1 କ୍ରିସ୍ଟ ବିସ୍ୱାସି ଗତିଦଃଙ୍ଗ୍‌ଳାମଃନ୍‌ ଜଃତେକ୍‌ ଆଚ୍‌ତି, ସେମଃନ୍ ଅଃହ୍‌ଣା ଅଃହ୍‌ଣା ସାଉକାର୍‌ ମଃନ୍‌କେ ଲଳା ହଃର୍କାରେ ମାନ୍‌ତି ହାଉତା ଜୟ୍‌ଗ୍‌ ବଃଲି ଜାଣତ୍‌ ଜଃନ୍‌କଃରି ଇସ୍ୱରାର୍‌ ନାଉ ଆର୍‌ ସିକ୍ୟାର୍‌ ଲିନ୍ଦା ନୟ୍‌ । 2 ଆର୍‌ ଜୁୟି ଲକ୍‌ମଃନାର୍‌ ସାଉକାର୍‌ମଃନ୍ ବିସ୍ୱାସି, ସେମଃନ୍ ଗତିଦଃଙ୍ଗ୍‌ଳାକ୍‌ ବାୟ୍‌ ବଃଲି ବାବିକଃରି ଇନସ୍ତା ନଃକେରତ୍‌, ମଃତର୍‌ ଅଃଦିକ୍‌ ଜଃତୁନେ ସେମଃନାର୍‌ ଉହ୍‌କାର୍ କଃରତ୍‌, କାୟିତାକ୍‌ବଃଲେକ୍‌ ଜୁୟ୍‌ମଃନ୍‌ ଉହ୍‌କାର୍ ହାଉତି, ସେମଃନ୍ ବିସ୍ୱାସି ଆର୍‌ ଲାଡାର୍‌ । ଇ ସଃବୁ କଃତା ସିକ୍ୟା ଦେସ୍‌ ଆର୍‌ ପର୍ଚାର୍‌ କଃର୍‌ ।

3 କେଏ ଜଦି ବିନ୍‌ ରଃକମ୍‌ ସିକ୍ୟା ଦଃୟ୍‌କଃରି, ଅଃମାର୍‌ ଜିସୁ କ୍ରିସ୍ଟର୍‌ ଉହ୍‌କାର୍ କଃର୍ତା କଃତା ଆର୍‌ ଇସ୍ୱରାର୍‌ ମାନ୍‌ତି କଃର୍ତା ହଃର୍କାରେ ସିକ୍ୟା ନଃମାନେ, 4 ତଃବେ ସେ ଚୁଚାୟ୍‌ ଗଃର୍ବ୍‌ ଆର୍‌ ବୁଦି ନଃୟ୍‌ଲାର୍‌ ଆର୍‌ କଃତା ଦଃରାଦଃରି ଆର୍‌ କଃତା କାଟାକାଟି ତଃୟ୍‌ ଲାଗିରେତି, ଅଃକାର୍‌, ମାଡ୍‌ଗଳ୍‌, ଲିନ୍ଦା, କଃରାପ୍‌ ଆହ୍ରାତ୍‌, 5 ଆର୍‌ ସେମଃନ୍ କାୟିରି ବାବୁ ନାହାରି ହଲ୍ୟା ଦଃରାଦଃରିଅୟ୍‌ ସଃତ୍‌ ବିସୟ୍‌ମଃନ୍‌କେ ନିକନାୟ୍‌ ବଃଲି କଃଉତି । ଦଃର୍ମି ଅଃବ୍‌କା ଦଃନ୍‌ ହାଉତା ବାଟ୍‌ ବଃଲି ବାବ୍‌ତି ।

6 ଦଃର୍ମିଲକ୍‌ ସଃତ୍‌ କଃରି ମାଜନ୍‌ ବଃଲେକ୍‌ ତାର୍‌ ଜଃତେକ୍‌ ଆଚେ ସଃତେକ୍‌ ତଃୟ୍‌ ସଃର୍ଦା ଅୟି ରଃୟ୍‌ଦ୍‌ । 7 ବଃଲେକ୍‌ ଅଃମିମଃନ୍‌ ଜଃଗତେ କାୟିରି ହେଁ ଆଣି ନଃକେରୁ, ଆର୍‌ ଇତିହୁଣି କାୟିରି ହେଁ ସଃଙ୍ଗେ ନେଉଁ ନଃହାରୁ । 8 ତଃବେ ଅଃର୍ନ୍‌ ଆର୍‌ ବଃସ୍ତର୍‌ ରିଲେକ୍‌ ଅଃମାର୍‌ ହାଁୟ୍‌ ସଃରି । 9 ମଃତର୍‌ ଜୁୟ୍‌ମଃନ୍‌ ମାଜନ୍‌ ଅଃଉଁକେ ମଃନ୍‌କଃର୍ତି, ସେମଃନ୍ ପରିକ୍ୟାୟ୍‌ ଆର୍‌ ହାନ୍ଦାୟ୍‌, ଆର୍‌ ଗାଦା ରଃକମ୍‌ ନଃକେର୍ତା କାମ୍‌ ଆର୍‌ ନଃସ୍ଟ୍‌ଅଉତା ମଃନ୍‌ବାବେ ହଃଳ୍‌ତି, ଇରିମଃନ୍‌ ମାନାୟ୍‌କେ ବଃସମ୍‌ ଆର୍‌ ନାସ୍‌ ଅଃଉତା ସଃମ୍‌ନ୍ଦେ ବୁଡାୟଦ୍‌ । 10 କାୟିତାକ୍‌ବଃଲେକ୍‌ ଦଃନ୍‌ଲଃବ୍‌ ସବୁ ନଃସ୍ଟ୍‌ଅଉତାର୍‌ ମୁଳ୍‌; କଃତିଲକ୍‌ ସେତାକ୍‌ ଆସା କଃରି ବିସ୍ୱାସ୍‌ ଚାଡିକଃରି ବାଟ୍‌ ବାଣାଅୟ୍‌ ଆଚ୍‌ତି । ଆର୍‌ ବଃଡ୍‌ ଦୁକେ ଅଃହ୍‌ଣା ଅଃହ୍‌ଣାର୍‌ ମଃନେ ଦୁକ୍‌ ହାୟ୍‌ଁ ଆଚ୍‌ତି ।

11 ମଃତର୍‌ ଏ ତିମତି, ତୁୟ୍‌ ଗଟ୍ ଇସ୍ୱରାର୍‌ ଲକ୍‌, ତୁୟ୍‌ ଇ ସଃବୁ ଚାଡି କଃରି ଦଃର୍ମକଃତା, ଇସ୍ୱରାର୍‌ ମାୟ୍‌ନ୍‌, ବିସ୍ୱାସ୍‌, ଲାଡ୍‌, ସାସ୍‌ଦଃର୍ତାର୍‌ ଆର୍‌ ସମ୍ବାଳିକଃରି ରେଉଁକେ ଚେସ୍ଟା କଃର୍‌ । 12 ବିସ୍ୱାସାର୍‌ ନିକ ଜୁଜେ ମଃନ୍‌ ହଃରାଣ୍‌ ସଃଙ୍ଗ୍ ଜୁଜ୍‌ କଃରି, ଅଃମ୍ବର୍‌ ଜିବନ୍ ଦଃରି ରେ; ସେତାର୍‌ଗିନେ ତ ତୁୟ୍‌ କୁଦାୟ୍‌ଅୟ୍‌ ଆଚ୍‌ସି ଆର୍‌ ଗାଦେକ୍‌ ସାକିମଃନାର୍‌ ଚଃମେ, ନିକ ସାକି ଦଃୟି ଆଚ୍‌ସି । 13 ✝ସଃବ୍‌କେ ଜିବନ୍ ଦେତା ଇସ୍ୱରାର୍‌ ମୁଏଁ, ଆର୍‌ ପନ୍ତିଅ ପିଲାତର୍‌ ମୁୟେ ନିକ ସାକି ଦେଉଁକେ କ୍ରିସ୍ଟ ଜିସୁର୍‌ ମୁୟେ ମୁୟ୍‌ଁ ତକେ କଃଉଁଲେ । 14 ତୁୟ୍‌ ଅଃମାର୍‌ ମାପୁର୍ ଜିସୁ କ୍ରିସ୍ଟର୍‌ ଆସ୍ତା ହଃତେକ୍‌ ତକ୍‌ ଦିଲା ଦଃର୍ମ୍‌ ସିକ୍ୟାମଃନ୍‌କେ ମାୟ୍‌ନ୍‌କଃରି ନିର୍ମୁଳ୍‌ ଆର୍‌ ଲିନ୍ଦା ନଃହାୟ୍‌ ରେ । 15 ଇସ୍ୱରାର୍‌ ଟିକ୍‌ ବେଳା ଆୟ୍‌ଲେକ୍‌, ସେରି ହୁରୁଣ୍‌ କଃରେଦ୍‌ । ସେ ବଃଡେ ବାୟ୍‌ଗ୍‌ ଗଟେକ୍‌ ବଃଲି ଚଃକର୍‌ବତି, ଜେ ରଃଜାମଃନାର୍ ରଃଜା ଆର୍‌ ମାପ୍ରୁମଃନାର୍‌ ମାପୁର୍ । 16 ଇସ୍ୱର୍‌ ହଃକା ଅଃମ୍ବର୍‌ ଆର୍‌ କେଏ ସେ ଜଃଗାୟ୍‌ ଜଃଉଁନାହାର୍ତା ଉଜାଳେ ବାସାକଃରୁଲା, ଜାକେ କୁୟି ଜଃଗତ୍‌ କଃବେ ନଃଦେକେ କି ଦଃକୁନାହାରେ, ସେ ଟିକଃବେଳାୟ୍‌ ସେରି ଦଃକାୟ୍‌ଦ୍‌ । ଜୁଗ୍ ଜୁଗ୍ ହଃତେକ୍‌ ଇସ୍ୱରାର୍‌ ଜଃଜ୍‌ମାନ୍ ଆର୍‌ ସଃକ୍ତିମାନ୍ ଜାଣା ହଃଳେଦ୍‌, ଆମେନ୍‌ ।

17 ଜୁୟ୍‌ମଃନ୍‌ ଇ ଜଃଗତାର୍‌ ମାଜନ୍‌, ସେମଃନ୍ ଜଃନ୍‌କଃରି ଗଃର୍ବିଆ ନଃଉତି ଆର୍‌ ନଃସ୍ଟ୍‌ଅଃଉତା ଦଃନ୍ ଉହ୍ରେ ବଃର୍‌ସା ନଃକେର୍ତି, ମଃତର୍‌ ବୟ୍‌ଗ୍‌ କଃରୁକେ ସଃବୁ କଃତା ଅଃପର୍‌ବଳ୍‌ ଅଃମିମଃନ୍‌କେ ଦଃୟ୍‌ଦ୍‌ ଜୁୟି ଇସ୍ୱର୍‌, ତାର୍‌ ଉହ୍ରେ ସଃବୁବଃଳ୍‌ ଆସା କଃରୁକେ କଃଉ । 18 ଆର୍‌ ବିନ୍‌ ଲକାର୍‌ ଉହ୍‌କାର୍ କଃରି ସବୁ ସଃତ୍‌ କାମେ ମାଜନ୍‌ ଅଃଉତି, ଆର୍‌ ଆତ୍‌ ମେଲାକଃରି ଆର୍‌ ମଃନ୍‌ ସଃର୍ଦାୟ୍‌ ଦାନ୍‌ କଃର୍ତି, ଇତାର୍‌ ଗିନେ ସେମଃନ୍‌କେ ଆଦେସ୍‌ ଦେସ୍‌ । 19 ଇରଃକମ୍‌ କଃଲେକ୍‌ ସେମଃନାର୍‌ ଆସୁଲା ଜିବନାର୍‌ ଗିନେ ନିକ ମୁଳ୍‌ ଦଃନ୍ ଅଃହ୍‌ଣା ଅଃହ୍‌ଣାର୍‌ ଗିନେ ରୁଣ୍ଡାଉତି, ଜଃନ୍‌କଃରି ସଃତ୍‌ ଜିବନ୍ ହାଉତି ।

20 ଏ ତିମତି, ତକ୍‌ ଜାୟ୍‌ରି ଦିଆ ଅୟିଆଚେ, ତାକେ ବାଚାୟ୍‌ରେ; ଚୁଚାୟ୍‌ ବକୁଆ କଃତା ଆର୍‌ କଃଉଆ ଅୟ୍‌ଲା ଗ୍ୟାନାର୍‌ କଃତା କାଟାକାଟି ଅଃଉତା ଲକମଃନାର୍‌ ତଃୟ୍‌ହୁଣି ଦୁରି ରେ । 21 କଃତିଲକ୍‌ ସେରିମଃନ୍ ମାନିକଃରି ବିସ୍ୱାସ୍‌ କଃତାୟ୍‌ ବାଟ୍‌ ବାଣା ଅୟ୍‌ଆଚ୍‌ତି ।

ଇସ୍ୱରାର୍‌ ଦଃୟା ତର୍‌ ସଃଙ୍ଗେ ରେଉଅ ।