1 ଜିସୁ ମନ୍ଦିର୍‌ ବିତ୍ରେହୁଣି ବାରାୟ୍‌ ଜାତିରିଲା ବଃଳ୍‌, ତାର୍‌ ଚେଲାମଃନ୍ ମନ୍ଦିରାର୍‌ ମେଳ୍‌ଗଃର୍‌ମଃନ୍‌ ଦଃକାଉଁକ୍‌ ତାର୍‌ ହାକ୍‌ ଆୟ୍‌ଲାୟ୍‌ । 2 ତଃବେ ଜିସୁ ସେମଃନ୍‌କେ କୟ୍‌ଲା, "ତୁମିମଃନ୍ କାୟିରି ଇ ସଃବୁ ନଃଦେକୁଲାସ୍‌ ? ମୁଁୟ୍‌ ତୁମିକେ ସଃତ୍‌ କଃଉଁଲେ, ଇ ଗଟେ ଟେଳା ଆରେକ୍‌ ଗଟେକ୍‌ ଟେଳା ଉହ୍ରେ ନଃରେୟ୍‌, ସଃବୁ ହେଁ ବୁୟେଁକୁଳାୟ୍‌ ଅୟ୍‌ଦ୍‌ ।"

3 ତାର୍‌ହଃଚେ ଜିସୁ ଜିତ୍‌ ଡଙ୍ଗ୍ରେ ବଃସ୍‌ଲାକେ ଚେଲାମଃନ୍ ତାର୍‌ ଲଃଗେ ଲୁକ୍‌ଣେ ଆସି ତାକ୍‌ ହଃଚାର୍ଲାୟ୍‌, "ଅଃମିମଃନ୍‌କେ କଃଉ, ଇ ସଃବୁ ଗଃଟ୍‍ଣା କଃବେ ଗଃଟେଦ୍‌ ? ଆର୍‌ ତର୍‌ ଆସ୍ତାର୍‌ ଆର୍‌ ଜୁଗ୍ ସେସ୍‌ ଅଃଉତା ଚିନା କାୟିରି ସେରି ଅଃମିକ୍‌ କଃଉ ।"

4 ତଃବେ ଜିସୁ ସେମଃନ୍‌କେ କୟ୍‌ଲା, "ଜଃଗ୍ରାତ୍‌ ଅୟ୍‌ରିଆ, ଜଃନ୍‌କଃରି କେଏ ହେଁ ତୁମିକେ ନଃବୁଲ୍‌କାଉତି । 5 ବଃଲେକ୍‌ କଃତେକ୍‌ ଲକ୍‌ମଃନ୍‌ ମର୍‌ ନାଉଁଏ ଆସି ‘ମୁଁୟ୍‌ କ୍ରିସ୍ଟ ବଃଲେକ୍‌ ମଃସିଆ !’ ବଃଲି କୟ୍‌କଃରି ଗାଦି ଲକ୍‌ମଃନ୍‌କେ ବୁଲ୍‌କାଉତି । 6 ତୁମିମଃନ୍ ଜୁଜ୍‌ ଅଃଉତା କଃତା ସୁଣାସ୍‌ ଆର୍‌ ଜୁଜ୍‌ ଅଃଉତିରିଲାର୍‌ କବୁର୍ ସୁଣାସ୍‌, ମଃତର୍‌ ଜଃଗ୍ରାତ୍‌, ଡିରା ନାୟ୍‌, ବଃଲେକ୍‌ ଇ ସଃବୁ ବାୟ୍‌ଦ୍‌ରେ ଗଃଟେଦ୍‌, ମଃତର୍‌ ସଃଡେବଃଳ୍‌ ଜୁଗ୍ ନଃବୁଡେ । 7 କାୟିତାକ୍‌ବଃଲେକ୍‌ ଦେସ୍‌ ବିରୁଦେ ଦେସ୍‌, ଲକ୍‌ ବିରୁଦେ ଲକ୍‌ ଉଟ୍‌ତି, ଆରେକ୍‌ ଟାଣେ ଟାଣେ କଃତାର୍‌ ଅୟ୍‌ଦ୍‌ ଆର୍‌ ଦଃର୍ତି ଲଃଦ୍‌ବଃଦେଦ୍‌ । 8 ମଃତର୍‌ ଇ ସଃବୁ ଗଃଟ୍‍ଣା ମାୟ୍‌ଜିର୍‌ ହିଲା ଜଃଲମ୍‌ କଃର୍ତା ଆଗ୍‌ତୁ ଆରୁମ୍‌ ଦୁକା ହର୍‍ ।"

9 ✝"ମଃତର୍‌ ସଃଡେବଃଳ୍‌ ଲକ୍‌ମଃନ୍‌ ତୁମିକେ କଃସ୍ଟ୍‌ବଗ୍ କଃରୁକେ ସଃହ୍ରି ଦେତି, ଆର୍‌ ସେମଃନ୍ ତୁମିକେ ମଃର୍ନେ ମାର୍ତି, ଆର୍‌ ମର୍‌ ନାଉଁଏ ବିସ୍ୱାସ୍‌ କଃର୍ତା ଗିନେ ସଃବୁ ଜାତିର୍‌ ଲକ୍‌ମଃନ୍‌ ତୁମିକେ ଗିଣ୍ କଃର୍ତି । 10 ସଃଡେବଃଳ୍‌ ଗାଦେକ୍‌ ଲକ୍‌ମଃନ୍‌ ବାଦା ହାଉତି ଆର୍‌ ମାପୁର୍ ବିସ୍ୱାସ୍‌ ଚାଡି ସେମଃନ୍ ତାକାର୍‌ ତାକାର୍‌ ବିତ୍ରେ ଦଃରାୟ୍‌ଦେତି ଆର୍‌ ତାକାର୍‌ ତାକାର୍‌ ବିତ୍ରେ ଗିଣ୍ କଃରାକଃରି ଅଃଉତି । 11 ଆର୍‌ ସଃଡେବଃଳ୍‌ ବୁତେକ୍‌ ବାମାଉତା ବାବ୍‌ବାଦିମଃନ୍ ବାରାୟ୍‌କଃରି ଗାଦେକ୍‌ ଲକ୍‌ମଃନ୍‌କେ ବୁଲ୍‌କାଉତି । 12 ସଃଡେବଃଳ୍‌ ଅଃଦଃର୍ମ୍‌ କାମ୍‌ ଜଃବର୍‌ ଅୟ୍‌ଦ୍‌, ଇତାକ୍‌ ଇସ୍ୱରାର୍‌ ଗିନେ ଗାଦେକ୍‌ ଲକାର୍‌ ଲାଡ୍‌ ଉଣା ଅୟ୍‌ଦ୍‌ । 13 ✝ମଃତର୍‌ ଜେ ସେସ୍‌ ହଃତେକ୍‌ ସାସ୍‌ ଦଃରି ରଃୟ୍‌ଦ୍‌, ସେ ନିଜ୍‌କେ ବଚାଉ ହାରେ । 14 ଆର୍‌ ସଃବୁ ବାସାର୍‌ ଲକ୍‌ମଃନାର୍‌ ତଃୟ୍‌ ସାକି ଦେଉଁକେ ସଃର୍ଗ୍‌ ରାଇଜାର୍‌ ଇ ନିକ କବୁର୍ ହୁର୍ତି ସଃରା ପର୍ଚାର୍‌ କଃରା ଅୟ୍‌ଦ୍‌, ତାର୍‌ହଃଚେ ଜୁଗ୍ ସେସ୍‌ ଅୟ୍‌ଦ୍‌ ।"

15 "ଇତାକ୍‌ ତୁମିମଃନ୍ ଜଃଡେବଃଳ୍‌ ଦାନିଏଲ୍‌ ବାବ୍‌ବାଦି କୟ୍‌ଲା, ସେ ନାସ୍‌କାରି ଗିଣ୍ ଆସ୍ତିକ୍‌ ମନ୍ଦିରାର୍‌ ପବିତ୍ର ଟାଣେ ରେତାର୍‌ ଦଃକାସ୍‌ ।" ହଳ୍‌ତା ଲକ୍‌ ଇରି ବୁଜତ୍‌ । 16 "ସଃଡେବଃଳ୍‌ ଜୁୟି ଲକ୍‌ମଃନ୍‌ ଜିଉଦା ରାଜାୟ୍‌ ରେତି ସେମଃନ୍ ଡଙ୍ଗ୍ରେ ହଃଳାୟ୍‌ ଜଃଉଅତ୍‌ । 17 ✝ସଃଡେବଃଳ୍‌ ଜୁୟି ଲକ୍‌ମଃନ୍‌ ଚାନି ଉହ୍ରେ ରେତି ସେମଃନ୍ ନିଜାର୍ ଗଃର୍‌ ବିତ୍ରାର୍‌ ଆସ୍ତିବାଡି ନେଉଁକେ ଉତ୍ରି ନାସତ୍‌ । 18 ଆର୍‌ ସଃଡେବଃଳ୍‌ ଜେ ତାସ୍‌ ହଃଦାୟି ରଃୟ୍‌ଦ୍‌, ସେ ତାର୍‌ ହଃଚ୍ୟା ଆଣୁକେ ଗଃରେ ବାଉଳି ଜଃଉଅ ନାୟ୍‌ । 19 ସଃଡେବଃଳ୍‌ ଜୁୟି ମାୟ୍‌ଜିମଃନ୍ ଆଙ୍ଗେ ରେତି ଆର୍‌ ଦୁଦ୍‌ କାଳାଉତିରେତି, ସେମଃନ୍ ଜଃବର୍‌ ଡଃଣ୍ଡ୍‌ ହାଉତି । 20 ମଃତର୍‌ ତୁମାର୍‌ ହଃଳାଉତାର୍‌ ଜଃନ୍‌କଃରି ସିତ୍‌ ବଃଳ୍‌ କି ବିସାଉଁଣିବାର୍‌ ଦିନ୍‌ ନଃଉଅ, ଇତାକ୍‌ ଇସ୍ୱର୍‌କେ ପାର୍ତ୍‌ନା କଃରା । 21 ✝ବଃଲେକ୍‌ ସଃଡେବଃଳ୍‌ ଇ ରଃକମ୍‌ ଜଃବର୍‌ ଡଃଣ୍ଡ୍‌ ଗଃଟେଦ୍‌ ଜେ, ଜଃଗତାର୍‌ ଆରୁମେ ହୁଣି ଆଜି ହଃତେକ୍‌ ନଃଗେଟେ, ଆର୍‌ କଃବେ ହେଁ ନଃଗେଟେ । 22 ମଃତର୍‌ ଇସ୍ୱର୍‌ ସେ କଃସ୍ଟାର୍‌ ଦିନ୍‌ ଉଣା କଃରି ନଃରିଲେକ୍‌ କେହେଁ ମୁକ୍ତି ହାଉଁକେ ନଃହାର୍ଲାୟ୍‌ ହୁଣି । ମଃତର୍‌ ଇସ୍ୱର୍‌ ବାଚ୍‌ଲାର୍‌ ଲକ୍‌ମଃନାର୍‌ ଗିନେ ସେ ଦିନ୍‌କେ ଉଣା କଃରାଅୟ୍‌ଦ୍‌ ।"

23 "ଆର୍‌ ସଃଡେବଃଳ୍‌ କେଏ ତୁମିମଃନ୍‌କେ ‘କ୍ରିସ୍ଟ ଇତି ଆଚେ,’ କି, ‘ସେତିଆଚେ,’ ବଃଲି କୟ୍‌ଲେକ୍‌, ତୁମି ତାକ୍‌ ବିସ୍ୱାସ୍‌ କଃରାନାୟ୍‌ । 24 ବଃଲେକ୍‌ ସଃଡେବଃଳ୍‌ ବାମାଉତା କ୍ରିସ୍ଟ ଆର୍‌ ବାମାଉତା ବାବ୍‌ବାଦିମଃନ୍ ଉଟି ବଃଡ୍‌ ବଃଡ୍‌ ଚିନା ଆର୍‌ କାବା ଅଃଉତା କାମ୍‌ମଃନ୍‌ ଦଃକାଉତି, ଜଦି ଅଃଉଁ ହାରେ ଇସ୍ୱର୍‌ ବାଚ୍‌ଲା ଲକ୍‌ମଃନ୍‌କେ ହେଁ ବୁଲ୍‌କାଉତି । 25 ଦଃକା, ମୁଁୟ୍‌ ଗଃଟ୍‍ଣା ଗଃଟ୍‌ତା ଆଗ୍‌ତୁ ତୁମିମଃନ୍‌କେ ସଃବୁ ଜାଣାୟ୍‌ଲେ ।"

26 ✝"ତଃବେ ଦଃକା, ଲକ୍‌ମଃନ୍‌ ତୁମିକେ ମାପୁର୍ ବଃଟାୟ୍‌ ଆଚେ ବଃଲି କଃଉତି, ତଃବେ ବାରାୟ୍‌ ଜାହା ନାୟ୍‌, ଦଃକା ସେ ବିତୁର୍‌ ଗଃରେ ଲୁକି ଆଚେ ବଃଲି କଃଉତି, ତଃବେ ତାକାର୍‌ କଃତା ବିସ୍ୱାସ୍‌ କଃରା ନାୟ୍‌ । 27 ବଃଲେକ୍‌ ବିଜ୍‌ଲି ଜଃନ୍‌କଃରି ହୁର୍ବ୍‌ ଦିଗେ ମଃଲ୍‌କାୟ୍‌ ବେଳ୍‌ ବୁଡ୍‌ତି ଦିଗ୍ ହଃତେକ୍‌ ଉଜାଳ୍‌ ଦଃକାଜାୟ୍‌ଦ୍‌, ନଃରାର୍‌ ହୟିସି ହେଁ ସଃନ୍‌କଃରି ଆସେଦ୍‌ ।"

28 ✝"ବଃଲେକ୍‌ ଜୁୟ୍‌ଟାଣେ ମଃଲା ଗଃଗାଳ୍‌ ରଃୟ୍‌ଦ୍‌, ସେଟାଣେ ରାବଣ୍‌ମଃନ୍‌ ହେଁ ଗଟେତଃୟ୍‌ ରୁଣ୍ଡ୍‌ତି ।"

29 ✝"ମଃତର୍‌ ସେ ଦିନାର୍‌ ଡଃଣ୍ଡ୍‌ ହଃଚେ, ସେଦାହ୍ରେ ବେଳ୍‌ ଅଃନ୍ଦାର୍‌ ଅୟ୍‌ଦ୍‌ ଆର୍‌ ଜଃନ୍ ଉଜାଳ୍‌ ନଃଦେୟ୍‌, ତାରାମଃନ୍ ସଃର୍ଗେ ହୁଣି ଅଦୁର୍ତି ଆର୍‌ ଅଃଗାସାର୍‌ ସଃବୁ ସଃକ୍ତିମଃନ୍ ଏଣେ ତେଣେ ଅଃଉତି । 30 ✝ସଃଡେବଃଳ୍‌ ଅଃଗାସ୍‌ ଉହ୍ରେ ନଃରାର୍‌ ହୟ୍‌ସିର୍‌ ଚିନ୍‌ମଃନ୍‌ ଡିସେଦ୍‌ ଆର୍‌ ସଃଡେବଃଳ୍‌ ହୁର୍ତିବିର୍‌ ସଃବୁ ବାସାର୍‌ ଲକ୍‌ମଃନ୍‌ କାନ୍ଦ୍‌ତି ଆର୍‌ ନଃରାର୍‌ ହୟ୍‌ସିକେ ସଃକ୍ତି ଆର୍‌ ବଃଡେ ଜଃଜ୍‌ମାନ୍‌ ସଃଙ୍ଗ୍ ଅଃଗାସାର୍‌ ମେଗେ ଆସ୍ତାର୍‌ ଦଃକ୍‌ତି । 31 ଆର୍‌ ତୁରି ହୁକି ଅଃହ୍‌ଣାର୍‌ ସଃର୍ଗ୍‌ ଦୁତ୍‌ମଃନ୍‌କେ ହଃଟାୟ୍‌ଦ୍‌ ଆର୍‌ ଦୁତ୍‌ମଃନ୍ ହୁର୍ତିବିର୍‌ ଗଟ୍ କନେହୁଣି ଆରେକ୍‌ ଗଟ୍ କଃନ୍‌ ହଃତେକ୍‌ ଚାରିହଃକାର୍‌ ତାର୍‌ ବାଚ୍‌ଲା ଲକ୍‌ମଃନ୍‌କେ ରୁଣ୍ଡାଉତି ।"

32 "ଡୁମ୍ବୁର୍‌ ଗଃଚାର୍‌ ଗଟେକ୍‌ କଃତା ସିକା, ଜଃଡେବଃଳ୍‌ ତାର୍‌ କଃନ୍ଦାୟ୍‌ କଃଉଁଣା ହଃତାର୍‌ ଦଃରେଦ୍‌ ଆର୍‌ ଡାଳ୍‌ ହଃତାର୍‌ ଅୟି ବାଡି ଆସେଦ୍‌, ସଃଡେବଃଳ୍‌ ତୁମି କଃରା ଦିନ୍‌ ଆସୁଲି ବଃଲି ଜାଣାସ୍‌ । 33 ସେରଃକମ୍‌ ତୁମିମଃନ୍ ଜଃଡେବଃଳ୍‌ ଇ ସଃବୁ ଗଃଟ୍‍ଣା ଦଃକ୍‌ଲେକ୍‌, ନଃରାର୍‌ ହୟିସି ଦୁଆର୍‌ ଚଃମେ ବଃଲି ଜାଣା । 34 ମୁଁୟ୍‌ ତୁମିକେ ସଃତ୍‌ କଃଉଁଲେ, ଇ ସଃବୁ କଃତା ନଃଗଟ୍‌ତା ହଃତେକ୍‌ ଅଃବେ ଇ କାଳାର୍‌ ଲକ୍‌ମଃନ୍‌ କଃନ୍‌କଃରି ହେଁ ନଃମେର୍ତି । 35 ଅଃଗାସ୍‌ ଆର୍‌ ହୁର୍ତିବି ନଃସ୍ଟ୍‌ ଅୟ୍‌ଦ୍‌, ମଃତର୍‌ ମର୍‌ କଃତା କଃବେ ନଃସ୍ଟ୍‌ ନୟେ ।"

36 "ମଃତର୍‌ ସେ କଃବେ ଆସେଦ୍‌, ସେ ଦିନ୍‌ ଆର୍‌ ବେଳା କେଏ ନଃଜାଣ୍‌ତି, ସଃର୍ଗାର୍‌ ଦୁତ୍‌ମଃନ୍ କି ହୟିସି ହେଁ ନଃଜାଣେ, ମଃତର୍‌ ସଃର୍ଗାର୍‌ ଉବା ହଃକା ଏକ୍ଲା ଜାଣେଦ୍‌ । 37 ଆର୍‌ ନହର୍‌ ବଃଳ୍‌ ଜୁୟ୍‌ରଃକମ୍‌ ଗଃଟିରିଲି ନଃରାର୍‌ ହୟିସି ଆସ୍ତା ବଃଳ୍‌ହେଁ ସେରଃକମ୍‌ ଅୟ୍‌ଦ୍‌ । 38 ହାଣି ମାରି ହୁର୍ତି ବୁଡ୍‌ତା ଆଗ୍‌ତୁ ନହ ଜାଜେ ହୁର୍ତା ଦିନ୍‌ ହଃତେକ୍‌ ଲକ୍‌ମଃନ୍‌ ଜଃନ୍‌କଃରି କାଉଆ ହିଉଆ ଆର୍‌ ବିବା କଃରୁକ୍‌ ଆର୍‌ ବିବା ଦେଉଁକେ ମାତି ରିଲାୟ୍‌ । 39 ହୁର୍‌ ହାଣି ଆସି ସଃବୁଲକେ ବଳାୟ୍‌ ନଃନେତା ହଃତେକ୍‌ ଜଃନ୍‌କଃରି କାୟିରି ଅୟ୍‌ଦ୍‌, ସେରି କେଏ ଜାଣି ନଃରିଲାୟ୍‌, ନଃରାର୍‌ ହୟିସି ଆସ୍ତା ବଃଳ୍‌ ହେଁ ସେରଃକମ୍‌ ଅୟ୍‌ଦ୍‌ । 40 ସଃଡେବଃଳ୍‌ ଦୁୟ୍‌ ଲକ୍‌ ତାସ୍‌ ହଃଦାୟି ରେତି, ଗଟେକ୍‌ ଲକ୍‌କେ ନିଆ ଅୟ୍‌ଦ୍‌ ଆର୍‌ ଗଟ୍ ଲକ୍‌କେ ଚାଡି ଦିଆ ଅୟ୍‌ଦ୍‌ । 41 ଜଳେକ୍‌ ମାୟ୍‌ଜିମଃନ୍ ଜଃତାୟ୍‌ ରୁଚ୍‌ତି ରେତି, ଏକ୍ଲାକେ ନିଆ ଅୟ୍‌ଦ୍‌, ଆରେକ୍‌ ଏକ୍ଲାକେ ଚାଡି ଦିଆ ଅୟ୍‌ଦ୍‌ ।"

42 "ଇତାର୍‌ ଗିନେ ତୁମିମଃନ୍ ଜଃଗ୍ରାତ୍‌ ଅୟ୍‌ରିଆ, ବଃଲେକ୍‌ ତୁମାର୍‌ ମାପୁର୍ କୁୟି ଦିନ୍‌ ଆସେଦ୍‌ ସେରି ତୁମିମଃନ୍ ନଃଜାଣାସ୍‌ । 43 ✝ମଃତର୍‌ ତୁମିମଃନ୍ ଇରି ଜାଣିରିଆ ଜେ, କୁୟି ବେଳାୟ୍‌ ଚର୍‌ ଆସେଦ୍‌ ଇରି ଗଃରାର୍‌ ମୁଳିକା ଜାଣି ରିଲେକ୍‌, ସେ ଜଃଗ୍ରାତ୍‌ ଅୟ୍‌ରିଲା ହୁଣି ଆର୍‌ ଗଃରେ ସିନ୍ଦ୍ ମାରୁକ୍‌ ନଃଦିଲା ହୁଣି । 44 ତଃବାର୍‌ଗିନେ ତୁମିମଃନ୍ ହେଁ ଜଃଗ୍ରାତ୍‌ ଅୟ୍‌ରିଆ ବଃଲେକ୍‌ ଜୁୟି ବେଳାୟ୍‌ ତୁମିମଃନ୍ ମଃନେ ବାବି ନଃରିଆସ୍‌ ସେ ବେଳାୟ୍‌ ନଃରାର୍‌ ହୟିସି ଆସେଦ୍‌ ।"

45 "ତଃବେ ସାଉକାର୍‌ ତାର୍‌ ଲକ୍‌ମଃନ୍‌କେ ଟିକ୍‌ ବେଳାୟ୍‌ ହଃଳିବାତ୍ୟା ଦେଉଁକେ ଜାକେ ସେମଃନାର୍‌ ଉହ୍ରେ ବାଚ୍‌ଲା ଆଚେ, ଇବାନ୍ୟା ସଃତ୍‌ ଆର୍‌ ବୁଦିର୍‌ ଗତିଦଃଙ୍ଗ୍‌ଳା କେଏ ? 46 ସାଉକାର୍‌ ଆସି ତାର୍‌ ଜୁୟି ଗତିଦଃଙ୍ଗ୍‌ଳାକ୍‌ ସେରଃକମ୍‌ କାମ୍‌ କଃର୍ତି ରିଲାର୍‌ ଦଃକେଦ୍‌, ତଃବେ ସେ ଦଃଙ୍ଗ୍‌ଳାର୍‌ ବାୟ୍‌ଗ୍‌ । 47 ମୁଁୟ୍‌ ତୁମିମଃନ୍‌କେ ସଃତ୍‌ କଃଉଁଲେ, ସାଉକାର୍‌ ସେ ଦଃଙ୍ଗ୍‌ଳାକେ ତାର୍‌ ସଃବୁ ସଃମ୍ପତି ଉହ୍ରେ ଅଃଦିକାର୍‌ ଦଃୟ୍‌ଦ୍‌ । 48 ମଃତର୍‌ ଜଦି ସେ ଦୁସ୍ଟ୍‌ ଗତିଦଃଙ୍ଗ୍‌ଳା ମର୍‌ ସାଉକାର୍‌ ଆସ୍ତାର୍‌ ବିଲମ୍‌ କଃରେଦ୍‌ ବଃଲି ମଃନ୍‌ ବିତ୍ରେ କୟ୍‌, 49 ଅଃହ୍‌ଣାର୍‌ ସଃଙ୍ଗାର୍‌ ଗତିଦଃଙ୍ଗ୍‌ଳାମଃନ୍‌କ୍‌ ମାଡ୍ ମାରୁକ୍‌ ଦଃରେଦ୍‌ ଆର୍‌ ମଃଦୁଆ ମଃନାର୍‌ ସଃଙ୍ଗ୍ କାଉଆ ହିଉଆ କଃରେଦ୍‌, 50 ସେବାନ୍ୟା ଅୟିଲେକ୍ ଜୁୟି ଦିନ୍‌ ସେ ଜାଗି ନଃରେୟ୍‌, ଆର୍‌ ଜୁୟି ବେଳା ଗତିଦଃଙ୍ଗ୍‌ଳା ଜାଣି ନଃରେୟ୍‌, ସେ ଦିନ୍‌ ଆର୍‌ ସେ ବେଳାୟ୍‌ ତାର୍‌ ସାଉକାର୍‌ ଆସେଦ୍‌ । 51 ଆରେକ୍‌ ସାଉକାର୍‌ ସେ ଗତିଦଃଙ୍ଗ୍‌ଳାକ୍‌ କଃଣ୍ଡ୍ କଃଣ୍ଡ୍ କଃରି କାଟି ହେଟ୍‌କପଟ୍ୟା ମଃନାର୍‌ ସଃଙ୍ଗ୍ ବାଗ୍ ବାଟା ଟିକ୍‌ କଃରେଦ୍‌; ସେତି ସେ କାନ୍ଦି କାନ୍ଦି ଦାତ୍‌ ଚାବି ଅୟ୍‌ଦ୍‌ ।"