1 Pavlu, apostul al Hristolu Isus prit voljea al Dumnidzãu, sh-fratili Timoteu, 2 ma scriem a popului a Dumnidzãlui, a fratsilor sh-a surãrilor tu Colose cai suntu pistimenji la Hristolu.

Har sh-pace s-avets di la Dumnidzãlu, Tatãl a nostru.

3 Noi hãristisim Dumnidzãlu, Tatãl a Domnului a nostru Isus Hristos, di cãti ori nã rugãm trã voi, 4 cã avem avdzãtã trã pistea a voastrã tu Hristolu Isus sh-trã vrearea tsi avets trã tut populu a Dumnidzãlui. 5 Aestã pisti sh-aestã vreari li avets di la nãdia tsi vã ashteapti tu tseruri, trã cai avets avdzãtã ma nãinti tu predicarea a alihiljei la evanghelu. 6 Aestu evanghelu tsi agiumsi la voi sh-la tutã lumea ma adutsi carpo, ntrã voi, di dzua tsi avdzãtã sh-dealihea cunuscutã harul a Dumnidzãlui. 7 Evanghelu aestu voi lu nvitsat di la Epafrai, colucrutorlu a nostru* vrut, cai easti huzmichear pistimen al Hristos trã voi,✝ 8 cai nã aspusi ti vrearea a voastrã tu Duh.

9 Trã atsea sh-noi di dzua tsi nvitsãm aestã nu pãpsim s-nã rugãm trã voi sh-lji cãftãm a Dumnidzãlui s-vã mplineascã cu tut cunushtearea a vreariljei a lui prit tutã frunimeatsa sh-aduchearea tsi Duhlu nã da. 10 Ashãtsi voi va putets s-fãtsets unã banã ti hãiri trã Domnul, tra s-lji arsits tu itsido, aducãnda carpo tu cathi faptã bunã sh-crishtãnda tu cunushtearea a Dumnidzãlui. 11 Voi va vã nvãrtushits cu fuchia tsi yini di la putearea mãrit a Dumnidzãlui, cu cathi arãvdari sh-cu harauã, 12 hãristisinda Tatãl, cai vã featsi axii tsi sh-voi s-hits pãrtashi tu mushtinirea a popului a Dumnidzãlui tu lunjinã. 13 Elu nã scoasi di putearea a scutidlui sh-nã strãmutã tu amirãriljea a Hiljilui a lui vrut, 14 tu cai avem arãscumpãrarea, tsi easti ljirtarea a amãrtiilor.✝

15 Elu easti icoana a nividzutlui Dumnidzã, prot-amintat a tuti fãpturilor,

16 cã tu nãsu s-adrarã tuti

atseali cai suntu tu tseruri sh-atseali di pri loc,

atseali vidzutili sh-atseali nividzutili,

thronurili, domnilji, printsipãtsili sh-autoritãtsili.

Tuti suntu adrati prit nãsu sh-trã nãsu.

17 Elu easti nãinti di tuti faptili,

sh-tuti sta deadun tu nãsu.

18 Elu easti caplu a truplui,

tsi va s-dzãc a bisearicãljei.

Elu easti apãrnjita sh-protlu-amintat dit mortsã,

tsi elu si s-fac protlu la tuti.✝

19 Cã a Dumnidzãlui lj-arsi tsi tu Hiljilu a lui s-bãneadzã tutã mplinãtatea a Dumnidzãlui.

20 Sh-prit Hiljiu s-puitueascã tuti cu Dumnidzãlu,

atseali cai suntu pri loc sh-atseali cai suntu tu tser,

fãcãnda pace prit sãndzili a lui virsat tu crutsi.✝

21 Sh-voi tsi unã oarã earat xenji trã Dumnidzãlu sh-dushmanji tu minti trã faptili a voastri arali, 22 tora elu vã puitui tu truplu a lui prit moartea, tra s-vã pãrãstãseascã sãmtsã, fãrã-cusuri sh-nivãrghits nãintea a lui. 23 Armãnets vãrtoshi tu pisti, thimiljeats sh-niminats tu nãdia al evanghelu. Atsel evanghelu tsi avdzãt easti predicat la tuti fãpturili sum tser. Sh-mini, Pavlu, escu huzmichearlu a lui.

24 Tora mini mi hãrsescu di munduirili a meali trã voi, sh-ma mplinescu tu truplu a meu atseali tsi lipsescu tu munduirili a Hristolui, trã truplu a lui, tsi va s-dzãcã bisearica. 25 Huzmichear a bisearicãljei mi feciu dupã arãdãpsirea tsi nji pistipsi Dumnidzãlu trã voi, dimãndãnda ntreg zborlu al Dumnidzãu, 26 mistiryiul tsi s-tsãnu ascumtu tu secoli sh-la brãnili, ma tsi tora s-fãnirusi a popului al Domnu. 27 Dumnidzãlu vru s-vã facã cunuscutã cã cai easti ayishtearea a mãririljei aishtui mistiryiu ntrã pãngãnjlji, tsi easti Hristolu ntru voi, nãdia a mãririljei. 28 Aestu Hristos predicãm sh-noi, urnipsinda sh-nvitsãnda cathi om cu tutã frunimeatsa tra s-pãrãstãsim cathi om perfectu tu Hristos. 29 Trã atsea mini mi munduescu alumtãnda cu agiutarea a puteariljei a Hristolui cai lucreadzã tu mini cu fuchii.