1 Bɔn-nyɛɛg, biyɔ bɛmet nɛ gu ɛnyɔɛpe náá, bis nabɛ ɛ́ ààzyɛ pɛ yebɔ kɔ toto. 2 Tin, bi nɛ baagu náá, é ghɛŋ sok bis naaleeaa, nɛ ɛtiigaa pɛ kɔ ghaada Filip. Tin, Zɛɛb naadjɛ bis mɛghaaz mɛ ɛgoola bin Mbɛɛ Bhaadal tɔ boo tuub bis nadi eswak nɛ yɛ ɛ. 3 Etɛɛ náá, mɛlyo mɛ bis di elyo bin ɛ, ye tok esua-esua etsal. Ye tok náá, bis eewo ze. Tin, bis ààsaa ɛkɔɔ mot. 4 Tin, bis zolii ɛ́ dáa Zɛɛb di ekwyɛl ɛ. Etɛɛ náá, nyɛ eebee náá, nyɛ ɛ́ nɛ ɛbwaalel nɛ nes, nyɛ bookyeed bis, bis kɛgoola Mbɛɛ Bhaadal. É di’enek, bis ààsaa náá, bot ɛ bɔs myaala nɛ nes, bi saŋ ɛ́ náá, Zɛɛb myaala nɛ nes, nyɛy mot di egu esiiza e elyem bis ɔ. 5 Biyɔ bɛmet nɛ gu ɛnyɔɛpe náá, bis ààlii wak étɛp ɛkɔp ɛ bot, tin, ɛkwosak ɛ les nabɛ ɛ́ ààbɛ, étɛp bis needi tɔ dɔɔb epata kɔ elo bin, Zɛɛb ɛ́ tyaasɛs yes. 6 Bis nabɛ ɛ́ ààsaa náá, bot djɛ bis duu, ye nakoozodi biyɔ nɛghu bɛdhiiti bot. 7 Tin, dáa ye di náá, bis ɛ́ bot ɛ lwoma ɛ Klisto ɛ, bis nabɛ ɛ́ nɛ ghwyil ɛnɛɛg bin si mɛtiŋ mes. É di’enek, é sok bis nadi pɛ yebɔ ɛ, bis nadi ɛ́ nɛ mɛsila nɛ nen dáa moma di ekwyɛɛg bɔn bɛ ɛ. 8 Deenek, bis nabɛ ɛ́, bis moo nɛ kwyɛl nɛ nen dhaa tyɛ. Kwyɛl tak naasa náá, bis nàzosik kɔ ɛdjɛ bin Mbɛɛ Bhaadal Zɛɛb. Tin, ye nabɛ ɛ́ bis naakwyɛl ɛdjɛ bin, dɔɔ nɛ tsik’es. Ye nabɛ ɛ́, bi moo nɛ boo mɛtaŋ é mis mes. 9 Bɔn-nyɛɛg, bi ɛpetaala nɛ mezuk mes nɛ etuŋ bis. Tin, bis nadi ɛ́ tɔ mɛsa mwos nɛ pum, ekaab náá, bis ɛzɛkɛdi nɛ nen boo ɛbɛp, yɛ ɛ́ deenek ɛ́ bis di egoola bin Mbɛɛ Bhaadal Zɛɛb.

10 Biyɔ ɛ́ di bɛtyaasɛs bis, dɔɔ nɛ Zɛɛb pe ɛ́ tyaasɛs yes, bis nabɛ ɛ́ bis naakɛ tɔ epiki, tɔ edɛɛ, ààlyoaa djin é mis mɛ biyɔ bot ɛ zeedum koŋ nɛ Zɛɛb ɔ. 11 Bi nɛ baagu náá, bis nadi nɛ nen ɛ́, dáa sɛɛg bɔn di edi nɛ bɔn bɛ ɛ. 12 Tin, bis nabɛ ɛ́, bis naadjɛ bin mɛghaaz nɛ mɛlyo. Bis naawaab nɛ nen nɛ ghwyil djas náá, bi kɛ tɔ epiki dáa Zɛɛb di ekwyɛl ɛ. Nyɛy mot di ekwyɛl náá, bi ni tɔ Ɛyoŋ ɛ lɛ, nɛ tɔ duma yɛ ɔ.

13 Bis ɛpebulal bhɔɔ nɛ Zɛɛb mɛlu djas etɛɛ náá, é ghɛŋ bis nagoola bin Mbɛɛ Bhaadal ɛ, bi naagwak yɛ. Tin, bi naamyaal yɛ dáa Mɛkpa ɛ Zɛɛb, ààbɛ dáa mɛkpa mɛ bot ɛ bɔs. Deenek, nɛ tsɛɛtsɛ yɛ ɛ́ Mɛkpa ɛ Zɛɛb, yɛ ɛ́ di esa mɛsa tɔ len, biyɔ bot ɛ zedum koŋ nɛ Zɛɛb ɔ. 14 Bɔn-nyɛɛg bam, bi eebaŋa ezɛɛga mendjaala Zɛɛb di pɛ kyee dik Yude ɛ, bot ɛ di tɔ ɛgwakel nɛ Yezu Klisto ɔ. Bi naazuk kɔ ɛsu ɛ bot ɛ kyee dik’en, yɛ ɛ́ dhatyee bot ɛ ezɛɛga mendjaala menek zezuk kɔ ɛsu ɛ bot ɛ mbyak eYuda ɛ. 15 Bɔɔ ɛ́ naagó Ghɛŋ Yezu nɛ bɛngoolel ɛ Mɛkpa ɛ Zɛɛb, tin, bɛ naawa mena tɔ tsik mezuk. Deenek, Zɛɛb ààmyaala nɛ nɔɔ, bɛ moo ɛ́ bot ɛ bhyen bot ɛ bɔs djas. 16 Deenek, bɛ ɛpekwyɛl ɛlu bis náá, bis nàgoola bot ɛ di ààbɛ bot ɛ mbyak eYuda ɔ Mbɛɛ Bhaadal di nɛ ghwyil ɛtsik bɛ ɛ. É di’enek, bɛ ɛ́ kuku ɛbil ɛ mesyem kɔ mesyem mɔɔ bɛ di ezezyɛ nɛ ɛsesa sok ɛ. Tin, ɛbuk ɛ Zɛɛb moo ɛ́ kɔ lɔɔ.

17 Bɔn-nyɛɛg, yɛ kabɛ bisɔ ɔɔ, bis bɛka nɛ nen ɛ́ ba mɔɔ ɛwala batsa, mena bɛkaka ɛ́ edi, tin, menaka ɛ́ edi wat tɔ sisim. Bis ɛ́ nɛ boo ɛkwosak náá, mena baabomaka, dum nɛ tɛp tak ɛ́, bis di esa mɛghaaz étɛp ɛkum pɛ yebɔ. 18 Bis ɛpekwyɛl náá, bis baazyɛ pɛ yebɔ. Deenek, mam Pɔl, esok nɛ esok mɛ nadi ɛ́ nɛ gwyes ɛzyɛ penek, tin, Satan nadi elu bis. 19 Deenek, ye tok bɛdhiiti bot, yɛ ɛ́ biyɔ ɛ́ di ɛbwaalel ɛ les nɛ mɛmyaala mes, bi ɛ́ kɔtɔ duu yes, yii bis aadiig bet é mis mɛ Ghɛŋ Yezu é sok nyɛ aabula ɛ. 20 Deenek, nɛ tsɛɛtsɛ biyɔ ɛ́ di edjɛ bis duma nɛ mɛmyaala!