1 Wɔy, mɔn'am, dia nɛ ghwyil tɔ enɛm nɛ embɛɛ ee di edus pɛ daa Yezu Klisto ɛ. 2 Mɛlyo mɛ wɔ nadi egwak mɛ egoola é mis mɛ bɛtɛ nɛ bɛtyaasɛs ɛ, deenek, lyoa yɛ nɛ bɛtɛtɛ bot, bot aadi nɛ ghwyil ɛ́ baagoola lyo bɛdhiiti bot ɔ.

3 Myaala mezuk sama nɛ nam dhatyee mbɛɛ sodja ɛ Yezu Klisto. 4 Mot di náá, nyɛ dinaa kuku ɛsa mɛsa mɛ esodja ɔ, nyɛ kwyɛl náá, kukuma yɛ myaala nɛ nɛ ɔɔ, sa nyɛ ààbaasa dhiiti mɛsa mɛ sis. 5 Yɛ ɛ́ tyee wat nɛ mot di esa mɛboola mɛ ɛwyis ɛ kaab ɔ. Nyɛ aabela efute ɛ́, nyɛ sa dáa mɛtiŋ mɛ mɛboola mɛ tak di elɛɛ ɛ. 6 Mbɛel mɛbhek di ezuk ɛlyelɛpe é ɛsa mɛsa mɛ pyeeb'ɛ ɔ, goka ɛ́ nɛ ɛdi mot mɛkɛn aadɛ edee nyɛ nabɛ ɛ. 7 Siiza ɛnyɔɛpe sa mɛ di elɛɛ wɔ ɛ, deenek, Ghɛŋ ɛ́ waasa náá, wɔ mɛt etɛp djas.

8 Taala Yezu Klisto, dha ɛ Dhavid, mot nagom bhis ɛsyee ɔ, dáa Mbɛɛ Bhaadal mɛ di egoola ɛ di elɛɛ. 9 Yɛ ɛ́ kɔ ɛsu ɛ Mbɛɛ Bhaadal'ak ɛ mɛ di ezuk, kɔ ɛsu ɛ tak ɛ mɛ di kɔɔla, dáa mot sa mbee etɛp ɛ. Tin, Mɛkpa ɛ Zɛɛb tok kɔɔla! 10 Étɛp tak ɛ́, mɛ di emaad etɛp djas kɔ ɛsu ɛ bot ɛ Zɛɛb nazesɛ́ɛ ɔ. Mɛ sa deenek ɛ́, etɛɛ náá, bot ɛ Zɛɛb nazesɛ́ɛ ɔ, neebela tsik nɛ duu na kɔm-kɔm di edus pɛ daa Yezu Klisto ɛ. 11 Yɛ ɛ́ embɛɛ ɛ mɛkpa mɛ etsɛɛtsɛ:

«Mena gwyɛka sama wat nɛ Klisto ɔɔ,

mena waadika nɛ tsik sama wat nɛ nɛ.

12 Mena pyetka ɔɔ,

mena waakɔkeka sama nɛ nɛ.

Mena byenka nyɛ ɔɔ,

nyɛy pe ɛ́, waabyen mena.

13 Mena di ààdika sosoob ɔɔ, nyɛy ɛ́ aazodi ɛ́ sosoob,

etɛɛ náá, nyɛy tok nɛ ghwyil ɛswonal mɛkpa mɛ nuub'ɛ✝.»

14 Baagheelelɛɛ etɛp bak nɛ bot, dula bɛ mɛlo é mis ɛ Zɛɛb náá, sa bɛ ààsuu mɛso kɔ ɛsu ɛ mɛkpa mɛ bot di elóo ɛ. Ɛsuu mɛso menek ɛ́ ààval sa wat, mbi yenek saŋ ɛ́ ɛsaab esisim e bot ɛ di egwak ɔ. 15 Saŋa náá, wɔ di piki é mis ɛ Zɛɛb, dáa mot-mɛsa di ààbɛ nɛ sen é ɛgoola Mbɛɛ Bhaadal etsɛɛtsɛ ɛnyɔɛpe ɛ. 16 Kyeea embee melɛŋ di ebyasal ɛdum ɛ koŋ nɛ Zɛɛb ɛ, etɛɛ náá, bot ɛ di esa deenek ɔ ɛpebɛka nɛ Zɛɛb. 17 Mɛlyo mɔɔ ɛpebel epuud dáa pyoŋ zeni ɛgwyin ɛ. Tin, yɛ ɛ́ tyee wat nɛ Yimɛnɛ nɛ Filɛtus, 18 bɛ naazebɛka nɛ etsɛɛtsɛ. Bot binɔk eezepul ɛdum ɛ koŋ nɛ Zɛɛb bɛdhiiti bot nadi nɛ yɛ ɛ, nɛ ɛlyo bot náá, Zɛɛb naazegomal bot tɔ ɛsyee.

19 Bela náá, epap nalyel-lyel ee Zɛɛb nasum ɛ ɛpepyet ɛnyɔɛpe, mɛkpa mak ɛ́ kwyala kɔ tak: «Ghɛŋ nɛ gu bɔn bɛ✝», tin, «Mot di eke náá, nyɛ ɛ́ mot ɛ́ Ghɛŋ ɔ, nyɛ goka ɛ́ nɛ ɛliig koŋ nɛ ɛbiyo.»

20 Tɔ boo ndjaa, yɛ ɛ́ aanàkwaazodi esowa e lɔɔd nɛ yii eghwooz epata toto. Yɛ aabaadi ɛ́, nɛ yii di kpakaa nɛ le ɛ, dɔɔ nɛ yii dyak. Bɛdhiiti kwomaa ɛ́ étɛp mɛbyoŋ mɛ bot ɛ ghoŋ, bɛdhiiti étɛp ɛbeaa mɛlu djas. 21 Tin, mot ɛ dis edhuud e embee etɛp binek djas ɔɔ, mot tak aadi ɛ́ dáa esowa e ghoŋ di ebeaa dwoo mɛbyoŋ ɛ. Nyɛ eezeso nyel'ɛ djas é mɛsa mɛ kukuma yɛ, é di'enek, nyɛ moo ɛ́ mbɛɛ mot, nyɛ ɛ́ nɛ ghwyil ɛkasa tɛtɛ esesɛɛ.

22 Timote, kyeea embee egwyes e engbaaz, kɛa tɔ epiki, nɛ ɛdum ɛ koŋ nɛ Zɛɛb, nɛ kwyɛl, nɛ egwyem nɛ bot ɛ di eduwal Ghɛŋ nɛ lyem wat ɔ. 23 Tin, sa wɔ ààsuu mɛso dum nɛ etɛp di ààbɛ nɛ lo mɛsɔ ɛ, etɛɛ náá, wɔ nɛ gu náá, ɛdjóo ɛ́ mɛwɔ. 24 É di'enek, mot-mɛsa ɛ Ghɛŋ ɛ́ ààgoka nɛ ɛdi tɔ mɛwɔ. Nyɛ goka ɛ́ nɛ ɛdi nɛ kwyɛl nɛ bot djas, nɛ ghwyil ɛlyo bot, nɛ ɛmaad ɛ lyem. 25 Ye goka ɛ́ náá, nyɛ lyo bot ɛ mɛso tɔ mɛtela, nɛghu Zɛɛb ɛ́ nɛ ghwyil ɛdjɛ bɛ ɛwala di náá, bɛ waaswoola mɛfulu mɔɔ, da gu etsɛɛtsɛ ɛ. 26 Deenek, bɛ waabula tɔ embɛɛ mɛfulu mɔɔ, da bɛ ɛ́ dus é laab ɛ dim mot mɛkɔŋ, mot nazewa bɛ é membok étɛp bɛ neesesa mɛsa mɛ ɔ.