1 Mini vecljiu, a doamnãljei* aleaptã shi a hiljilor a ljei tsi lã voi tu alihea, shi nu mash mini, ma shi tutsã atselji tsi au cunuscutã alihea, 2 ti itia a alihiljei, tsi sta cu noi shi va s-hibã cu noi di tut eta: 3 harul, njila shi pacea s-hibã cu voi di la Dumnidzãlu Tatãlu shi di la Domnulu Isus Hristos, Hiljilu a Tatãlui, tu alihea sh-tu vreari. 4 Mi hãrãsii multu cã aflai nãscãntsi di hiljilji a tãlji imnãnda tu alihea, dupã ordinlu tsi loarã di la Tatãlu. 5 Sh-tora ti pãrãcãlsescu, Doamnã, tsi s-lu vrem un-alantu, nu ca cum sã scriu un ordin nou, ma atsea tsi aveam avutã dit apãrnjitã. 6 Shi aestã easti vrearea, s-imnãm dupã ordinli a lui. Cum u avdzãtã dit apãrnjitã, aestã easti ordinlu tsi lom tsi s-imnãm tu nãsu. 7 Mini vã dzãc cã tu lumi au ishitã multsã arãditori, cai nu mãrtirsescu cã Isus Hristos ari vinit tu trup. Aestu om easti arãditorlu shi Antihristolu. 8 Bãgats mintea si nu chirets frutlu a lucrilor tsi avem faptã, ma s-loatsã unã mushtiniri mplinã. 9 Caitsido tsi s-dutsi nclo shi nu armãni tu nvitsãtura a Hristolui, nu ari Dumnidzã. Cai armãni tu nvitsãtura a Hristolui, ari Tatãlu shi Hiljilu. 10 Macã vãrã yini la voi sh-nu adutsi aestã nvitsãturã, nu lu aprucheats la casã shi nu lu salutats. 11 Cã atselu tsi lji dzãtsi "Ghini vinish", s-fatsi parti tu faptili a lui atseali arãli. 12 Cu tuti cã aveam multi lucri ti scriari, nu vream su fãtseam cu carti sh-cu buiauã, ma nãdãescu s-yin la voi shi s-vã grescu cu gura, tsi haraua a noastrã s-hibã ntreagã. 13 Hiljilji a sorãljei a ta aleaptã ti saluteadzã. Amin.