1 Ila veve Tito wing'ang'wa kudalika mawulanicho gya undakyene. 2 Valongele vagosi vavaha vaweche vanu vayigafu na vaveche veviginywa na vaveche vanu va kwilongocha va vene na vaveche vikwidikila mawulanicho gya undakyene, vaveche na lukelo na uhuvilo.

3 Ndeni ndeni valongele vadala vagogolo vaveche ngita vala vevahaguliwe na Nguluvi, vabihile kuva vayovelecha na vabihile kuva vasutu va ugimbi, ila ving'ang'wa kuwulanicha njowo cha undakyene, 4 ila vawese kuvawulanicha vadala vavakele vagosi vawo na vana vawo, 5 vawese kwilongocha vavene na vevidikilwa pautalo lya Nguluvi na vadime unofu kaye chawo na vave vasanzi, vavaginya vagosi vawo, neke unanzi va Nguluvi ubihile kubedwa.

6 Ndeni ndeni muvagagamiche vadimi vavese kwilongocha vavene mufinu fyonda. 7 Mufinu fyonda uyiwonese kuva veve ndi mufano va njowo chinofu. Mumawulanicho gako wonesa umwene ukudikila na kugafwata. 8 Gumbanikile machowo geging'ang'wa ambagyo sekilongwa neke vachindwama vako vawone nyone vabihile kupata lukani lyolyonda lya kutulongela kutiya nefwe.

9 Vawulaniche vasutu veng'ang'wa vavapulikiche vakomi vawo na kuvakelesa mumakani gyonda. Vabihile kulumbana navo, 10 awu kuhicha finu fyawo. Ving'ang'wa kuwonesa kuva vene vasanzi na vadikilwa mufigono fyonda, neke mumakani gyonda galete njuma nofu kwa mawulanicho gya Nguluvi, Mulowa vetu. 11 Kwakuva usangi va Nguluvi ugubutililwe neke uvalowole vanu vonda. 12 Usanzi va Nguluvi ukutuwulanicha kugaleka makani sechekumkelesa Nguluvi na ludoboko cha muinyi, neke tukale maisa gegagehe manofu na gyegakumkelesa Nguluvi na kumginya Nguluvi, 13 kuno petuchindila luhuvililo lyeligehe na lufunyo, chipindi pewiuhumila ukomi va Nguluvi Mkomi na Mlowa vetu Yesu Kilisito. 14 Ayihechile mwene kwakuva lyetu neke atukombole kuhuma mukufuwa vonda na kutugita tudikilwe pautalo lya Nguluvi, vanu vevali na ng'elu lwa kugita manofu.

15 Suwe, vawulaniche vanu njowo icho kwa umwimike vako vonda kuno ukuvanamacha na kuvalakilila vanu vako. Munu yoyonda abihile kukubeda.