1 ଏ ବାୟ୍‌ବେଣିମଃନ୍ ଅଃବେ ଜାୟ୍‌ରି କୟ୍‌ଦ୍‌ ବଃଲୁଲେ, ତୁମିମଃନ୍ ସେରି ବୁଜୁକେ ହାରାସ୍‌, ବଃଲେକ୍‌ ତୁମିମଃନ୍ "ମସାର୍‌ ବିଦି" ବିସୟେ ଜାଣିଆଚାସ୍‌ । ମାନାୟ୍‌ ଜୁୟି ହଃତେକ୍‌ ଜିବନ୍‌ ରଃୟ୍‌ଦ୍‌ ସେ ହଃତେକ୍‌ ମସାର୍‌ ବିଦି ତଃଳେ ରଃୟ୍‌ଦ୍‌ । 2 ଅଃଣ୍ଡ୍ରା ଜିବନ୍‌ ରେତା ହଃତେକ୍‌ ତାର୍‌ ଡକୁର୍ସି ତାର୍‌ ସଃଙ୍ଗ୍ ବିବା ବାନ୍ଦୁଣେ ବାନ୍ଦି ଅୟି ରଃୟ୍‌ଦ୍‌, ମଃତର୍‌ ଅଃଣ୍ଡ୍ରା ମଃରି ଗଃଲେକ୍‌ ମାୟ୍‌ଜି ଇ ବିଦି ତଃୟ୍‌ହୁଣି ମୁକ୍ଳେଦ୍‌ । 3 ଅଃଣ୍ଡ୍ରା ଜିବନ୍‌ ରେଉଁ ରେଉଁ, ଡକୁର୍ସି ଜଦି ବିନ୍‌ ଅଃଣ୍ଡ୍ରାକେ ବିବା ଅୟ୍‌ଦ୍‌, ତାକେ ଦାରିଆଣି ବଃଲି କଃଉଆ ଅୟ୍‌ଦ୍‌; ମଃତର୍‌ ଅଃଣ୍ଡ୍ରା ଜଦି ମଃରେଦ୍‌, ତଃବେ ମାୟ୍‌ଜି ମସାର୍‌ ବିଦି ତଃୟ୍‌ହୁଣି ମୁକ୍ତି ଅୟ୍‌ଦ୍‌, ଆର୍‌ ସେ ବିନ୍‌ ଅଃଣ୍ଡ୍ରାକେ ବିବା ଅୟିଲେକ୍, ସେ ଦାରିଆଣି ନୟ୍‌ । 4 ଏ ମର୍‌ ବାୟ୍‌ବେଣିମଃନ୍ ତୁମିମଃନାର୍‌ ହେଁ ଟିକ୍‌ ସେହର୍‌ । ତୁମିମଃନ୍ ବାପ୍ତିସମ୍‌ ଦଃୟି କ୍ରିସ୍ଟର୍‌ ଗଃଗାଳ୍‌ ସଃଙ୍ଗ୍ ମଃର୍ନ୍‌ ବୟ୍‌ଗ୍‌ କଃରି, ତାର୍‌ ଉଟ୍‌ଲାତଃୟ୍‌ ହେଁ ଅଃଦିକାରି ଅୟି ଆଚାସ୍‌ ଆର୍‌ ଅଃବେ ତୁମିମଃନ୍ ଇସ୍ୱରାର୍‌ ନିକ ଦଃଙ୍ଗ୍‌ଳା ଅୟି, ବିଦିର୍‌ ଗିନେ ତୁମିମଃନ୍ ମଃରି ଆଚାସ୍‌ । 5 କାୟିତାକ୍‌ବଃଲେକ୍‌ ଜଃଡେବଃଳ୍‌ ଅଃମିମଃନ୍‌ ଗଃଗାଳାର୍‌ ତଃଳେ ରିଲୁ ସଃଡେବଃଳ୍‌ ବିଦି ତଃୟ୍‌ ହାହ୍‌ ଇଚା ସଃବୁ ଅଃମିମଃନାର୍‌ ସଃର୍ନେ ଗଃଗାଳ୍‌ ବିତ୍ରେ ମଃର୍ନାର୍‌ ଗିନେ ହଃଳ୍‌ ଉବ୍‌ଜାଉଁକ୍‌ କାମ୍‌ କଃର୍ତି ରିଲୁ । 6 ଅଃବେ ବିଦିଏ ହୁଣି ମୁକ୍ତି ହାୟ୍‌ଁ ଆଚୁ, ବଃଲେକ୍‌ ଜୁୟ୍‌ରି ଦିନେକ୍‌ ଅଃମିକ୍‌ ବାନ୍ଦି କଃରି ରଃକିରିଲି, ସେ ତଃୟ୍‌ହୁଣି ଅଃମି ଅଃବେ ମଃରି ଆଚୁ । ଅଃମି ହୁର୍ବାର୍‌ ହର୍‍ ଲେକାର୍‌ ବିଦିର୍‌ ସେବା ନଃକେରୁ, ପବିତ୍ର ଆତ୍ମା ଦଃକାୟ୍‌ଲା ବାଟେ ଅଃବେ ଅଃମି ଜଃଉଁଲୁ ।

7 ତଃବେ ଅଃମିମଃନ୍‌ କାୟିରି କଃଉଆ ? ବିଦି କାୟି ହାହ୍‌ ? ସେରି କଃବେ ହେଁ ନଃଉଅ । ଗଟ୍‌ବାଟ୍‌ ହାହ୍‌ କାୟିରି, ସେରି ବିଦି ଚାଡି ମୁୟ୍‌ଁ ନଃଜାଣ୍‌ଲେ ହୁଣି, କାୟିତାକ୍‌ବଃଲେକ୍‌ ଲଃବ୍‌ କଃରା ନାୟ୍‌, ବିଦି ଇରି କୟ୍‌ ନଃରିଲେକ୍‌ ଲଃବ୍‌ କାୟିରି ସେରି ମୁୟ୍‌ଁ ନଃଜାଣ୍‌ଲେ ହୁଣି । 8 ମଃତର୍‌ ହାହ୍‌ ବେଳ୍‌ ଦଃକି ବିଦି ଗିନେ ମର୍‌ ତଃୟ୍‌ ସଃବୁ ହଃର୍କାର୍‌ ଲଃବ୍‌ ଜଃଲମ୍‌ କଃଲି; କାୟିତାକ୍‌ବଃଲେକ୍‌ ବିଦି ଚାଡି ହାହ୍‌ ମଃଲାର୍‌ । 9 ଆର୍‌, ଦିନେକ୍‌ ମୁୟ୍‌ଁ ବିନା ବିଦିଏ ବଚ୍‌ତିରିଲେ ମଃତର୍‌ ମସାର୍‌ ବିଦି ଆୟ୍‌ଲାକ୍‌ ହାହ୍‌ ଜିବନ୍ ଅୟ୍‌ଲି, ଆରେକ୍‌ ମୁୟ୍‌ଁ ମଃଲେ । 10 ସେତାକ୍‌ ଜିବନ୍ ଦେଉଁକେ ଜୁୟି ଆଦେସ୍‌ ମର୍‌ ଗିନେ ଆତ୍ମିକ୍‌ ମଃର୍ନ୍‌ ବିସୟ୍‌ ବଃଲି ସେରି ଜାଣା ଗଃଲି । 11 ବଃଲେକ୍‌ ହାହ୍‌ ବେଳ୍‌ ଦଃକି ବିଦି ମକେ ଟକ୍‌ଲି, ଆର୍‌ ମକେ ଅଃତ୍ୟା କଃଲି ।

12 ମସାର୍‌ ବିଦି ପବିତ୍ର; ତାର୍‌ ବଲ୍‌ ସଃବୁ ପବିତ୍ର, ଟିକ୍‌ ଆର୍‌ ନିକ । 13 ତଃନ୍‌ ଅୟିଲେକ୍ ଜୁୟ୍‌ରି ନିକ ସେରି କି ମର୍‌ ଗିନେ ମଃର୍ନାର୍‌ ବିସୟ୍‌ ଅୟ୍‌ରିଲି ? ସେରି କଃବେ ହେଁ ନଃଉଅ । ହାହ୍‌ ହଃକା ସେରି କଃଲି, ନିକ ବିଦିକେ ବେବାର୍‌ କଃରି ହାହ୍‌ ମର୍‌ ମଃର୍ନ୍‌ ଗଃଟାୟ୍‌ଲି । ସେତାର୍‌ ଗିନେ ହାହାର୍‌ ଟିକ୍‌ ରୁହ୍‌ ଜାଣା ହଃଳ୍‌ଲି । ତଃବେ ବିଦିର୍‌ ଦଃୟି ହାହାର୍‌ ବଃଡେ ବୟ୍‌ଙ୍କାର୍‌ ବିସୟ୍‌ ଜାଣାହଃଳ୍‌ଲି ।

14 ଅଃମିମଃନ୍‌ ଜାଣୁ, ବିଦି ଆତ୍ମିକ୍‌ । ମଃତର୍‌ ମର୍‌ ମଃର୍ତା ଗଃଗାଳ୍‌ ହାହାର୍‌ ଗତିଦଃଙ୍ଗ୍‌ଳା । 15 ✝ମୁୟ୍‌ଁ ଜାୟ୍‌ରି କଃରିନ୍ଦ୍‌ ସେରି ନଃଜାଣି, ମୁୟ୍‌ଁ ଜାୟ୍‌ରି ଇଚା କଃରିନ୍ଦ୍‌ ସେରି ନଃକେରି, ମଃତର୍‌ ମୁୟ୍‌ଁ ଜାୟ୍‌ରି ଗିଣ୍ କଃରିନ୍ଦ୍‌ ସେରି ହଃକା କଃରିନ୍ଦ୍‌ । 16 ମଃତର୍‌ ଜାୟ୍‌ରି ମୁୟ୍‌ଁ ଇଚା ନଃକେରି ସେରି ଜଦି କଃରିନ୍ଦ୍‌ ତଃବେ ବିଦି ନିକ ବଃଲି ସେରି ମୁୟ୍‌ଁ ମାନୁଲେ । 17 ଇତାକ୍‌ ମୁୟ୍‌ଁ ଆର୍‌ ସେରି ନଃକେରି ମଃତର୍‌ ମର୍‌ ତଃୟ୍‌ ରେତା ହାହ୍‌ ସେରି କଃରୁଲି । 18 ଇରି ମୁୟ୍‌ଁ ଜାଣି ମର୍‌ ତଃୟ୍‌, ଗଃଗାଳେ ଜୁୟ୍‌ରି ହେଁ ନିକ ବିସୟ୍‌ ବାସା ନଃକେରେ, ଜଃନ୍ ମୁୟ୍‌ଁ ଇଚା କଃରୁ ହାରୁଲେ, ମଃତର୍‌ ଜାୟ୍‌ରି ନିକ ସେରି କଃରୁକେ ମର୍‌ ବଃଳ୍‌ ନାୟ୍‌ । 19 ବଃଲେକ୍‌ ଜୁୟି ନିକ କାମ୍‌ କଃରୁକେ ମୁୟ୍‌ଁ ଇଚା କଃରିନ୍ଦ୍‌, ସେରି ନଃକେରି, ମଃତର୍‌ ଜୁୟି କଃରାପ୍‌ କାମ୍‌ କଃରୁକେ ମୁୟ୍‌ଁ ଇଚା ନଃକେରି ସେରି କଃରୁଲେ । 20 ମଃତର୍‌ ଜୁୟ୍‌ରି ମୁୟ୍‌ଁ ଇଚା ନଃକେରି, ସେରି ଜଦି କଃରିନ୍ଦ୍‌, ତଃବେ ମୁୟ୍‌ଁ ନିଜେ ସେରି ନଃକେରୁଲେ, ମଃତର୍‌ ମର୍‌ ତଃୟ୍‌ ବାସା କଃର୍ତା ହାହ୍‌ ସେରି କଃରୁଲି ।

21 ଇରି ମର୍‌ ବିତ୍ରେ କାମ୍‌ କଃରୁଲା ଗଟେକ୍‌ ବିଦି, ମୁୟ୍‌ଁ ଦଃକୁଲେ, ଜଃଡେବଃଳ୍‌ ନିକ କାମ୍‌ କଃରୁକେ ମଃନ୍‌ କଃରୁଲେ, ସେରି ନଃକେରି ଜୁୟ୍‌ରି କଃରାବ୍‌ରି ସେରି ହଃକା କଃରୁଲେ । 22 ଇସ୍ୱରାର୍‌ ବିଦି ମାନୁକେ ମର୍‌ ମଃନ୍‌ । 23 ମଃତର୍‌ ମୁୟ୍‌ଁ ମର୍‌ ଗଃଗାଳେ ଗଟେକ୍‌ ବିନ୍‌ ବିଦି ଦଃକୁଲେ, ସେରି ମର୍‌ ମଃନାର୍‌ ବିଦି ବିରୁଦେ ଜୁଜ୍‌ କଃରେଦ୍‌ ଆର୍‌ ମର୍‌ ସଃବୁ ଗଃଗାଳେ ଜୁୟି ହାହାର୍‌ ବିଦି ଆଚେ ମକେ ସେତି ବାନ୍ଦେଦ୍‌ । 24 କଃଡେକ୍‌ ବାୟ୍‌ଗ୍‌ ନୟ୍‌ଲାର୍‌ ମୁୟ୍‌ଁ ! ମକ୍‌ ଇ ମଃର୍ତା ଗଃଗାଳେ ହୁଣି କେଏ ମୁକ୍ତି କଃରେଦ୍‌ ? 25 ଇସ୍ୱରାର୍‌ ଦନ୍ୟବାଦ୍‌, ମାପୁର୍ ଜିସୁ କ୍ରିସ୍ଟର୍‌ ଦଃୟି ଇରି ସେ ସାଦୁନ୍‌ କଃରିଆଚେ । ତଃବେ ଇରି ଅଃଉଁଲି ମର୍‌ ଅବୁସ୍ତା । ଇସ୍ୱରାର୍‌ ବିଦି ଅଃବ୍‌କା ମୁୟ୍‌ ମର୍‌ ମଃନେ ମାନୁ ହାରି । ମଃତର୍‌ ମର୍‌ ମାନାୟ୍‌ ଗୁଣ୍‌ ମକେ ହାହାର୍‌ ସେବାକାରି ଅଃଉଁକେ ବଃଳ୍‌ମାଡ୍‌ କଃରୁଲି ।