1 यहूदिया कर राजा यहोयाकीम के सासन के तीसर साल हे, बेबीलोन के राजा नबूकदनेस्सर आयके यरुसलेम के घेर लेथै।✝ 2 तब भगवान यहूदा के राजा यहोयाकीम के भगवान के भवन कइन भडवन सहित ओखर हाथ हे कर दइस, अउ उके उन भडवन के सिनार देस हे अपन देउता के मंदिर हे लइ जायके, अपन देउता के भंडार हे धर दइस।

3 तब राजा अपन खास अधिकारी असपनज के आदेस देथै, कि इस्राएली राज कुल मसे अउ सम्मानित परवार मसे बन्दी करे गय सग्यान डउकन के चुन के लइ आबा।✝ 4 ऊ सुन्दर होय के चाही, दिमाक हे होसियार होय के चाही, निक्खा पढे लिखे होय के चाही, अउ हरबी सीखै बाले होय के चाही, अउ देह लग हट्टा-कट्टा होय के चाही, ताकि ऊ राजा कर दरबार हे सेबा करै के ओग होय, कसदी उनही बेबीलोन कर बोली अउ पवितर किताब कर ग्यान दे। 5 राजकीय खाना पीना अंगूर कर रस हर रोज दय जाय, हइ मेर तीन साल तक उनके सिखाउत रथै, तब ओखर बाद उनके राजा कर आगू हाजिर करे जाय। 6 जउन चुने गय रथै, उन मसे कुछ यहूदा कर बिरादरी कर रथै, दानिय्येल, हनन्याह, मीसाएल, अउ अजरयाह नाम के रथै। 7 खास अधिकारी असपनज उनखर दूसर नाम धरथै, दानिय्येल कर नाम बेलतसस्सर, हनन्याह कर सदरक, मीसाएल कर मेसक अउ अजरयाह कर नाम अबेदनगो रखथै।

8 पय दानिय्येल अपन मन हे ठान लइस कि ऊ राजा के खाना खायके अउ ओखर अंगूर कर रस पीय के अपवितर झइ हो, इहैनिता ऊ खास अधिकारी लग बिनती करिस अपवितर झइ होय के पडै। 9 भगवान खास अधिकारी कर हिरदय हे दानिय्येल के परति किरपा अउ दया भर दइस।✝ 10 खास अधिकारी दानिय्येल लग कथै, "मै अपन मालिक राजा लग डरथो, काखे तुम्हर खाय-पीय के उहै ठहराय हबै, कहुं असना झइ होय कि ऊ तोर मुंह तोर संग के जबान लग उतरे हुइस अउ निरास देखै अउ तुम मोर मूंड राजा के जसना संकट हे डारै।"

11 तब दानिय्येल ऊ चउकीदार लग, जेही खास अधिकारी दानिय्येल, हनन्याह, मीसाएल, अउ अजरयाह कर उप्पर देखरेख करै के निता ठहराय रथै, ओखर लग कथै। 12 "मै तोर लग बिनती करथों, कि अपन हरवाहन के दस रोज तक जांच, हमर खाय के निता सब्जी भाजी अउ पीय के निता पानी दय जाय। 13 फेर दस रोज कर बाद हमर मुंह के अउ जउन जबान राजा कर खाना खात हबै, उनखर मुंह के देखथै अउ जसना तोके देख पडथै ओखरै मेर अपन हरवाहन लग बेउहार कर।"

14 उनखर हइ बिनती ऊ मान लइस, अउ दस रोज तक उनही जांचत परखत रथै। 15 दस रोज के बाद ऊ उन सग्गियान लग जादा निक्खा अउ हट्टा-कट्टा दिखाई दइन, जउन राजकीय खाना खथै। 16 तब ऊ मुखिया उनखर भोजन अउ उनखर पीय के निता ठहराय हुइस अंगूर कर रस दुनो छंडाय के, उनखर सब्जी भाजी दय लगिस।

17 भगवान उन चारों सग्यान टोरवन के सगलू किताबन अउ सब मेर के ग्यान हे दिमाक हे अउ चतुराई दइस, अउ दानिय्येल सब मेर के दरसन अउ सपना के मतलब के ग्यानी हुइ गइस।

18 तब तीन साल के गुजरै के बाद जउन नबूकदनेस्सर राजा सग्यानन लग मिलै के निता आदेस दइ के ठहराय रथै, ओतकै साल गुजरै के बाद खास अधिकारी सग्यानन के राजा कर आगू ठाड करिस। 19 राजा कर सेबा कर निता राजदरबार कर निता चुने गइन, दानिय्येल, हनन्याह, मीसाएल, अउ अजरयाह, के बरोबर कउनो नेहको ठहरिन, इहैनिता ऊ राजा के आगू हाजिर रहै लगिन। 20 दिमाक अउ समझ के बारे हे राजा उनखर लग जेतका सबाल करिस, ऊ राजा के सगलू राज के सब जोतसी, अउ तांतरिक लग दस गुना निपुन पाय गइन। 21 दानिय्येल साही दरबार हे तब तक रहिस, जब तक फारस कर राजा कुस्रू बेबीलोनियन लग जीत हासिल नेहको कर लइस।