1 Beeka mɛkpa mɛ bot djas di egoka nɛ ɛwa ɛbwaalel ɛ: Yɛ bɛ náá, mot ɛpekwyɛl ɛdi ngɔt tɔ bɛdjɛɛdel ɛ zɛɛga mendjaala ɔɔ, nyɛ kwyɛl tin ɛ́ ɛsa embɛɛ mɛsa. 2 Ye goka ɛ́ náá, djɛɛdel ɛ zɛɛga mendjaala di mot epiki, nyɛ di ngom moma ngɔt, nyɛ di mot ɛdil ɛ lyem, sa nyɛ ààdi mot ɛdheka ɛ lyem, nyɛ di mot mbɛɛ mɛfulu, nyɛ di mot di emyaal náá bɛdjoŋ sulal pɛ yɛ ɔ, nyɛ di mot di edjɛ bɔɔ bɛsɔ mɛlyo ɔ. 3 Sa nyɛ ààdi mot elangi, na ghaa etuub, nyɛ goka ɛ́ nɛ ɛdi mot mɛtela, ààdi mot mɛwɔ nɛghu mot di ekwyɛl epata dhaa tyɛ ɔ. 4 Tin, nyɛ goka ɛ́ nɛ ɛdjɛɛd bot ɛ mɛbyel mɛ ɛnyɔɛpe, bɔn bɛ goka ɛ́ nɛ ɛlooba nɛ nɛ ɛbuɛpe. 5 Bela náá, mot ɛ di ààgu ɛdjɛɛd bil'ɛ met ɛnyɔɛpe ɔ, haaa nyɛ aakadjɛɛd zɛɛga mendjaala ɛ Zɛɛb dáa? 6 Tin, sa nyɛ ààdi mot di náá, nyɛ aaloo nɛ ɛdum koŋ nɛ Zɛɛb ɔ. Yɛ àànyɔ deenek ekaab náá, nyɛ ɛ́ ɛzɛkɛsa ɛbet, bhii tak, da nyɛ ɛ́ bela baka tyee dim mot mɛkɔŋ nazebela ɛ. 7 Deenek, ye goka ɛ́ náá, dɔɔ nɛ bot ɛ di ààdum koŋ nɛ Zɛɛb ɔ djɛ nyɛ duu, étɛp bɛ needi ààwyɛlɛ nyɛ, tin, nyɛ needi ààkwyit tɔ mɛbhowal mɛ dim mot mɛkɔŋ.

8 Deenek, yɛ ɛ́ tyee wat nɛ edhyakɛlɛ, bɛ goka ɛ́ bɛ di bot ɛ mɛdil. Sa bɛ ààdi bot ɛ mɛdjhaaz pɛ ɛko bhimis pɛ si, ààdi bot ɛ elangi, bɛ ààgoka nɛ ɛdi bot ɛ di ekwyɛl ɛbela epata ààbɛ náá, bɛ eesa mɛsa ɔ. 9 Tin, bɛ goka ɛ́ nɛ ɛbaal etsɛɛtsɛ e ɛdum koŋ ɛ lɔɔ nɛ Zɛɛb nɛ lyem sɛŋ. 10 Bɛ goka ɛ́ nɛ ɛdhaa tɔ mɛbhowal. Yɛ kabɛ náá, bɛ tok nɛ dhiiti tɛp di ekɔɔla nɛ nɔɔ ɔɔ, é di'enek, bɛ ɛ́ nɛ ghwyil ɛkasa mɛsa mɛ edhyakɛlɛ. 11 Tin, bɛl bɔɔ* goka ɛ́ nɛ ɛdil ɛ mɛnyel mɔɔ, sa bɛ ààdi bot ɛ ɛbyak ɛ́ bot, ààdi bot ɛ ebeyak, ye goka ɛ́ bɛ di sosoob é etɛp djas. 12 Dhyakɛlɛ goka ɛ́ nɛ ɛdi ɛ́ ngom moma ngɔt, da nyɛ ɛ́ di mot di djɛɛd bɔn bɛ nɛ bot ɛ mɛbyel mɛ ɛnyɔɛpe ɔ. 13 Deenek, edhyakɛlɛ ɛ di esa mɛsa mɔɔ ɛnyɔɛpe ɔɔ, bot djas ɛ́ waadjɛ bɛ duu. Tin, bɛ waadi nɛ ghwyil ɛlii nɛ ɛbwaalel djas kɔ ɛsu ɛ ɛdum ɛ koŋ nɛ Zɛɛb, mot di esɛɛg mena nɛ Yezu Klisto ɔ.

14 Mɛ kwyal wɔ etɛp bak ɛ́, nɛ ɛbwaalel náá, mɛ moo aazyɛ zɛbee wɔ. 15 Tin, mɛ bɔya ɔɔ, wɔ waagu dáa wɔ aagoka nɛ ɛsa étɛp ɛdjɛɛd bil ɛ Zɛɛb, di zɛɛga mendjaala mɛ Zɛɛb di nɛ tsik ɛ. Yɛ ɛ́ zɛɛga tak ɛ di ɛgwyiŋ ɛ di epyet etsɛɛtsɛ ɔ. 16 Tsɛɛtsɛ, sa sɔ di tɔ ɛdum koŋ nɛ Zɛɛb'enaka ɛ nɛ bɔk:

Klisto nazyɛ kɔ ɛko ɛ bɔs ɛ́ dáa bot djas di ezyɛ ɛ,

yɛ ɛ́ Sisim na Dɛɛ ɛ nalyaal náá, nyɛ ɛ́ mot epiki*.

Nyɛ naatel efofop nyel,

bot naagoola Mbɛɛ Bhaadal pɛ daa bot ɛ mɛdhik mɛ sis kɔ ɛsu ɛ lɛ.

Bhii tak, bɛtɛ nɛ bot naadum koŋ nɛ nɛ.

É di'enek, nyɛ naazɛbela duma ɛ Zɛɛb tɔ gwoo.