1 ✝ଏ ମାନାୟ୍‌ ତୁମିମଃନ୍ କାୟିରି ବିନ୍‌ ଲକ୍‌ମଃନାର୍‌ ବିଚାର୍‌ କଃରୁଲାସ୍‌ ? ତୁମି ଜୁୟ୍‌ଲକ୍‌ ଅୟିଲେକ୍ ହେଁ, ଇରି କଃର୍ତାର୍‌ ତୁମାର୍‌ ହାଁୟ୍‌ ଟିକ୍‌ ନୟ୍‌ । ବିନ୍‌ ଲକାର୍‌ ଦଃସ୍‌ ଦଃରି ତୁମି ଜଦି ସେରି କଃର୍ତି ରିଆସ୍‌, ସେତାର୍‌ ଗିନେ ତୁମି ନିଜ୍‌କେ ଦସି କଃରୁଲାସ୍‌ । 2 ଅଃମି ଜାଣ୍‌ଲୁ, ଇସ୍ୱର୍‌ ଇ ହର୍‍ କାମ୍‌ କଃର୍ତା ଲକ୍‌ମଃନାର୍‌ ସଃତ୍‌ ବିଚାର୍‌ କଃରେଦ୍‌ । 3 ଜୁୟି କଃରାପ୍‌ କାମ୍‌ ଗିନେ ତୁମି ବିନ୍‌ଲକ୍‌ମଃନ୍‌କେ ଦସି କଃରୁଲାସ୍‌, ସେରି ଜଦି ତୁମି ନିଜେ କଃର୍ତିରିଆସ୍‌ ତୁମି ଇସ୍ୱରାର୍‌ ବିଚାର୍‌ ତଃୟ୍‌ ହୁଣି ରଃକ୍ୟା ହାଉଁ ହାରାସ୍‌ ବଃଲି କାୟି ମଃନେ ବାବୁଲାସ୍‌ ? 4 ଅଃଉଁ ହାରେ ତୁମି ଇସ୍ୱରାର୍‌ ନଃସେର୍ତା ଦଃୟା ଆର୍‌ ସଃମ୍ବାଳ୍‌ତାର୍‌ ନଃଜାଣୁଲାସ୍‌ । ତୁମି ବାୟ୍‌ଦ୍‌ରେ ଜାଣି ଆଚାସ୍‌ ଜେ, ତୁମି ମଃନ୍‌ ବାଦ୍‌ଲାଉଆ ବଃଲି ଇସ୍ୱର୍‌ ଅଃଡେକ୍‌ ନିକ ଦଃୟା କଃରୁଲା । 5 ମଃତର୍‌ ତୁମି ଅଃଟୁଆ ଆର୍‌ ନଃବାଦୁଲ୍‌ତା ମଃନାର୍‌ । ସେତାକ୍‌ ସେସ୍‌ ଦିନାର୍‌ ନ୍ୟାୟ୍‌ବିଚାର୍‌ ବଃଳ୍‌ ଇସ୍ୱରାର୍‌ ରିସାର୍‌ ଲକ୍‌ ଅୟି ଅଃଦିକ୍‌ ଜଃବର୍‌ ଡଃଣ୍ଡ୍‌ ହାଉଆସ୍‌ । 6 କାୟିତାକ୍‌ ବଃଲେକ୍‌ ଇସ୍ୱର୍‌ ହଃତି ଲକେ ନିଜାର୍ ନିଜାର୍ କାମାର୍‌ ହଃଳ୍‌ ଦଃୟ୍‌ଦ୍‌ । 7 ଜୁୟି ଲକ୍‌ମଃନ୍‌ ଜଃଜ୍‌ମାନ୍, ମାନ୍‌ତି ଆର୍‌ ଅଃମ୍ବର୍‌ ଜିବନ୍ ହାଉତା ଆସାୟ୍‌ ସଃମ୍ବାଳି କଃରି ନିକ କାମ୍‌ କଃରି ଜାତି, ସେମଃନ୍‌କେ ଇସ୍ୱର୍‌ ଅଃମ୍ବର୍‌ ଜିବନ୍ ଦଃୟ୍‌ଦ୍‌ । 8 ମଃତର୍‌ ଜୁୟି ଲକ୍‌ମଃନ୍‌ ନିଜାର୍ ଗିନେ ଆଚ୍‌ତି, ସଃତ୍‌ ବାଟ୍‌କେ ଚାଡିକଃରି, ଅଃଦଃର୍ମ୍‌ ବାଟେ ଜାତି । ସେମଃନାର୍‌ ଉହ୍ରେ ଇସ୍ୱରାର୍‌ ଡଃଣ୍ଡ୍‌ ଗଃଟେଦ୍‌ । 9 ଜୁୟି ଲକ୍‌ମଃନ୍‌ ଦୁସ୍ଟ୍‌ କାମ୍‌ କଃରୁଲାୟ୍‌, ସେମଃନାର୍‌ ଗିନେ କଃସ୍ଟ ଆର୍‌ ବିସ୍‌ଜଃଳାର୍‌ ଦିନ୍‌ ଆସୁଲି । ହଃର୍ତୁ ଜିଉଦି ଆର୍‌ ହଃଚେ ଅଜିଉଦିମଃନାର୍‌ ଉହ୍ରେ ଦୁକ୍‌ କଃସ୍ଟ ଗଃଟେଦ୍‌ । 10 ମଃତର୍‌ ଜୁୟ୍‌ମଃନ୍‌ ସଃତ୍‌କାମ୍‌ କଃର୍ତି ସେମଃନ୍‌କେ ଇସ୍ୱର୍‌ ମାନ୍‌ତି, ଜଃଜ୍‌ମାନ୍ ଆର୍‌ ସୁସ୍ତା ଦଃୟ୍‌ଦ୍‌ । ହଃର୍ତୁ ଜିଉଦିମଃନ୍‌କେ ଆର୍‌ ହଃଚେ ଅଜିଉଦିମଃନ୍‌କେ ହେଁ । 11 କାୟିତାକ୍‌ବଃଲେକ୍‌ ଇସ୍ୱର୍‌ ସଃବ୍‌କେ ସଃମାନ୍‌ ବିଚାର୍‌ କଃରେଦ୍‌ ।

12 ବଃଲେକ୍‌ ଜଃତେକ୍‌ ଲକ୍‌ ମସାର୍‌ ବିଦି ନୟ୍‌ଲାର୍‌ ଅୟି ଆଚ୍‌ତି ସେ ମଃନ୍‌ ହେଁ ମସାର୍‌ ବିଦି ଚାଡ୍‌ଲା ତଃୟ୍‌ ନସ୍ଟ୍‌ ଅଃଉତି ଆର୍‌ ଜଃତେକ୍‌ ମସାର୍‌ ବିଦି ହାୟ୍‌ଁ ହାହ୍‌ କଃରି ମାତ୍‌ତି ସେମଃନ୍ ମସାର୍‌ ବିଦି ହଃର୍‌କାରେ ବିଚାର୍‌ କଃରା ଜାୟ୍‌ଦ୍‌ । 13 କାୟିତାକ୍‌ବଃଲେକ୍‌ ମସାର୍‌ ବିଦି ସୁଣୁମଃନ୍ ଇସ୍ୱରାର୍‌ ଚଃମେ ଦଃର୍ମି ନଃଉତି ମଃତର୍‌ ମସାର୍‌ ବିଦି ମାନୁମଃନ୍ ଦଃର୍ମି ଗଃଣା ଅଃଉତି । 14 ଅଜିଉଦିମଃନାର୍‌ ମସାର୍‌ ବିଦି ନାୟ୍‌, ମଃତର୍‌ ଜଦି ସେମଃନ୍ ମଃନାର୍‌ ଗିଆନ୍‌ ହଃର୍କାରେ ବିଦିର୍‌ ବିଦିବିଦାନ୍‌ ହଃର୍‌କାରେ କାମ୍‌ କଃର୍ତି, ସେରି ହଃକା ସେମଃନାର୍‌ ମସାର୍‌ ବିଦି ହର୍‍ । 15 ସେମଃନାର୍‌ କାମ୍‌ ଦଃୟି ଇରି ନିକକଃରି ଜାଣା ହଃଳୁଲି ଜେ, ବିଦିର୍‌ ରିତିବିଦି ସେମଃନାର୍‌ ମଃନ୍‌ବିତ୍ରେ ଲେକା ଅୟ୍‌କଃରି ଆଚେ । ଇତିର୍‌ ସଃତ୍‌ ସେମଃନାର୍‌ ବୁଦିକେ ଦଃୟି ହେଁ ଜାଣାହଃଳେଦ୍‌ ସଃତ୍‌ ଚିତା କଃଲାବଃଳ୍‌ ବୁଦିକେ ସେମଃନ୍‌କେ ନିର୍ଦସି କଃରେଦ୍‌, ଅସଃତ୍‌ ଚିତା କଃଲାବଃଳ୍‌ ଦସି କଃରେଦ୍‌ । 16 ଜୁୟି ଦିନ୍‌ ଇସ୍ୱର୍‌ ଜିସୁ କ୍ରିସ୍ଟ ଦଃୟି ମାନାୟ୍‌ମଃନ୍‌କାର୍‌ ଗୁପ୍ତ ବିସୟ୍‌ ସଃବୁ ବିଚାର୍‌ କଃରେଦ୍‌, ସେ ଦିନ୍‌ ମୁୟ୍‌ଁ ପର୍ଚାର୍‌ କଃରୁଲା ନିକ କବୁର୍ ହଃର୍କାରେ ଇ ସଃବୁ ଗଃଟେଦ୍‌ ।

17 ତୁମିମଃନ୍ ନିଜ୍‌କେ ଜିଉଦି ବଃଲି କଃଉଁଲାସ୍‌, ମସାର୍‌ ବିଦି ଉହ୍ରେ ବଃର୍ସା କଃରି ଆର୍‌ ଇସ୍ୱର୍‌ ସଃଙ୍ଗ୍ ନିଜାର୍ ମିସାଣ୍‌କେ ନଃୟ୍‌ ଗଃର୍ବ୍‌ କଃରୁଲାସ୍‌ । 18 ତୁମାର୍‌ ଗିନେ ଇସ୍ୱରାର୍‌ ଇଚା ଜାଣିଆଚାସ୍‌ ଆର୍‌ ମସାର୍‌ ବିଦି ତଃୟ୍‌ହୁଣି ସଃତ୍‌ ଆର୍‌ ଅସଃତ୍‌ ଗିଆନ୍‌ ହାୟ୍‌ଆଚାସ୍‌ । 19 ନିକକଃରି ତୁମିମଃନ୍ ଜାଣିଆଚାସ୍‌ ଜେ, ତୁମିମଃନ୍ କାଣାକେ ବାଟ୍‌ ଦଃକାଉତା ଲକ୍‌ ଅଃନ୍ଦାରେ ରେତା ଲକ୍‌ ମଃନାର୍‌ ଗିନେ ଉଜାଳ୍‌ ହର୍‍, 20 ନିର୍ବୁଦିଆ ଲକ୍‌ମଃନାର୍‌ ଉପ୍‌ଦେସ୍‌ ଦେତା ଲକ୍‌, ଅଗ୍ୟାନି ମଃନାର୍‌ ଗୁରୁ । ତୁମିମଃନାର୍‌ ବିସ୍ୱାସ୍‌ ଜେ, ବିଦିର୍‌ ତୁମିମଃନ୍ ହୁରାହୁରି ସଃତ୍‌ ଆର୍‌ ଗିଆନ୍‌ ଲାବ୍‌ କଃରିଆଚାସ୍‌ । 21 ତୁମିମଃନ୍ ହଃର୍‌କେ ସିକ୍ୟା ଦେଉଁଲାସ୍‌, ମଃତର୍‌ ନିଜେ କାୟ୍‌କଃରୁକ୍‌ ସିକ୍ୟା ହାଉଁ ନଃଚୁଲାସ୍‌ ? "ଚରି କଃରା ନାୟ୍‌ ବଃଲି ସିକ୍ୟା ଦଃୟି ନିଜେ ଚରି କଃରୁଲାସ୍‌ କି ? 22 ଦାରି କଃରା ନାୟ୍‌" ବଃଲି କୟ୍‌, ତୁମି ନିଜେ ଦାରି କଃରୁଲାସ୍‌ କି ? ତୁମିମଃନ୍ ମୁର୍ତି ହୁଜାକେ ଗିଣ୍ କଃରି ମନ୍ଦିର୍‌ ଚରୁଲାସ୍‌ କି ? 23 ତୁମିମଃନ୍ ଇସ୍ୱରାର୍‌ ବିଦି ହାୟ୍‌ଆଚୁ ବଃଲି ଗଃର୍ବ୍‌ କଃରୁଲାସ୍‌, ମଃତର୍‌ ସେରି ଅଃମାନ୍ୟା କଃରି ଇସ୍ୱର୍‌କେ ଲାଜ୍‌ କଃରାଉଁଲାସ୍‌ କି ? 24 ସାସ୍ତରେ ଲେକା ଆଚେ, "ତୁମିମଃନାର୍‌ ଗିନେ ଅଜିଉଦି ମଃନ୍‌କାର୍‌ ବିତ୍ରେ ଇସ୍ୱରାର୍‌ ନାଉ ଲିନ୍ଦା ହାଉଁଲି ।"

25 ଜଦି ତୁମି ମସାର୍‌ ବିଦି ମାନାସ୍‌ ତଃବେ ସଃତ୍‌କଃରି ସୁନତ୍‌ ତୁମାର୍‌ ହାଁୟ୍‌ ଲାବ୍‌ ଅୟ୍‌ଦ୍‌, ମଃତର୍‌ ଜଦି ମସାର୍‌ ବିଦି ନଃମାନାସ୍‌, ତୁମିମଃନ୍ ସୁନତ୍‌ ଅୟ୍‌ନଃରିଲା ଲକ୍‌ମଃନାର୍‌ ସଃଙ୍ଗ୍ ସଃମାନ୍‌ । 26 ଜଦି ସୁନତ୍‌ ଅୟ୍‌ନଃରିଲା ଗଟ୍ ଅଜିଉଦି ଲକ୍‌ ମସାର୍‌ ବିଦିବିଦାନ୍ ମାନ୍‌ତି ରଃୟ୍‌ଦ୍‌, ଇସ୍ୱର୍‌ ତାକ୍‌ ସୁନତ୍‌ ବଃଲି ଗଃଣ୍‌ତି ନଃକେରେ କି ? 27 ତଃବେ ଗଃଗାଳେ ସୁନତ୍‌ ଅୟ୍‌ନଃରିଲା ଜୁୟି ଅଜିଉଦିମଃନ୍‌ ମସାର୍‌ ବିଦି ମାନ୍‌ତି, ସେମଃନ୍ ତୁମିମଃନାର୍‌ ବିଚାର୍‌ କଃର୍ତି, ବଃଲେକ୍‌ ତୁମିମଃନ୍ ଗଃଗାଳେ ସୁନତ୍‌ ଅୟି ଲେକ୍‌ଲା ବିଦି ହାୟ୍‌ଁ ରିଲେକ୍‌ ହେଁ, ସେରି ଅଃମାନ୍ୟା କଃରୁଲାସ୍‌ । 28 ବଃଲେକ୍‌ ଗଃଗାଳେ ସୁନତ୍‌ ଅୟି ଲକ୍‌ ଦଃକାଉଣି ଜିଉଦି ବଃଲି କଃଉତା ଲକ୍‌ ସେ ସଃତ୍‌କଃରି ଜିଉଦି ନାୟ୍‌ । 29 ମଃତର୍‌ ଜେ ଆତ୍ମାୟ୍‌ ଜିଉଦି, ସେ ଅଃଉଁଲା ସଃତ୍‌ ଜିଉଦି । ସଃତ୍‌ ସୁନତ୍‌ ଅଃଉଁଲି ବିତ୍ରାର୍‌ କଃତା; ସେରି ଆତ୍ମିକ୍‌, ଲେକା ହଃର୍କାରେ ନୟ୍‌ । ଅଃନ୍‌କା ଲକ୍‌ ମାନାୟ୍‌ ମଃନାର୍‌ ତଃୟ୍‌ହୁଣି ଜଃଜ୍‌ମାନ୍ ନଃହାୟ୍‌, ମଃତର୍‌ ଇସ୍ୱରାର୍‌ ତଃୟ୍‌ହୁଣି ଜଃଜ୍‌ମାନ୍ ହାୟ୍‌ଦ୍‌ ।