1 Trã atsea, frats sh-surãri a melji vruts shi duruts, haraua sh-curuna a mea, ashãtsi armãnets vãrtoshi tu Domnul, multu vruts!

2 Lã-fac rigeai ali Evodii sh-ali Syntichi s-hibã tu un mundueari tu Domnul. 3 Tsã fac rigeai a tsãea, sots pistimen, s-agiuts atseali muljeri tsi au alumtat cu mini trã evanghelu, deadun cu Clementu sh-cu alantsã colucrutor a melji, tsi numili a lor suntu tu cartea a banãljei. 4 Hãrsits-vã totãna tu Domnul. Ma vã dzãc dinou: Hãrsits-vã! 5 Frunimeatsa a voastrã s-hibã cunuscutã di tuts. Domnul easti aproapi! 6 Nu vã angulcits trã tsiva, ma spunets-lã cãftãrili a voastri a Dumnidzãlui cu rugãciuni, cu spigiurari sh-cu hãristisiri. 7 Pacea a Dumnidzãlui tsi treatsi cathi aducheari, va s-veaglji ininjli sh-minduirili a voastri tu Hristolu Isus.

8 Tu soni, frats sh-surãri, minduits tuti cãti suntu dealihea, cãti suntu tinjisiti, cãti suntu ndreapti, cãti suntu curati, cãti suntu vruti, tuti atseali tsi au numã bunã, cãti suntu virtusiti sh-cãti suntu axii trã alãvdari. Minduits trã aesti lucri. 9 Atseali tsi loat, nvitsat, avdzãt sh-vidzut di la mini, fãtsets-li. Sh-Dumnidzãlu a paciljei va hibã cu voi.

10 Mi hãrsii multu tu Domnul cã tora tu soni voi rinoit cãshtiga a voastra trã mini. Dealihea voi u aveat tu minti, ma nu vã eara datã arastea. 11 Nu u dzãc aestã cã escu tu ananghi, cã mini am nvitsat s-hiu hãrsit tu itsi halã. 12 Mini shtiu tsi va s-dzãcã s-hii tu ananghi, shi shtiu tsi va s-dzãcã tu bulãchi. Mini am nvitsat s-hiu hãrsit tu itsi halã sh-tu itsido, sh-cãndu escu fãnãtit, sh-cãndu escu tu foami, cãndu am cu bulãchi sh-cãndu escu tu ananghi. 13 Mini pot s-fac itsido prit Hristolu tsi mi nvãrtusheashti. 14 Cu tut atsea, voi featsit ghini tsi vã aflat ningã mini tu munduirili a meali. 15 Voi Filipianji, shtits cã cãndu apãrnjii s-predicã evanghelu, dupã tsi fudzi dit Machidunii, vãrã bisearicã nu mi agiutã cu doari dicãt mash voi. 16 Cã sh-tu Sãruna ma multã di unã oarã voi nji pitricut agiutãri cãndu earam tu ananghi. 17 Mini nu voi doarã, ma ma multu caftu frutlu trã ufelia a voastrã. 18 Mini li am loat tuti sh-nji artirsescu. Am tsi nji hãrzãeashti, dupã tsi loai di Epafroditul tsi nj-aveat pitricut voi unã njurizmã bunã, unã curbani bunã-aprucheat sh-arsit di Dumnidzãlu. 19 Dumnidzãlu a meu va si mplineascã prit Hristolu Isus tuti ananghili a voastri dupã averili a lui mãriti. 20 A Dumnidzãlui sh-a Tatãlui a nostru s-lji hibã mãrirea tu eta a etilor. Amin!

21 Salutats tut populu a Dumnidzãlui tu Hristolu Isus. Fratslji shi surãrili tsi suntu cu mini vã pitreac sãnãtati. 22 Tuts oaminjlji a Dumnidzãlui vã pitreac sãnãtati, ma ma mult atselji dit casa al Cezaru.

23 Harul a Domnului Isus Hristos s-hibã cu duhlu a vostru. Amin!