1 Nondee, ichi ndi njowo cha kwacha kwa Mtwa vetu Yesu Kilisito na petukung'aswa pamwi na kwikala na mwene, tukuvasuka hilo, 2 mubihile kuhogoswa kisatu kwa kila kyemkidikiye na mubihile kuva na uwogofi kwakuva lya njowo cha vanu vevilonga kuva kigono kya Mtwa kigehe pepi kufika. Mbihile kuvadikila vanu avo kwa kulonga kuva vapatile njowo icho kwa ng'asi lya kulota na madaliko awu baluwa yeyihochilwe ihumile kwa nefwe. 3 Munu yeyonda abihile kuvachanga kwa kinu kyokyonda kila. Kwakuva kigono iko sedakikwacha mbaka wula uwofu uhumile tandi na yula munu yeidenya malagilicho ga Nguluvi awoneke na mwiso vake ndi kuhanangwa tipu. 4 Mwene akwidumba kwa finu fyonda fyevilola vanu kuva ndi valungu vangi awu kyevakuchigundamila ata iwesa kwingila mu Kaye lya Nguluvi kuno akwinjuma kuva mwene ndi Nguluvi.

5 Wuli, semuwika kuva ndikavalongie aga gyonda chipindi pendigehe pamwi na nyenye? 6 Ila kigehe kinu kyekimkanila yula munu yeidenya malagilicho ga Nguluvi na nyenye mukichela kinu ikyo. Suwe, uyo munu yeidenya malagilicho ga Nguluvi dawoneka chipindi pechifika. 7 Ludali chechifihiye cha yula munu yeidenya malagilicho ga Nguluvi chigita kasi ata nondee, ila yula yeakumkanila iendelela kumkanila mbaka yula yeakumkanicha ahechwe, 8 ila munu uyo yeidenya malagilicho ga Nguluvi dahumila, ila Mtwa Yesu peikwacha damdocha kwa kumpumulila muhe vake na kumuhananga kwa welu daikwacha navo. 9 Uyu munu yeidenya malagilicho ga Nguluvi daikwacha na ludali lwa Setani na kugita kila namuna lya umunyitu na filuwiluwi fya udesi, 10 na kugita udesi va kila namuna kwa vala vevagehe mulipinga lya kuyaganika. Avo davayaganika kwakuva sevauwanuke na kuukela wula undakyene neke valowolwe. 11 Kwa ndeni, Nguluvi kavavika panyi lya ludali lya uyaganifu neke vadikiye udesi, 12 ila vonda vevilema kudikila undakyene na vevikedukila sambi, davahigwa nongwa.

13 Ila nondee tung'ang'wa kumlumba Nguluvi mbepali kwakuva lyenu vakolo, nyenye yemukelwa na Mtwa, kwakuva Nguluvi avahagula kuhuma pamwindi neke mulowolwe kwa kuchumbila kuhogofichwa kwa Muhe va Nguluvi na kudikila mu undakyene. 14 Nguluvi avakemeliye luchowo ulu kwa ng'asi lya Njowo Nofu chetuvadalikile, avakemeliye neke muwanuke pono lya ukomi va Mtwa vetu Yesu Kilisito. 15 Nondee, vakolo vetu, mkangamale na kukolela unofu gala mawulanicho getukavawulanichile kwa madaliko gyetu na gyetugavasimbiliye.

16 Tukumlumba Mtwa vetu Yesu Kilisito mwene na Daada vetu Nguluvi yeatukeliye kwa usanzi vake akatugaviye unamacha lwa mbepali na luhuvilo lyeligehe na ludali, 17 avanamache na kuvagangamicha mu kila lukani lunofu lwemugita na magito manofu.