1 Wɔ di edul tɔa-mot mɛlɔ ɔɔ, sa wɔ ààkabiyo-biyoak, wɔ goka ɛ́ nɛ ɛlii nɛ nɛ, ɛkɛɛ wɔ lii ɛ nɛ soog. Yɛ kabɛ mengbaaz ɔɔ, nɔŋa bɛ dáa bɔn-nyoog. 2 Deenek, da wɔ ɛ́ nɔɔ bɛtɔa-boa dáa bɛnyoog, mɛsyes dáa bɛkɛl bɔ, sa wɔ ààdi nɛ egeka ɛsyem nɛ nɔɔ.

3 É di'enek, da wɔ ɛ́ gheekwyee-kwyee bɛkus ɛ boa, yii wɔ di egu náá, bɛ tok nɛ bot ɛ kwyee bɛ ɔ. 4 Yɛ bɛ náá, kus moma ɛ́ nɛ bɔn nɛghu bɛdha ɔɔ, ye goka ɛ́ náá, bɛ sa mɛsa mɛ di elyaal ɛdum ɛ koŋ ɛ lɔɔ nɛ Zɛɛb ɛ, pɛ daa bɛbyael bɔɔ, zɛnɔɔ bɛbhaab bɔɔ. Yɛ ɛ́ deenek ɛ́ bɛ aabulal enɛm esa ee bɛ nasa bɛ ɛ. Yenek ɛ́ sa di ɛnyɔɛpe é mis ɛ Zɛɛb ɛ. 5 Tin, kus moma na tsɛɛtsɛ di náá, nyɛ ɛ́ nyɛy ɛmet, ààbɛ nɛ mot ɛkwyee nyɛ ɔ, nyɛ wa ɛbwaalel ɛ lɛ nɛ Zɛɛb. Deenek, nyɛ ààkat ɛdjaala mwos nɛ pum étɛp ɛwaab náá, Zɛɛb kwyee nyɛ. 6 Yɛ kabɛ kus di egyee nɛ ɛkwosak ɛ lyem'ɛ ɔɔ, nyɛ moo ɛ́ nyɛ eezegwyɛ, ye nakoozodi náá, nyɛ nɛ tsik. 7 Beea sa wɔ di egoka nɛ ɛlɛɛ nɛ bɛkus ɛ boa, étɛp bɛ needi ààbɛ nɛ embee mɛfulu ɛ. 8 Yɛ bɛ náá, mot ààsa enɛm esa nɛ bot ɛ mɛbyel mɛ met ɔɔ, nɛghu bot ɛ́ bɛ nɛ bɛnɔɔ di tɔ ndjaa wat ɔɔ, nyɛ swonal ɛ́ ɛdum ɛ koŋ ɛ lɛ nɛ Zɛɛb. É di'enek, nyɛ ɛpesa ɛbiyo dhaa-dhaŋak bot ɛ di ààdum koŋ nɛ Zɛɛb ɔ.

9 Étɛp din ɛ kus moma neekwyalaa tɔ mɛkana mɛ bɛkus, ye goka ɛ́ náá, moma tak di nɛ membu tyee mɛkam-mɛtɛn nɛ wat (60) kɛdhaa. Da nyɛ ɛ́ di náá, nyɛ nazodi ɛ́ nɛ motom ngɔt. 10 Nyɛ di moma di náá, bot djas nɛ gu náá, nyɛ ɛ́ nɛ embɛɛ mɛsa ɔ: Nyɛ naalyo bɔn bɛ ɛnyɔɛpe, yɛ ɛ́ moma di emyaal náá, bɛdjoŋ sulal pɛ yɛ ɔ, mot di egwyii bot ɛ zedum koŋ nɛ Zɛɛb ɔ mɛko ɔ, mot di ekwyee bot di tɔ edjel ɔ. Deenek, nyɛ di mot ɛsa membi mɛ enɛm esa djas ɔ.

11 Tin, yɛ kabɛ mɛsyes mɛ boa di bɛkus ɔɔ, sa wɔ ààkwyal min mɔɔ tɔ mɛkana. Etɛɛ náá, é ghɛŋ gwyes ɛba ɛ́ aabaasa bɛ ɛ, bɛ waalum koŋ nɛ Klisto. 12 Bɛ sa deenek ɔɔ, bɛ waabela ndjɛ, etɛɛ náá, bɛ nabɛ ɛ́ ààdi sosoob nɛ sa bɛ natuwal myoŋ nɛ mɛsoŋ nɛ yɛ ɛ. 13 É di'enek, dáa bɛ moo ààkabɛ nɛ sa ɛsa ɛ, bɛ kakekɛ ɛ́ mendjaa nɛ mendjaa. Dáa ɛkɛ mendjaa nɛ mendjaa di ààdjaala nɛ nɔɔ ɛ, mɛsa mɔɔ aakadi ɛ́ ɛlii etɛp mbɛs-mbɛs di ààgwyák bɛ ɛ. 14 Dum nɛ tɛp tak ɛ́, mam Pɔl di edjɛ wɔ mɛlyo mak: mɛsyes mɛ boa di bɛkus ɔ goka ɛ́ nɛ ɛtɔ́ mɛba, da bɛ ɛ́ bya bɔn, bɛ sa mɛsa tɔ mendjaa mɛ mɛba mɔɔ. Mɛ ke deenek ɛ́ ekaab náá, mot mɛbhuka mɔɔ ɛzɛkɛlii esonok mbɛs kɔ ɛsu ɛ lɔɔ. 15 Mɛ ke deenek ɛ́, etɛɛ náá, bɛdhiiti bɛkus ɛ boa eezewo ze, tin, bɛ kadu ɛ́ Satan mot mɛkɔŋ. 16 Tin, yɛ bɛ náá, moma di edum koŋ nɛ Zɛɛb ɛ nɛ bɛkus ɛ boa tɔ mɛbyel mɛ ɔɔ, ye goka ɛ́ nyɛy nyɛ ɛmet kwyee bɛ. Yɛ àànyɔ náá, etɛp binek djas zodi kɔ elo e bot ɛ zɛɛga mendjaala. Sa deenek, etɛɛ náá, bot ɛ zɛɛga mendjaala neekwyee bɛkus ɛ boa di bɔɔ bɛmet ɔ.

17 Bɛpaa di edjɛɛd zɛɛga mendjaala ɛnyɔɛpe ɔ, bɛ goka ɛ́ nɛ ɛbela duu edi é sok ebá, daŋ-daŋ ɛ bot ɛ di ewa lyem tɔ mɛsa mɛ mɛlyo, nɛ bot ɛ di egoola Mɛkpa ɛ Zɛɛb ɔ. 18 Etɛɛ náá, Ekwyala lɛɛ ɛ́ náá: «Sa wɔ ààdiyal nuub ngɔmbɛ é ghɛŋ nyɛ di enyal bhum ble ɛ✝.» Nɛ náá: «Mot-mɛsa djas goka ɛ́ nɛ ɛbela efute.»

19 Tin, sa wɔ ààmyaal mɛpita mɛ paa ngɔt aazɛpit mot pɛ daa lɔ ɛ. Wɔ myaal ɛ́, yɛ bɛ náá, bot ɛbá nɛghu bot ɛlɛl ɛ zɛpit nyɛ pɛ daa lɔ ɔɔ✝. 20 Yɛ bɛ bot ɛ di esa mesyem ɔɔ, liia nɛ nɔɔ é mis mɛ bot djas, etɛɛ náá bɛdhiiti bot neegwak bwoo. 21 Mɛ ɛpedjaala nɛ nɔ é mis ɛ Zɛɛb, nɛ é mis ɛ Yezu Klisto, zɛnɔɔ é mis mɛ efofop ee Zɛɛb naasɛ́ɛ ɔ náá, wɔ looba nɛ esa djas mɛ lɛɛ wɔ ɛ, sa wɔ ààwa mbɛk pak bot, ààkwyɛɛg mot ngɔt dhaa sɔ. 22 Sa wɔ ààleesuu ɛkɛl mot mɛmbɔ étɛp ɛdjɛ nyɛ di mɛsa tɔ zɛɛga mendjaala. Sa wɔ ààni tɔ mesyem mɛ bot. Wɔ goka ɛ́ wɔ baal nyel'ɔ dɛɛ.

23 Sa wɔ ààdedɛ mɛdii nɛ mɛdii toto, ye nyɔ ɛ́ náá, wɔ dedɛ ba mɛnyok mɛ vin étɛp mɔ yɔ, dáa ye di náá ɛbɛ́ ɛ mɔ yɔ tak nɛ dhek wɔ ngwyis ɛ.

24 Mesyem mɛ bɛdhiiti bot nyen ɛ́ popoopwon, ɛsok nɛ bɛ nɛ pɛ́ɛ bɛ. Bela náá, pɛ daa bak bot, ye nyen ɛ́, ɛbhis. 25 Tin, tyee wat nɛ enɛm esa e bɛdhiiti bot, ye nɛ nyen popoopwon, yɛ kabɛ pɛ daa bak bot ɔɔ, yɛ ààleenyen.