सरदीस सहरेन मंडळी वाटे खुस खबर
1 सरदीसेन मंडळ्यान सरग काहवाळ्या काजे,
जेरे धड़े भगवानेन सात आत्मा ने सात तारा छे, असु कहें की मे तारा कामे काजे जाणो, की तु जीवलु ते कहवाये, बाकुन ए मरला! 2 जागतु हय जां, ने तीनु चीजेक जी बाकी रवली छे, ने जे सरनेत वाळी छे, तीनुक काठा कर; काहाकी मे तारा काहना बी काम काजे भगवान धड़े पुरो की पुरो नी देख्यु। 3 तेरेमां हेर कर, की तु काहनी बी रीती सी सीक लेदलु ने सामळ्ळु हतलु, ने तेरेमां बणीन रव, ने मन फेरव; ने कदी तु जागतु नी रवसी ती मे चुट्टान तसु आय जायस ने तु कदी नी जाण सक्सी, की मे काहनी टेम पर तार पर आय पड़ीस। 4 बाकुन अतरी संय वात छे की, सरदीस मां तारेन चां काहनाक असा माणसे छे, जे आपसा पुथल्या काजे चुखला राख्या, चे धवळा पुथल्या पेहरीन मारे साते फीरसे, काहाकी चे हेरे लायक छे। 5 जे जीत जाय, तीनाक हेरेन तसोत धवळा पुथल्या पेहरावसे, ने मे तेरो नाव जीवनेन किताप मां सी काहनी बी रीती सी नी काटो, बाकुन तेरो नाव मारु बास भगवान ने तेरा सरग काहवाळ्या अगळ मान लीस।
6 तेरा कान्टा हय, हयु सामळी लेय की आत्मा मंडळ्या सी काय कहें।
फीलादेलफीया सहरेन मंडळी वाटे खुस खबर
7 फीलदीलफीयान मंडळ्यान सरग काहवाळ्याक काजे असु लिख:
"जुत चुखलु ने छाचलु छे, ने जुत दावुदेन कुची राखे, तीना खुल्ला काजे कुय बी बंद नी कर सके ने बंद करला काजे कुय बी खुल नी सके, हयु असु कहें, 8 मे तारा काम काजे जाणो। देख, मे तारे अगळ एक बारनो उगाड़ी र्यु, तीनाक कुय बी बन्द नी कर सके; तारी ताकत ईतरीक सी ते छे, तेबी मारा बुलेन पाळन कर्यु, ने मारा नावेन नीकारु नी कर्यु।" 9 देख, मे भुतड़ान तीनी मंडळी काजे तार बस मां कर दीस जे यहुदी बणीन रहे, बाकुन हय नी, ने झुट बुले मे असु करीस, की चे आवीन तारे पाय मां आंदसे, ने ज जाण लेसे, की मे तारे सी परम राखो। 10 तु मारा गमेन बुले काजे धरीन उबु रयु, तेरेमां मे बी तुसेक आफतेन टेम सी बचाड़ीस, जे धरती पर रहणे वाळान पारखणे वाटे आखी दुनीया पर आवणेवाळी छे। 11 मे मामारुस आवणेवाळु छे; जो काय तारे धड़े छे तीनाक धरी राख, काहाकी तारा जीतला ईनाम काजे कुय बी हापकी नी सके। 12 जे जीत जाय, तीनाक मे मारा भगवानेन घर मां एक खाम्बु बणावीस, ने हयु पछु कदी बाहर नी नीकळसे; ने मारा भगवानेन नाव, ने भगवानेन सहर मतलब नवला यरुसलेमेन नाव, ज मारा भगवानेन धड़े सी सरग पर सी उतरनेवाळु छे ने मारो नवलो नाव तीना पर लिखीस।
13 तेरेमां तेरा कान्टा हय, हयु सामळी लेय की आत्मा मंडळ्या सी काय कहें।
लोदीकीया सहरेन मंडळी वाटे खुस खबर
14 लोदीकीयान मंडळीन काहवाळ्या काजे असो लिख:
"जु आमीन, ने भुरसा वाळा, ने छाचला गवा छे, ने भगवानेन घड़नेन खास वजे छे, हयु असु कहें। 15 मे तारा कामे काजे जाणो की तु नी ते सेळ्ळु छे ने नी तातु; भलो रवतो की तु सेळ्ळु नीते तातु रवतु। 16 असु करीन तु फळ्कु छे, ने नी सेळ्ळु छे ने नी तातु, मे तुसे मारा मुंहडाम सी उंगेळने पर छे। 17 तु असु कहें, की मे मातलु हय गुयु, ने मेसेक काय चीजेन कमी नीही, ने असु नी जाणतु, की तु नी भाग वाळु ने फालतु ने गरीब ने आंधळु, ने नांगरलु छे। 18 तेरेमां मे तुसे सला दम, की आकठा मां तावलो सनो मार सी मुल ले, काहाकी मातलु हय जाय; ने धवळा पुथल्या ली ले की पेहरीन तुसे आपसा नांगरला सी लाजे नी पड़े; ने आपसा डुळा मां लागाड़ने करीन सुरमु ले काहाकी तु देखणे लाग जाय। 19 मे जीनु-जीनु सी परम राखो, तीनु आखा काजे लड़ो ने ठुको, तेरेमां तीयार हय जां, ने पाप सी मन फेरव। 20 देख, मे बारना मां उबु रय्न खटो-खटो कराड़ो; कदी काहनुक मारो बुली सामळीन बारनो खुलसे, ती मे तेरे धड़े माहीं आय्न तेरे भेळु खाणो खाय्स, ने चु मारे साते खासे। 21 जु जीत जाय, मे तीनाक मारे साते मारे राजगादी पर बठाड़ीस, जसु मे बी जीती गुयु ने मारा बास भगवान भेळु तेरे राजगादी पर बठ गुयु।
22 "तेरेमां तेरा कान्टा छे चे सामळी लेय की आत्मा मंडळ्या सी काय कहें।"