1 Suwe, veve mwana vangu uveche na ludali mu usangi yetupatile kwa Kilisito Yesu. 2 Tegule gala mawulanicho geunipulike pendidalika pautalo lya vaswida volofu, uvagavile vanu vevidikilwa, yeviwesa kuvawulanicha vanu vangi.

3 Ugude pamwi na nene ngita mpuga mwidikila va Kilisito Yesu. 4 Mpuga mu fita akwinenga na kinu kyokyonda ambakyo sekyakipuga, neke kumkelesa mkomi va vapunga. 5 Ndeni ndeni kuhela munu yeisinda na kupata fupo lya kunyila ngita seikukolela malagicho gya mkino. 6 Mgima yeagitile kasi ngomi ndi eng'ang'wa kwanuka pono pa kwanja pa mabenelo. 7 Uhoche ago gyendikulongiye, kwakuva Mtwa akukutanga uveche kuchela finu fyonda.

8 Umuviwuke Yesu Kilisito yeachulumbuswe kuhuma kwa vanu vevafuwe, yeakali lukolo lwa Dawudi, ngita peilongwa mukiganulo kya Nguluvi lyendikuvadalikila. 9 Kwakuva Ndidalika Njowo Nofu, ndiguda na ata kuwopwa ndegeyi cha kyuma ngita wanganifu. Ila luchowo lya Nguluvi liwopwa ndegeyi cha kyuma hamu. 10 Ndena ndihuvilila finu fyonda kwakuva lya yevahaguliwe na Nguluvi, neke na vawo vapate ulowa weugehe kwa Kilisito Yesu na wula wewileta ukomi va mbepali. 11 Luchowo ulu ndi lwa undakyene,

Ngita tukafuwe pamwi na mwene

twikwikala uwumi pamwi na mwene.

12 Petukwendelela kuhuvilila,

twitavala kangi pamwi na mwene.

Petukumlema,

na mwene akutulema

13 Petwihela ludikilo,

mwene isigala kuvecha mdikila mbepali,

kwakuva mwene seiwesa kwilema yumwene.

14 Suwe, vawiwuse vanu vako njowo ichi na kuvalakila pautalo lya Nguluvi vabihile kupinjana kwa makani gya upufi. Kupinjana ukoya seunofu, ila wileta uhanganifu mkomi kwa vala vevipulikicha. 15 Kangale kugita unofu neke Nguluvi akwidikile ngita mnyigendwa yeseilola nyoni pakyanya lya kasi lyake na yeiwulanicha unofu njowo cha undakyene. 16 Mwiyepe na malongano mawofu na gesegakumnjuma Nguluvi, kwakuva ago gagina kuvavika vanu patali na Nguluvi. 17 Mawulanicho ngita ago ndi ngita luma. Mugati va avo vevawulaniche ndi Humenayo na Fileto 18 Ava vanyagiling'ine hilo na valekile undakyene, vakuvayaganicha vanu volofu vevidikiye kwa kulonga uchulubuko vetu ugitilwe suwe. 19 Ila kitamiko weuvikilwe na Nguluvi ndi ukangafu, pakyanya lyake gasimbilwe njowo ichi, "Mtwa akuvachela vala vevagehe vake," Ndeni ndeni, "Kila yeilonga mwene ndi va Mtwa, nde ing'angwa aleke uwofu."

20 Mukaye cha vamosi mugehe na fibakuli na finu fyonda, fingi ndi fesa na sahabu, fingi fya mibiki na mganga, fingi fya kugumbanikilwa kwa uginyange na finu fingi se figumbanikilwa kwa uginyange. 21 Suwe, ngita munu akwiwofoga kwa kwivika patali na njowo icho chonda chiwofu, daivecha kyombo kya kugumbanikila kya uginyange, kwakuva agehe unofu, akumkelesa Mtwa vake na agehe suwe kwa kasi yonda nofu. 22 Mwiyepe na udoboko chiwofu cha udimi, ufwate unofu, udikilo na ukelo na lutengamaso, pamwi na vanu vonda ambavo vakumlumba Mtwa kwa numbula nofu. 23 Mwiyepe malongo gya kidada kyesekikumkelesa Nguluvi na upufi, mwichela kuva ago huchovelecha ndewo. 24 Mnyigendwa va Mtwa abihile kutovana, ila ing'ang'wa kuva mfokomasi kwa vanu vonda, muwulanichi msanzi na muhuvilila, 25 yeing'ang'wa kuvawulanicha kwa ufokomasi vala vevakwipinga na mwene, iwesekana Nguluvi akavatanga vahogeche sambi chao na kuuchela undakyene. 26 Ndena, luhala lwao ukuvawunyila kangi, navo vawese kwilowa mumtambu va Setani yeavakwegile kwa kuvagita vidikie gala geisaka mwene.