1 Gwakeka sa mɛkɛn mɛ di ebesal bin náá bi sa ɛ: djaalaka é ɛwaab esa ee bi di nɛ gwyes nɛ ye ɛ, nɛ elɛka, nɛ ɛdjɛ bhɔɔ nɛ Zɛɛb dum nɛ bot djas. 2 Tin, djaalaka Zɛɛb étɛp bɛmɛkoozi djas, zɛnɔɔ bot djas di edi ekukuma ɔ, étɛp bot needi tɔ tɛtɛ tsik di egoka ɛ, nɛ egwyem, nɛ ɛkaab ɛ Zɛɛb, tɔ tɛtɛ kwyɛl nɛ duu djas nɛ Zɛɛb. 3 Beea sa di ɛnyɔɛpe é mis ɛ Zɛɛb Mɛtsik-bot menaka ɛ: 4 Zɛɛb kwyɛl ɛ́ náá, bot djas bela tsik, da bɛ ɛ́ gu etsɛɛtsɛ. 5 Zɛɛb ɛ́ ngɔt, tin, mot di eduula pak bot ɛ bɔs nɛ Zɛɛb ɔ yɛ ɛ́ mot ngɔt, mot tak ɛ́ Yezu Klisto. 6 Nyɛy ɛ́ nadjɛ tsik'ɛ met étɛp ɛpɛk bot djas. É ghɛŋ ɛwala tak nadjala ɛ, nyɛ naazɛdjɛ tseŋa di elyaal náá, ɛkwosak ɛ Zɛɛb ɛ́ náá, bot djas tsak. 7 Tsɛɛtsɛ, mɛ ààpakɔɔ bin, Zɛɛb naadjɛ mɛ di ɛdi ɛ́ lyoel nɛ mot-lwoma yɛ. Nyɛ nasa deenek ɛ́, étɛp mɛ neelyo bot ɛ di ààbɛ bot ɛ mbyak eYuda ɔ, tɔ ɛdum ɛ koŋ nɛ Zɛɛb, nɛ etsɛɛtsɛ.

8 Mɛ kwyɛl ɛ́ náá, é edi djas, botom djaala Zɛɛb nɛ mɛmbɔ mɔɔ e edɛɛ bena pɛ ɛko. Sa bɛ ààdi nɛ ɛbuk tɔ lyem, sa bɛ ààdi bot ɛ mɛwɔ.

9 Tyee wat nɛ boa, mɛ kwyɛl ɛ́ náá, boa di nɛ tɛtɛ bhet. Bɛ di nɛ tɛtɛ ekaad di egoka náá, bot bee ɛ, sa bɛ ààdi nɛ embee epyeeda elo mbɛs di epyeeda étɛp ɛtela nyel ɛ. Sa bɛ ààkomsa mɛnyel nɛ mɛsum mɛ lɔɔd, nɛ bɛmɛvunga nɛ mɛsum nɛghu ekaad di nɛ mɛtaŋ ɛlyelɛpe ɛ. 10 Tin, bɛ goka nɛ ɛlyaal ɛ enɛm bɔɔ ɛ́ tɔ embɛɛ mɛsa mɔɔ, dáa bɛtɛtɛ boa di eduwal Zɛɛb ɛ. 11 É ɛwala ɛ mɛlyo di elyoaa ɛ, boa goka ɛ́ nɛ ɛdi ɛ́ gwyem é gwak mɛlyo tɔ mɛsila djas. 12 Mɛ ààpadjɛ ze náá, moma djɛ mɛlyo nɛghu ɛkɔk kɔ motom. Moma goka ɛ́ nɛ ɛdi gwyeema, é ghɛŋ nyɛ di egwak mɛlyo ɛ. 13 Etɛɛ náá, Zɛɛb naleekus ɛ́ Adam motom, bhii tak Ɛve moma. 14 Tin, ye tok Adam nakɔɔaa, yɛ ɛ́ moma. Moma ɛ́ nakɔɔaa, bhii tak, nyɛ naazɛkwyɛ ndjɛ é mis ɛ Zɛɛb. 15 Tin, moma aazobela tsik ɛ́, é sok nyɛ aabya ɛ, moma tak ɛ di ekɛ tɔ ɛdum ɛ koŋ nɛ Zɛɛb, nɛ kwyɛl, tɔ epiki, nɛ tɔ tsik edɛɛ ɔɔ.