1 Nene Paulo, mnyigendwa va Nguluvi na mnjagila yealagilichwe na Yesu Kilisito.

Nene ndilagilichwe kuvatanga vevahaguliwe na Nguluvi na kuvalongocha vaichele undakyene va kwikala kwa kumkelisa Nguluvi, 2 wene wukutugavila luhuvililo lwa uwumi va mbepali, Nguluvi seilonga udesi, pehave seawumbile inyi, akatulongiye uwumi va mbepali kwa vanu vake, 3 na pekifikile chipindi chene, akawonise luchowo lwake, nene ndidikilwe mu njowo icho neke ndilanduche, ngita peigehe mu lulagilicho lwa Nguluvi, Mlowa vetu.

4 Ndikusimbilila veve Tito, mwana vangu va undakyene mu udikila vetu.

Ndikung'ang'ila usangi na lutengamaso kuhuma kwa Nguluvi Daada na kuhuma kwa Kilisito Yesu, Mlowa vetu.

5 Ndikulekile ukoya ku kigunguli kya Kilete, neke uwese kugasindilicha gala gyegasigalile kugitwa na kuvahagula vavaha filongochi va lipinga lya vanu va Nguluvi vevamdikiye Kilisito mu figunguli fyonda. Bihile kusemuwa malagilicho gangu, 6 mvaha kilongochi va lipinga lya vanu va Nguluvi vevamdikiye Kilisito ing'ang'wa kuva munu yeseagehe na nongwa na yeagehe na mdala yumwi hela na vana vake ving'ang'wa kumdikila Nguluvi na vabihile kuva na ndewo awu sevadikila. 7 Kwakuva kilongochi va lipinga lya vanu va Nguluvi vevamdikiye Kilisito, ing'ang'wa kulolela kasi lya Nguluvi, seing'ang'wa kuva munya nongwa. Abihile kuva munu munya kwigamba, abihile kuva na luvipo lwa kisatu na abihile kuva mgala na abihile kuva munu yeyipatila sendi kwa ng'asi lya udesi. 8 Ing'ang'wa kuva munu yeikwanuka vagenji na yeikeleswa na njowo cha usanzi, yeagehe na kigelo na yeigita fyeikela Nguluvi na munu yeahaguliwe kwajili lya Nguluvi na yeagehe na kyanda nofu. 9 Ing'ang'wa abate unanzi ula ula va undakyene ngita peuwulanichwa. Ndeni iwesa kuvanamacha vanu kwa kuvawulanicha vanu undakyene na kugagubutula nongwa gya vala vevipinja mawulanicho ago.

10 Kwakuva povali vanu volofu, sevakela kumpulikicha munu yeyonda na kuvachanga vanu vangi kwa upufi vawo, avo ndi vamonga vavala vadikila Vakiyawudi. 11 Ing'ang'wa kupecha njowo chawo, kwakuva vakuchichanga kaye chongofu kwa kuvawulanicha finu fyefikanwa kuwulanichwa, vegita ndeni kwa uwofu neke vayipatile sendi hela. 12 Ata mvichi vawo yumwi yeakali Mkilete, akalongiye, "Vakilete figono fyonda vilonga udesi, kangi vagehe ngita vang'oko vakudasi, vagata ila vikela kuliya!" 13 Makani ago geakalongile gya undakyene, kwakuva wing'ang'wa kuvalakila hilo, neke vaveche na udikilo va undakyene, 14 na vabihile kwendelela kupulikicha mahumulilo ga kuchanga gya Kiyawudi na malagilicho gya vanu vevakanile undakyene va Nguluvi. 15 Finu fyonda fidikilwe kwa vala vevidikilwa pautalo lya Nguluvi, ila kwihela kinu kyokyonda kwikidikilwe pautalo lya Nguluvi kwa vala vevihocha uwofu na sevadikila. Kwakuva luhala na mahocho gyawo gihocha uhafu. 16 Vanu ngita ava vakwinjuma vakumchela Nguluvi, ila magito gyawo mawofu giwonesa kwa undakyene kuva sevakumchela. Ndi vanu vakumvipisa Nguluvi hilo na sevakumpulikicha na sevang'ang'wa kwa lukani lolonda lunofu.