1 Nene Paulo, pamwi na Silivanusi na Timotewo, tukuvasimbiliya baluwa iyi vanu vevamdikiye Kilisito va ku Tesalonike, mwevali vanu vake Daada vetu Nguluvi na Mtwa vetu Yesu Kilisito.

2 Tukuvang'ang'ila usangi na lutengamaso kuhuma kwa Nguluvi Daada vetu na kwa Mtwa vetu Yesu Kilisito.

3 Vakolo vetu, tung'ang'wa kumuhongecha Nguluvi figono fyonda kwajili lyenu. Nefwe twing'ang'wa kugita ndena kwakuva udikilo lyenu wikongeleka hilo na kukelana kwa nyenye kwikongeleka hilo. 4 Kwakuva nefwe tukwidumbila nyenye mu mapinga gya vanu gekumdikila Kilisito kwakuva lya uhuvililo va nyenye na kudikila kuchumbila magudo na utumama chechimupatila.

5 Aga gonda gichelisa kuva lihigo lya Nguluvi ndi lya undakyene, fyonda fyemwigita neke muwonike mwing'ang'wa kwingila mu Ung'achale va kuluhano kwa Nguluvi, kwajili lyake nyenye mugudika. 6 Nguluvi daigita lukani lwa undakyene, dakuvawuyisila magudo vala vevakuvagudisa nyenye, 7 na kuvagita nyenye yemugudika mutulule pamwi na nefwe. Daigita luchowo hulo chipindi Mtwa Yesu peikwacha kuhuma kuluhano kwa Nguluvi pamwi na vandumindumi vake vevali na ludali, 8 na lwenge lwa lyoto na kuvatova vala vanu vevakumlema Nguluvi na vala sevaidikila Njowo Nofu lya Mtwa vetu Yesu. 9 Davitovwa kwa kuhanangwa mbepali na kunengwa patali na Mtwa na ukomi vake mkomi, 10 chipindi dapeikwcha Kilisito, kigono kya kuwanuka ukomi kwa vanu vake na uginyange kuhuma kwa vanu vonda wevidikila. Na nyenye damuvecha mugati lya vene, kwakuva mukaudikila wula unanzi vetukavalongiye.

11 Nde mana tukuvalumbila kwa Nguluvi figono fyonda. Tukumlumba Nguluvi vetu avagite nyenye mwemwing'ang'wa kwikala ngita pevakemeliye. Tukumlumba, kwa umwimike vake, avawesese kusindicha kwa ludali lwake gyala gyonda ganofu gemkela kugita na kusindicha kasi chenu chonda cha udikilo. 12 Twilumba ndena neke litawa lya Mtwa vetu Yesu liwanuke ukomi kuhuma kwa nyenye na nyenye damwipata ukomi kuhuma kwa mwene kwa usangi va Nguluvi vetu na Mtwa vetu Yesu Kilisito.