1 Trã atsea, macã voi avets vãrã inimusiri tu Hristolu, vãrã diznjirdari tu vreari, vãrã cumãnicari tu Duh, vãrã ghineatsã shi-jali, 2 atumtsea fãtsets-u mplin haraua a mea, avãnda idyia mundueari, idyia vreari mpriunatã sh-tu un singur minti. 3 Nu fãtsets tsiva trã ambitsii egoisti, nitsi di mãriri vãnat, ma cu tãpinii, cathiunu s-lu tinjiseascã altul ma multã di cãt easti idyiul elu tinjisit. 4 S-nu mutreascã cathiunu intereslu a lui, ma sh-a alantsãlor. 5 S-avets sh-voi atsea mundueari tsi eara tu Hristolu Isus.

6 Elu cu tutã cã avea natura a Dumnidzãlui,

nu s-lugursi ca vãrã tsiva tsi s-tsãnã vãrtos tra s-hibã isea cu Dumnidzãlu,

7 ma s-guli luãnda natura a sclavlui,

shi s-featsi isea ca oaminjlji,

shi hinda tu pãreari ca un om,

8 elu s-tãpinusi shi s-featsi cãndãrsit pãnã tu moarti,

sh-pãnã tu moartea a crutsiljei.

9 Trã atsea Dumnidzãlu u anãltsã tu locuri di nsus,

sh-lji deadi numa tsi easti pristi tuti numili,

10 tsi tu numa al Isus,

si s-apleacã cathi dzinucljiu,

a creaturilor dit tser, atsilor dit loc sh-atsilor dit sum loc,

11 sh-cathi limbã s-aspunã cã Isus Hristos easti Domnu,

trã mãrirea a Dumnidzãlui Tatãl.

12 Trã atsea, vrutslji a melji, ashãtsi cum avets fut totãna cãndãrsits nu mash cãndu earam nãintea a voastrã, ma multu ma multu tora tsi escu diparti, fãtsets-u ascãparea a voastrã cu fricã sh-cu cutrimburari, 13 cã Dumnidzãlu easti atsel tsi vã da voljea sh-fuchia trã fãtseari ashãtsi cum lj-arseashti a lui. 14 Fãtsets itsido fãrã murmurari sh-fãrã ngrãnji, 15 tra s-hits nivãrghits sh-nilãvushits, hilji a Dumnidzãlui fãrã cusuri namisa di unã farã disfãrnatã sh-cicãrdisit. Atumtsea voi va strãlutsits ca steali tu lumi, 16 tsãnãnda vãrtos zborlu a banãljei, tsi mini s-am cu tsi s-mi alavdu tu dzua a Hristolui cã nu alãgai sh-nu lucrai di vãnat. 17 Ma sh-macã va mi versu ca biuturã pristi curbãnsirea sh-huzmitipsirea a pistiljei a voastrã, mi hãrsescu sh-mi alavdu deadun cu voi tuts. 18 Tutashã sh-voi hãrsits-vã sh-alãvdats-vã deadun cu mini.

19 Mini nãdãescu tu Domnul Isus, s-vã pitreacã curundu Timoteul tsi sh-mini s-mi inimusescu, cunuscãnda hãljurili a voastri. 20 Mini nu am vãrã pi unã minti cu mini di cum am Timoteul, tsi dealihea s-cãshtigheadzã ti lucrili tsi au s-facã cu voi. 21 Tuts mutrescu lucrili a lor nu lucrili al Hristos. 22 Ma voi u-cunushtets prova a lui cã cum lji huzmitipsi deadun cu mini a evanghelui, ca hiljiu tsi lji huzmitipseashti a tatã-sui. 23 Nãdãescu, s-vã lu-pitrec atsel trãoarã, macãt s-ved cum va si s-duc lucrili a meali. 24 Sh-pistipsescu tu Dumnidzã, cã sh-mini va yin curundu.

25 Ma, nji pãru ananghioasã s-vã pitrec Epafroditul, fratili a meu, colucrutorlu sh-coluptãtorlu, tsi nji lu aveat pitricut ca huzmichear trã ananghili a meali. 26 Elu avea dor trã voi tuts shi s-nvirinã cã voi aveat avdzãtã cã elu eara niputut. 27 Sh-dealihea eara lãndzit di moarti, ma Dumnidzãlu avu njilã trã nãsu, sh-nu mash trã nãsu ma sh-trã mini, tra s-nu aveam nvirinari pristi nvirinari. 28 Trã atsea vã lu pitricui ma aĝonjea, tsi voi cãndu s-lu videts dinou, s-vã hãrsits sh-mini s-am ma putsãn nvirinari. 29 Ashtiptats-lu tu Domnul cu mari harauã sh-tinjisits-lji ahtãri oaminji, 30 cã trã lucrul al Hristos elu eara multu aproapi di moarti, bãgãnda tu piricljiu bana a lui, tra si mplineascã lipsa a huzmitipsiriljei a voastrã cãtrã mini.