1 Tin, Sisim na Dɛɛ nalɛɛ popoopwon ɛ́ náá, bot ɛ kum é ɛwala ɛ mɛsik ɔɔ, bɛdhiiti bot ɛ́ waakat ɛdum koŋ nɛ Zɛɛb, étɛp ɛdu ɛ esisim ee di ewyel bot ɛ, nɛ ɛdu ɛ embee mɛlyo mɔɔ. 2 Deenek, bot ɛ mɛdjhaaz pɛ ɛko, bhimis pɛ si, nɛ bot ɛ etsal ɛ́ waakɔɔ bɛ. Esiiza e bot binɔk moo ɛ́ ngwyɛɛla, dáa bot ɛ di náá, elyem bɔɔ ɛ́ nɛ bham bɛ nadikaa nɛ gwooz nazete tɔɔbelaa nɛ mɛgoo mɛ du ɛ. 3 Deenek, mɛlyo mɛ bot binɔk ɛ́ náá, sa mot ààba, sa mot ààdɛ dhiiti membi mɛ edee. Bela náá, Zɛɛb nadjɛ edee binek ɛ́, etɛɛ náá, bot ɛ zedum koŋ ɔ, nɛ bot ɛ di egu etsɛɛtsɛ ɔ, dɛ yɛ, nɛ ɛghaapɛɛ Zɛɛb. 4 Tin, esa ee Zɛɛb nakus djas ɛ, yɛ ɛ́ ɛnyɔɛpe, ye tok nɛ sa wat aamwasaa tɔ tak. Ye goka ɛ́ náá, bot djɛ Zɛɛb bhɔɔ dum nɛ esa binek. 5 Etɛɛ náá, Mɛkpa ɛ Zɛɛb nɛ mendjaala ɛ di esa náá, esa binek djas di dɛɛ é mis ɛ Zɛɛb.

6 Deenek, wɔ djɛ mɛlyo mak nɛ bɔn-nyoog ɔɔ, wɔ aadi ɛ́ mbɛɛ mot-mɛsa ɛ Yezu Klisto. Wɔ waalyaal náá, yɛ ɛ́ mɛkpa mɛ ɛdum ɛ koŋ nɛ Zɛɛb nɛ tɛtɛ mɛlyo ɛ́ di edee bɔ. Mɛlyo mak djas, wɔ naabaal yɛ ɛnyɔɛpe tɔ lo'ɔ 7 Tin, wɔ goka ɛ́ nɛ ɛmwas esa e esua-esua di esaab dék ɛdum ɛ koŋ nɛ Zɛɛb ɛ. Deenek, saŋa náá, wɔ di sosoob nɛ Zɛɛb. 8 Guka náá, ɛsa mɛsɛŋ mɛ mɛboola ɛ́ ɛnyɔɛpe étɛp nyel. Bela náá, ɛdi ɛ́ sosoob nɛ Zɛɛb nɛ nyɔ dhaa esonok djas! Etɛɛ náá, mos yɛ ɛpedjɛ mena ɛbwaalel, nɛ ɛbaakɛk mena tsik na kɔm-kɔm.

9 Yɛ ɛ́ embɛɛ mɛkpa mɛ etsɛɛtsɛ ee bot djas di egoka nɛ ɛwa ɛbwaalel ɛ, ye goka ɛ́ mot djas myaal yɛ. 10 Yɛ bɛ náá, bot ɛ ɛpezuk nɛ ɛwa zii tɔ mɛsa ɔɔ, yɛ ɛ́, etɛɛ náá, bot naazewa ɛbwaalel nɛ Zɛɛb di nɛ tsik ɔ. Yɛ ɛ́ nyɛy ɛ di Mɛtsik-bot, yii bot djas, daŋ-daŋ ɛ́, bot zedum koŋ nɛ nɛ ɔ.

11 Yenek ɛ́ sa wɔ di egoka nɛ ɛlyo, nɛ ɛlyaal ɛ bot ɛ. 12 Tin, sa mot ààbee wɔ é mis toto, etɛɛ náá, wɔ ɛ́ ngbaaz. Tin, wɔ goka ɛ́ nɛ ɛdi ɛ́ mot bot djas aadu mɛfulu mɛ ɔ, tɔ mɛkpa, tɔ mɛfulu, tɔ kwyɛl, tɔ ɛdum koŋ nɛ Zɛɛb nɛ tɔ edɛɛ. 13 Ɛsok nɛ mɛ nɛ kum, wa lyem tɔ ɛlaa Mɛkpa ɛ Zɛɛb é mis mɛ bot djas, djɛ bɛ mɛghaaz, lyoa bɛ. 14 Tin, sa wɔ ààpel ɛkɛɛ enɛm nɛ embɛɛ ee Zɛɛb nadjɛ wɔ ɛ. Yɛ ɛ́ ɛkɛɛ Zɛɛb wɔ nabela é ghɛŋ bɛngoolel ɛ Mɛkpa ɛ Zɛɛb nalii ɛ, da bɛpaa ɛ́ kɛl wɔ mɛmbɔ ɛ. 15 Tin, wa lyem tɔ etɛp binek djas, da wɔ ɛ́ wa zii tɔ mɛsa mɔ. É di'enek, bot djas ɛ wabee dáa mɛsa mɔ di etɔ́ sok ɛ. 16 Wɔ ɛ́ kobaka nɛ nyel'ɔ met, nɛ mɛlyo mɔ. Wa zii esa yɛ, wɔ di esa deenek ɔɔ, wɔ aatsik nyel'ɔ met nɛ ɛbaatsik bot ɛ di egwak mɛlyo mɔ ɛ.