛ enɛm esa djas ɔ.