1 Ndikuswitilicha pautalo lya Nguluvi na pautalo lya Kilisito Yesu yedakuvahiga nongwa vanu vevagehe wumi na yevafuwe na kwajili lya ekwacha kwa mwene na kwajili lya Ung'achale vake, 2 dalike luchowo lwa Nguluvi, kwa chipindi kyeking'ang'wa awu seking'ang'wa, kanile na lakilile na kuvanamacha vanu kwa luhuvililo vonda kwa kuvawulanicha unofu. 3 Daukwacha chipindi vanu dasevipulikicha mawulanicho gya undakyene, ila vifwata ludoboko lwao na kwikong'asila vawulanichi volofu vevikuvalongela njowo chila ambacho masigicha gyao daging'ang'a kugapulika. 4 Vikana kupulika undakyene na davafwata mahumulilo gesegivatanga. 5 Ila veve uveche meho mu chipindi chonda na uhuvile magudo na ugite kasi lya kudalika Njowo Nofu, ugite unofu ku unyigendwa vako vonda. 6 Ndikulongela aga kwakuva nene ndigehe pepi kuhechwa ngita usembe va kusukulwa kwa danda na chipindi cha kufuwa kwa nene kifikile. 7 Nditovile fita unofu na lunyilo ndimalile na udikilo ndiudimile, 8 nondee isigiye hela kugavilwa fupo kwa kwikala kwa unofu, ambayo Mtwa muhiga nogwa va undakyene akunigavila kigono kila, se nene hela, ata vangi vonda vevichindila kwa lukelo va kwacha kwa mwene.

9 Gangamache kwacha kwa nene kisatu, 10 kwakuva Dema akakeliye makani gya muinyi akandilekile na kuhelela ku Tesalonike. Na mwene Kilesike akahele ku Galatia na Tito akahele ku Dalamatiya. 11 Luka weka hela ndi asigalie baha na nene. Wache na Maliko, kwakuva ivecha anitange mukasi lya Nguluvi. 12 Ndikamlagiliche Tukiko ukoya ku Efeso. 13 Pewikwacha ndetele likoti lyangu litali lyendililekile ukoya Tiloya kwa Kalipo, ndetele na figanulo fyangu fyefigonjoka hilo fila figanulo fyefigitilwe kwa ngwembe. 14 Alekisanda, yula muhongola finu fya fesa andigitie unjanangifu wolofu, Mtwa damuhomba kuhumila na magito gyake. 15 Umulolele hilo munu uyo, kwakuva akaupinjile hilo unanzi vetu.

16 Chipindi cha kwanja pendikwitasile kwihela munu yeimile lubali lwangu, vonda vakanilekile. Ndikumlumba Nguluvi abihile kuvalila nogwa iyo. 17 Ila Mtwa ekalile pamwi na nene, akanigavila ludali lwa kudalika luchowo lyake mu undakyene vonda, vanu se Vayawudi vaupulike, kangi ndikalowolwe kuhuma mu kufuwa. 18 Mtwa dakundilowa na njowo chonda cha uwofu, akuninyamula unofu mbaka mu ung'achale vake va kuluhano kwa Nguluvi. Ukomi ugehe na mwene mbepali na mbepali, Ndakyene.

19 Vahungilage Pilisila na Akula, pamwi na mwato va Onesifolo. 20 Elasito akasigaliye ku Kolinito na mwene Tilofimo ndikamlekile ku Mileto kwakuva akali itamika. 21 Nondee, ugite kisatu kwacha ikiva yave chipindi kya ng'ala.

Ebulo na Pudenisi na Lino na Kilaudiyo vakuhungila na vakolo vangi vonda.

22 Mtwa aveche pamwi na veve.

Usangi vake uveche na nyenye.