1 Voi tra sã shtits alumta atsea marea trã voi sh-trã atselji di Laoditsea, sh-trã tuts atselji cai nu au vidzut fatsa a mea. 2 Nãetea a mea easti s-inimuseascã ininjli a lor shi s-bãneadzã units tu vreari, tsi elji s-aibã cathi ayishteari tu aduchirea ntreagã shi s-cunoascã mistiryiul al Dumnidzãu, tsi easti Hristolu, 3 iu suntu ascumti tuti ayishtearili a frunimeatsiljei sh-a cunushteariljei.

4 Aestã vã u dzãc tsi vãrã s-nu vã arãdã cu zboari umflati.✝ 5 Sh-cãtse cu trup nu escu atsia la voi, tu duh escu cu voi sh-mi hãrsescu cãndu vã ved voi arãdãpsits sh-pistea a voastrã easti nvãrtushit tu Hristolu.✝ 6 Trã atsea, ashãtsi di cum lu aprucheat Hristolu Isus ca Domnu, ashãtsi imnats tu nãsu, 7 la nãsu s-hits arãdãtsinats sh-pri nãsu thimiljeatsã bana a voastrã. Fãtsets-vã ma vãrtoshi tu pisti, ashãtsi cum vã au nvitsat sh-umplets-vã tu hãristisiri.✝ 8 Bãgats mintea tra s-nu vã fac vãrã sclayi prit filosofii arãdioasi sh-goali, dupã adetea a oaminjlor, dupã fuchiili sufliteascã a lumiljei aishtei sh-nu dupã Hristolu.✝ 9 Cã tu Hristolu, tutã mplinãtatea a Dumnidzãlui bãneadzã tu trup. 10 Voi hits fapts mplinji tu Hristos, cai easti caplu pristi itsi printsipatã sh-itsi autoritati.✝ 11 Units tu Hristolu, voi vã anvãrliga-tãljeat cu anvãrliga-tãljearea tsi nu s-featsi cu mãna a oaminjlor, ma cu anvãrliga-tãljearea faptã di Hristolu, tsi easti dizvishtearea di amãrtiili a truplui. 12 Voi vã ngrupat cu Hristolu prit pitedzlu, ma sh-vã nyeat deadun cu nãsu prit pisti la fuchia a Dumnidzãlui cai lu nyie Hristolu dit mortsã. ✝ 13 Voi earats mortsã tu amãrtiili a voastri sh-tu nianvãrliga-tãljearea a truplui a vostru, ma Dumnidzãlu vã deadi banã cu nãsu sh-vã ljirtã tuti amãrtiili.✝ 14 Elu u ashtearsi documentul a dimãndãciunilor cai eara contra noi sh-nã condamna. Elu lu mutã sh-lu ncurfusi pri crutsi.✝ 15 Ashãtsi Dumnidzãlu li dizviscu printsipãtsili sh-autoritãtsili dracuiti, sh-li arushinã nãintea a lumiljei, triumfãnda pristi atseali tu crutsi.

16 Trã atsea vãrã s-nu vã giudicã trã mãcari icã trã beari, trã sãrbãtoari, icã trã Lunã noauã sh-trã dzãlili di Sãmbãtã.✝ 17 Aesti suntu aumbra atsilor tsi au trã viniri, ma tsi dealihea easti Hristolu. 18 Nu alãsats vãrã s-vã arãcheascã premiul shi s-tradzi ca mari trã itia a viziunilor tsi ari vidzut icã ipiminiseashti tu tãpinii di nafoarã sh-alãvdãri di anghilji. Aestu om s-alavdã di vãnat dupã mintea a lui umineascã. 19 Atsel om nu easti ligat cu caplu, tsi easti Hristolu, di la cai s-hrãneashti tut truplu shi s-tsãni ligat deadun cu noduri sh-cu ligãturi, sh-creashti cu crishtearea al Dumnidzãu.

20 Macã murit deadun cu Hristolu di fuchiili sufliteascã a lumiljei, cãtse bãnats canda hits a lumiljei sh-vã sumbãgats a ordinilor a ljei, ca: 21 "Nu ljea! Nu gusteadzã! Nu ahulea!" 22 Atseali tuti suntu lucri cai s-aspargã di ufilisirea, dupã dimãndãciunjili sh-nvitsãturili a oaminjlor. 23 Aesti au unã pãreari di frunimeatsã, cã s-nveascã cu ncljinari arãdioasã, cu tãpinii sh-cu ninjiluirea a truplui, ma dealihea nu au axii, ma suntu mash trã haraua a truplui.