2 कदी नी हामु जे पाप वाटे मर गुयला छे ती पाप मां कसा जीवसुन? 3 काय तुहुंं नी जाणु काय की ईसु मसीन ज बपतीस्‌मा* आपणु आखा काजे जड़लो छे चो बपतीस्‌मा तेरे जाण देनेन बपतीस्‌मा छे। 4 अतरामा आपणु ईसुन मुतेन बपतीस्‌मा लीन ईसु साते तेरेमां गाड़ाय गुया की जसों ईसु मसी बासेन सेक-सींगारेन ताकत साते मरलाम सी जीवतु हय्‌न बठु हय गुयला छे। तसात आपणु बी एक नवली जीवन जीवजे।

5 काहाकी कदी आपणु हेरे मरनेन तसात हेरे साते एक हय गुयला छे, ती छाचलीन हीनाक मरलाम सी जीवतु हवणेन तसात एक हय जासुन। 6 आपणुक मालम छे की आपणी जुन्‌डलो जीवन ईसु साते कुरुस पर चड़ाय गुयलो हतलो काहाकी पाप सी भरायलो आपणो डील खत्‌तम हय जाय ने आपणु अगा वाटे पापेन गुलाम नी बणजे। 7 काहाकी जु मर गुयलु छे, चु पापेन गुलामी सी छुटीन धरमी बण गुयलु छे।