1 Tin, ekwom e bot goka ɛ́ nɛ ɛbee ekukuma bɔɔ ɛ, dáa bot ɛ di egoka nɛ duu é esonok djas ɛ. Ye goka ɛ́ bɛ sa deenek etɛɛ náá, din ɛ Zɛɛb nɛ mɛlyo mɛ mena di elyo ɛ́ needi ààbyaselaa. 2 Tin, yɛ bɛ náá, bɛ ɛ́ nɛ ekukuma di edum koŋ nɛ Zɛɛb ɔɔ, sa bɛ ààbyasal bɛ etɛɛ náá, bɛ nɛ bɛnɔɔ ɛ́ zɛɛga mendjaala mɛ wat. Ye nyɔ ɛ́ náá, bɛ sa mɛsa mɛ bɛ di esa pɛ daa ekukuma bɔɔ ɛ ɛnyɔɛpe, etɛɛ náá, bɛ sa mɛsa ɛ́ pɛ daa bot ɛ di edum koŋ nɛ Zɛɛb ɔ. Yɛ ɛ́ bot ɛ Zɛɛb di ekwyɛl ɔ.

Gwaka sa wɔ di egoka nɛ ɛlyo, nɛ ɛlɛɛ náá bɛ sa ɛ. 3 Bɛdhiiti bot ɛpelyo embee mɛlyo mɛ sis, di ààgoka nɛ yii Ghɛŋ'enaka Yezu Klisto ɛ. Bɛ ààlyo bot mɛlyo mɛ di ekɛ lɔɔg wat nɛ ɛdum ɛ koŋ ɛ lena nɛ Zɛɛb ɛ. 4 Binɔk bot ɛ́, bot ɛghɛɛa nyel, bɛ ààgu sonok. Kwyɛl mɛwɔ nɛ ɛsuu ɛ mɛso dum nɛ mɛkpa ɛ́ tɔ lɔɔ tɔɔɔ dáa ɛbɛ́. Mɛwu, mɛwɔ, nɛ mɛlee zɛnɔɔ mbee esiiza dum nɛ bɔn-nyɛɛg dus ɛ́ tin. 5 Bɛ nɛ kwyɛl ɛ́ ɛsuu ɛ mɛso mɛ di ààbɛ nɛ ɛsik ɛ pak'ɔɔ. Yɛ ɛ́ bot ɛ di náá, esiiza bɔɔ moo ɛ́ epila dáa endjemet, bɛ ààgu etsɛɛtsɛ. Egeka bɔɔ ɛ́ náá, ɛdum ɛ koŋ nɛ Zɛɛb ɛ́ dhiiti mbi mɛpek mɛ ɛbela ekum.

6 Nɛ tsɛɛtsɛ, ɛdum ɛ koŋ nɛ Zɛɛb ɛ́ boo mɛvu, wɔ di emyaala nɛ sa wɔ di nɛ yɛ ɔɔ. 7 Etɛɛ náá, bis nabɛ ɛ́ ààzyɛ nɛ dhiiti sonok kɔ ɛko ɛ bɔs'ak, yɛ ɛ́ tyee wat nɛ é sok bot aasik ɛ, bot aanàsik nɛ dhiiti sonok. 8 É di'enek, mena dika nɛ sa dek nɛ ekaad ɔɔ, yɛ eedjala nɛ nena. 9 Tin, bot ɛ di esaa náá, bɛ di nɛ mɛvu ɔ, bɛ nɛ kwyɛ tɔ mɛbhowal. Bɛ ɛ́ tɔ laab dum nɛ embee mɛkwosak mɛ ewo di esa náá, bot di tɔ mezuk nɛ ɛwo ɛ́ ze, nɛ ɛdul ɛ bot tɔ ɛsyee ɛ. 10 Etɛɛ náá, kwyɛl epata ɛ́ ɛsuk ɛ embee etɛp djas. Bɛdhiiti bot ɛ nakwyɛl ɛsa deenek ɔ, bɛ moo mos ɛ́ bɛ eezewo ze ɛdum ɛ koŋ nɛ Zɛɛb. Tin, bɔɔ bɛmet ɛ saa náá, bɛ zuk.

11 Wɔy mot-mɛsa ɛ Zɛɛb, sa wɔ ààsa etɛp binek. Saŋa ɛdi mot epiki, mot ɛgwakel nɛ Zɛɛb, tɔ ɛdum ɛ koŋ nɛ Zɛɛb, nɛ kwyɛl, nɛ ɛmaad ɛ lyem zɛnɔɔ ɛtela ɛ lyem. 12 Duua tɛtɛ tuub ɛdum ɛ koŋ nɛ Zɛɛb, baala tsik na kɔm-kɔm, yii Zɛɛb nadjóo wɔ étɛp tak ɛ, é ghɛŋ wɔ natuud embɛɛ mɛkpa mɛ ɛdum ɛ koŋ ɛ lɔ nɛ Yezu Klisto é mis mɛ bot ɛbuɛpe ɛ, 13 nɛ é mis ɛ Zɛɛb mot di edjɛ tsik nɛ bot djas ɔ, é mis ɛ Yezu Klisto mot nalɛɛ bot embɛɛ mɛkpa mɛ tak é mis mɛ Pɔɔs Pilat ɔ*, mɛ lɛɛ wɔ ɛ́ náá: 14 Looba nɛ mɛtiŋ mɛ wɔ bela ɛ, sa yɛ ààpulel, baala yɛ ɛnyɔɛpe kɛkum dwoo Ghɛŋ'enaka Yezu Klisto aatuula ɛ. 15 Tin, ɛtuula ɛ Klisto aadi ɛ́ é ɛwala ɛ Zɛɛb nazekoobal ɛ.

Nyɛy ɛ́ di kɔ elo e ekukuma djas,

nyɛy ɛdi ɛsuk ɛ mɛnyɔ,

Mɛkoozi mɛ bɛmɛkoozi, Ghɛŋ bɛghɛŋ.

16 Nyɛ ɛmet ɛ́ tsik na kɔm-kɔm,

nyɛ ɛ́ tɔ mɛkas mɛ di náá, mot tok nɛ ghwyil ɛtiila pɛ daa lɛ ɛ.

Mot ngɔt kɔ bɔs dináá ààpabee nyɛ,

mot tok pe nɛ ghwyil ɛbee nyɛ.

Duu nɛ mɛbwala di nɛ nɛ kɔm-kɔm sii nɛ kɔm! Amɛn!

17 Deenek, lɛɛa nɛ bot ɛ di nɛ mɛvu kɔ ɛko ɛ bɔs'ak ɔ náá, sa bɛ ààdi bot ɛ ɛghɛɛa nyel. Baalɛɛ nɛ nɔɔ náá, sa bɛ ààwa ɛbwaalel ɛ lɔɔ tɔ mɛvu mɛ di ààbɔya ɛ. Tin, bɛ goka ɛ́ nɛ ɛwa ɛbwaalel ɛ lɔɔ ɛ́ nɛ Zɛɛb, mot di edjɛ mena esonok dhaa mɛbu ɔ, étɛp mena needika tɔ mɛmyaala. 18 Lɛɛa nɛ nɔɔ náá, bɛ sa enɛm esa, bɛ goka ɛ́ nɛ ɛdi ɛ́ bot ɛ mɛvu tɔ enɛm esa, nɛ elyem ɛgek ɛ́ bɛsɔ bɔɔ ghoŋ, bɛ di bot ɛ ɛgwyena. 19 Bɛ di esa deenek ɔɔ, bɛ waasɛɛg tɛtɛ mɛkwom, étɛp ɛbela tɛtɛ tsik.

20 Wɔy Timote, baala ɛnyɔɛpe sa nadjɛaa wɔ ɛ, kyeea embee melɛŋ di ààkɛ sama nɛ ɛdum ɛ koŋ nɛ Zɛɛb ɛ, sa wɔ ààsuu mɛso nɛ elɛŋ etsal bɛ di eke náá, yɛ ɛ́ etsɛɛtsɛ ɛ. 21 Deenek, bɛdhiiti bot ɛ nadu embee mɛlyo nɛ elɛŋ etsal binek ɔ, bɛ moo ɛ́ bɛ eezewo ze tɔ ɛdum ɛ koŋ ɛ lɔɔ nɛ Zɛɛb.

Tin, beta náá, enɛm nɛ embɛɛ Zɛɛb di nɛ nɔ.