1 दारा मादी, जउन छयर्स* के टोरवा रथै, बेबीलोन राज हे राज करथै। 2 दारा राजा के पहिले साल हे दानिय्येल कुछ किताब पढथै, उन किताब हे मै देखथों, कि भगवान इरमियाह नबी के हइ गुठे हबै, कि यरुसलेम के फेरै निरमाड केतका साल बाद होही, भगवान कहे रथै, एखर पहिले कि यरुसलेम फेरै बसै सत्तर साल गुजर जही।✝ 3 फेर मै अपन मालिक भगवान के पल्ला मुडो अउ ओखर लग बिनती करके मदत करेव, मै उपास अउ असना बन्डी पहिर लयों जेखर हइ लगै कि मै दुखी हबो, मै अपन मूंड हे राख डार लयों। 4 मै अपन भगवान लग हइ बिनती करेव अउ अपन पाप के मानो,

हे परभु तै महान अउ भययोग भगवान हबस, तै उनखर संग माया अउ दयालु के बचन के निभाथस, जउन मनसे तोर आदेस के मानथै, उनखर संग तै अपन बचन निभाथस।

5 पय हे भगवान हम पापी हवन, हम बुरा करे हवन, कुकरम करे हवन, बिदरोह करे हवन, तोर निस्पछ नियाव अउ तोर आदेस लग हम दुरिहां भटक गय हवन। 6 हम तोर सेबक नबी, के संदेस के नेहको सुनेन, उन हमर राजा सासक अउ हमर सियान के अउ भुंइ के सगलू मनसे के तोर नाम लग संदेस सुनाय रथन। 7 हे परभु तै नेक हबस, पय आज हम बोहत लजाय हवन, यहूदिया के मनसे यरुसलेम के रहैबाले अउ सगलू इस्राएलियन जउन लिघ्घो अउ दुरिहां हबै, हमर बिस्वासघात के कारन तै उनही सब देसन हे तितिर-बितिर कर दय हबै। 8 हे यहोबा हम सब झन अउ राजा, मुखिया अउ सियानन समेत बिना सरमाय तोर बिरुध्द बेउहार अउ पाप करे हबन। 9 हे यहोबा हम तोर परति बिदरोह करे हबन, तउमा सिबाय तहिन दयालु अउ छमा देय बाले हबस। 10 हम हमर भगवान के बातन के नेहको माने हवन या उन नियम के पालन नेहको करे हवन, जेही उन अपन हरवाह आगू कर बात गुठे बालेन के दवारा हमके दय रथै। 11 सगलू इस्राएली तोर नियम के उलंघन करे हबै, अउ तोर बात के मानै के बदले ओखर लग दुरिहां हट गय हबै, इहैनिता भगवान के हरवाह मूसा के नियम हे लिखे हर सराप ठहराय गइस, सजा हमर उप्पर उडेल दय गय हबै, काखे हम तोर बिरोध पाप करे हवन। 12 तै हमर उप्पर बडी समस्या लायके हमर अउ हमर सासक के बिरुध्द गुठे गइस बचन के तै पूर करे हबस, बादर के तरी सगलू भुंइ हे असना समस्या अउ कहुं नेहको पडिस, जसना समस्या यरुसलेम हे पडे हबै। 13 जसना कि मूसा के नियम हे लिखे हबै, हइ सगलू समस्या हमर हे आय पडे हबै, फेर हम अभिन्नो भगवान लग मदत नेहको मांगे हवन, हम अबे पाप करै के नेहको छांडे हवन, हे भगवान तोर सत्य हे हम धियान नेहको देथन। 14 पय हे परभु तै हमर निता समस्या तइयार रखे हबस, अउ हमर हे डाल दय हबस, काखे तै जउन कुछ करथस ऊ नेक काम करथस, ओखर सगलू काम नियाव पूर होथै, हम ओखर आरो के सुने हवन, इहैनिता हमर हे हइ समस्या आइस।

15 हे हमर परभु भगवान आजो तोर सक्ति अबे तक बने हर हबै, अउ हम मिस्र लग बाहिर निकार लाइस, हे भगवान हम पाप करे हवन, हम दुस्टता करे हवन। 16 हे परभु तै बीते टेम हे हमर सहायता करे, इहैनिता अब यरुसलेम लग आगू गुस्सा झइ होय, हइ तोर सहर हबै, तोर पवितर मन्दिर हबै, हमर पाप अउ हमर सियानन कर दवारा करे गय बुराई के कारन, परोसी देसन के सगलू मनसे यरुसलेम अउ तोर मनसेन के बेकार समझथै। 17 हे हमर भगवान अपन हरवाह कर पराथना अउ गिडगिडाना के सुन, अपन मन्दिर कर जउन नास हुइ गय हबै, फेरै लग तइयार कर, ताकि सगलू मनसे जान सकै कि तहिन भगवान हबस। 18 हे हमर भगवान मोर बिनती के तरफ कान लगाय के सुन अउ आंखी उघारके उजडे हर ऊ सहर के देख जउन तोर नाम लग जाने जथै, हम बोहत निक्खा काम करे हबन इहैनिता नेहको, पय तोर बडी दया हबै। 19 हे परभु हमर सुन, हे परभु हमके छमा कर, हे परभु हमर हे धियान दे, अउ जउन करै के हबै ऊ कर, देरी झइ कर, ताकि सबझन जान सकै कि तहिन भगवान हबस, हइ सहर अउ हइ मनसे तोरेन हबै।

20 मै अपन पाप अउ अपन इस्राएली मनसेन के पाप के मानथै अउ बिनती करथै, अउ मोर भगवान के आगू ओखर पवितर मन्दिर के निता बिनती करथों। 21 जब मै बिनती करत रथों, तब जिब्राएल जेही मै पहिलेन सपना हे देख चुके रथों, सांझ कर बलिदान कर टेम तेज रपतार लग मोर लिघ्घो आथै।✝ 22 ऊ ओखर लग कथै, हे दानिय्येल मै तोके आगू कर बातन कर समझ अउ दिमाक देय के निता आय हबो। 23 जब तै भगवान लग बिनती करै के सुरु करे, तब ऊ जबाब दइस, ऊ तोर लग माया करथै इहैनिता मै हइ जबाब देय आय हबो, अब मै दरसन कर मतलब तोके गुठेथों, ता तै पूर धियान दे।

24 भगवान तोर मनसेन अउ तोर पवितर सहर के पाप अउ बुराई लग छंडामै कर निता सात गुना अउ सत्तर साल कर टेम ठहराय हबै, पाप के छमा करे जही अउ हरमेसा कर नियाव ठहराही, ताकि दरसन आगू कर बात सही हुइ जाय अउ पवितर मन्दिर के फेरै उदघाटन करे जही। 25 इहैनिता हइ जान अउ समझ लेया, यरुसलेम के फेर लग स्थापित अउ फेरै बनामै के निता चुने हर परधान* मनसे सासक के आमै तक सात गुना अउ बासठ साल के बीतै लग, चउक अउ खाई सहित ऊ सहर कस्ट के टेम हे फेरै लग बनाय जही। 26 सात गुना अउ बासठ साल कर बाद अक्ठी दूसर चुने हर परधान होही, जउन बेकसूर मारे जही अउ ओखर हाथ हे कुछु नेहको रही, ओखर सुपाही सहर अउ पवितर जिघा के खन्डर बनाय दय जही, ओखर आखरी बाढ कर जसना होही अउ आखरी तक युध्द होत रही, बिनास ठहराय जाय चुके हबै। 27 ऊ परधान सात सालन कर निता बोहत मजबूत टीमा बांधही, पय आधा टेम के बीतै हे ऊ पसुबलि अउ आगबलि के बंद करहीं, अउ ऊ मन्दिर हे ऊंच जिघा हे उजाडबाले घ्रनित चीज ठहराही, जब तक ऊ रही, तब तक उहां रखै बाले ऊ आखरी के न देख ले, जउन भगवान ओखर निता रखे हबै।