1 Gheelelɛɛ nɛ bot ɛ zedum koŋ nɛ Zɛɛb ɔ náá, bɛ goka ɛ́ nɛ ɛlooba nɛ bɛmɛkoozi, nɛ ekukuma. Da bɛ ɛ́ di ghwyɛ étɛp ɛsa embɛɛ mɛsa. 2 Sa bɛ ààdi bot ɛ mɛbhekel, sa bɛ ààbiyo mbɛs, bɛ di bot ɛ di eduula pak bot étɛp ɛbulal kwyɛl ɔ, bɛ goka ɛ́ nɛ ɛlyaal é mis mɛ bot djas ɛ́ náá, bɛ ɛ́ bot ɛ mɛtela. 3 Etɛɛ náá, é ghɛŋ sok, bisɔ pe nabaadi ɛ́ ààbɛ nɛ mɛtselal, bot ɛ di ààlooba nɛ Zɛɛb ɔ, bot ɛ nazewo ze ɔ. Bis nabaadi ɛ́ ekwom e membi mɛ mɛkwosak djas, nɛ esa ee di edjɛ djɔŋ é mis ɛ. Bis nadi ɛ́ tɔ embee esesɛɛ nɛ embee egwyes, bot ɛ mbee lyem, ebhinel pak’es. 4 Tin, é sok Zɛɛb Mɛtsik-bot yenaka natel bot djas enɛm esa bɛ, nɛ ɛlyaal kwyɛl’ɛ ɛ,

5 nyɛ naatsik mena. Nyɛ ààpatsik mena etɛɛ náá, mena naasaka esa di náá, yɛ ɛ́ piki ɛ,

deenek, ye nabɛ ɛ́, etɛɛ náá, nyɛy, nyɛ ɛmet naagek mena ghoŋ.

Nyɛ natsik mena ɛ́, nɛ mɛdii mɛ ɛduwa Zɛɛb mena naduwaka é ɛbyel ɛ na bes ɛ,

nɛ Sisim na Dɛɛ ɛ di edjɛ tsik na bes ɛ.

6 Etɛɛ náá, Zɛɛb naadjɛ mena Sisim na Dɛɛ ɛbuɛpe,

kɔ lo ɛ Yezu Klisto Mɛtsik-bot menaka,

7 é di’enek, kɔ ɛsu ɛ enɛm nɛ embɛɛ bɛ, nyɛ eesa náá, mena dika bot ɛ epiki é mis mɛ.

Nyɛ eesa náá, mena belaka ɛkɛɛ ɛ tsik na kɔm-kɔm yii bot di ebwaal ɛ.

8 Tin, mɛkpa mak ɛ, mɛkpa mɛ etsɛɛtsɛ. Mɛ kwyɛl ɛ́ náá, wɔ lɛɛ yɛ popoopwon, etɛɛ náá, bot ɛ zewa ɛdum ɛ koŋ ɛ lɔɔ nɛ Zɛɛb ɔ neewa lyem tɔ ɛsa enɛm esa. Yɛ ɛ́ ɛnyɔɛpe nɛ mɛtaŋ náá, bot djas goka ɛ́ nɛ ɛsa yɛ. 9 Tin, kyeeka etɛp bak: ɛsuu ɛ mɛso mɛ etɛp di ààbɛ nɛ lo ɛ, ɛlaŋ ɛ dhaad mɛbyel, mɛwɔ, ɛsuu ɛ mɛso dum nɛ etsi, etɛɛ náá, etɛp binek djas ɛ́ yii toto, yɛ ààval sonok. 10 Mot ɛ di ezyɛ nɛ mɛfulu mɛ ɛbɛk ɛ bot ɔɔ, dula nyɛ mɛlɔ. Nyɛ baabasal ɔɔ, wɔ baalii nɛ nɛ, tin, nyɛ di ààgwak ɔɔ, wyisela nyɛ tɔ zɛɛga. 11 Gua náá, kɔkɔ mbi binɔk bot eezewo ze, nyɛ du ɛsa mesyem ɔɔ, nyɛ ɛpewa nyel’ɛ met é feŋ.

12 É sok mɛ aadhis wɔ Aatemas nɛghu Tisik ɛ, sa mɛghaaz mɛ ɛzyɛ, zɛbela mɛ kɔ Nikopolis, etɛɛ náá, mɛ eemyam náá, mɛ aadhaa mbu ɛgwyiyo penek. 13 Tin, sa náá, wɔ djɛ Zenas mot ghɛm-taŋal bɛ nɛ Apolɔs esa di egoka étɛp mɛndjoŋ mɔɔ ɛ, etɛɛ náá, bɛ needi ààsaa sa wat. 14 Ye nyɔ ɛ́ náá, bɛdhiiti bot bina wa lyem ɛlyelɛpe tɔ embɛɛ mɛsa, étɛp ɛkwyee bot ɛ di ghal-ghal tɔ ɛsɛɛga ɔ. Tin, bɛ di esesa deenek ɔɔ, bot aadi ɛ́ bot ɛ di edjɛ embɛɛ bhum ɔ. 15 Deenek, bot ɛ bis nɛ bɛnɔɔ di wak djas ɔ, bɛ eeswos wɔ. Swosa bot ɛ di sama nɛ nena tɔ ɛdum ɛ koŋ nɛ Zɛɛb ɔ. Beta náá, enɛm nɛ embɛɛ di nɛ biyɔ djas!