1 Uviwuke kuva mufigono fya mwiso kwivecha na chipindi cha utumama. 2 Kwakuva vanu davakwikela vavene na vene kudoboka mafwani na vene kwidumba na vene kidada na vene kuliga na sevakuvaginya vasasi vawo na sevivecha na luhongecho na se vahaguliwe kwajili lya Nguluvi, 3 kangi, vihumila vanu vevihela lukelo munumbula chawo na vesevakuvalekela sambi vayawo na veviyovelecha ndewo na vevihela kigelo na vasugu na sevevikela unofu, 4 vevakuvakana vayawo na vene kuvipa kisatu na vane kwidumba na vene kidada na vevikela unono kuchumba kumkela Nguluvi. 5 Vanu avo kwakuvalola daviwoneka ngita vanu vevakumginya Nguluvi, ila vakuulema ludali lwa undakyane lwa Nguluvi. Mwiyepe na vanu avo. 6 Vamonga vao hulelela mukaye cha vanu na kuvayovelecha vadala vasosuvafu vevihela udikilo na vene sambi na vilongochwa na udoboko uwofu vonda, 7 vadala ambavo vigecha kwiwulanicha figono fyonda, ila seviwesa haa kuchela undakyene. 8 Vanu avo huwupinja undakyene ngita ndeni Yane na Yambile pevampinjile Musa. Avo ndi vanu vevihela luhala na valekile udikilo. 9 Ila seviwesa kwendelela hilo kwakuva lwa upufi vao wiwoneka pelu pee kwa vanu vonda, ngita peikali kwa Yane na Yambile.

10 Ila veve ugamanyile mawulanicho gangu na lugendo lwangu na mahocho gangu na udikilo vangu, uhuvililo vangu na lukelo lwangu na uchindilo lwangu, 11 magudo na utumama. Veve ukugachela makani gyonda gegandipandile ukoya ku Anitiokia na ku Ikono na ku Lisitila. Ndikahuvilile magudo golofu hilo na Mtwa akandilowa munjowo ichi chonda. 12 Munu yeyonda yeing'ang'a kwikala kwa kumkelesa Nguluvi kwa kwiwunga na Kilisito Yesu, ing'ang'wa agudiswe. 13 Ila vanu vawofu na vachanga vikwendelela kuva vanjanganifu hilo, vakivachanga vanu vangi na vawo kuchangwa. 14 Ila veve sigale mu undakyene wula weuwulanichwe weudikile. Wichela vala vevakali vawulanichi vako, 15 nave wikwiwuka kuva kuvangila uwana vako ugachele Masimbo ga Nguluvi gyegiwesa kukugavila uginyange veuleta ulowa kwa ngasi lya kumdikila Kilisito Yesu. 16 Masimbo gonda gya Nguluvi gasimbilwe kwa ulongochi va Nguluvi na gikwidikilwa kwa kuwulanichila undakyene, kuvayakilila vanu nongwa chawo na kuvalongochela vanu vikale kwa unofu, 17 neke munu va Nguluvi aveche na udikilwe na ahaguliwe kwa kugita kasi yeyonda nofu.