दानि 1

चारठे सग्यान नबूकदनेस्सर राजा कर आगू

1 यहूदिया कर राजा यहोयाकीम के सासन के तीसर साल हे, बेबीलोन के राजा नबूकदनेस्सर आयके यरुसलेम के घेर लेथै।✝1:1 2 राजा 24:10-16; 2 इति 36:10 2 तब भगवान यहूदा के राजा यहोयाकीम के भगवान के भवन कइन भडवन सहित ओखर हाथ हे कर दइस, अउ उके उन भडवन के सिनार देस हे अपन देउता के मंदिर हे लइ जायके, अपन देउता के भंडार हे धर दइस।

3 तब राजा अपन खास अधिकारी असपनज के आदेस देथै, कि इस्राएली राज कुल मसे अउ सम्मानित परवार मसे बन्दी करे गय सग्यान डउकन के चुन के लइ आबा।✝1:3 2 राजा 20:17 4 ऊ सुन्दर होय के चाही, दिमाक हे होसियार होय के चाही, निक्खा पढे लिखे होय के चाही, अउ हरबी सीखै बाले होय के चाही, अउ देह लग हट्टा-कट्टा होय के चाही, ताकि ऊ राजा कर दरबार हे सेबा करै के ओग होय, कसदी उनही बेबीलोन कर बोली अउ पवितर किताब कर ग्यान दे। 5 राजकीय खाना पीना अंगूर कर रस हर रोज दय जाय, हइ मेर तीन साल तक उनके सिखाउत रथै, तब ओखर बाद उनके राजा कर आगू हाजिर करे जाय। 6 जउन चुने गय रथै, उन मसे कुछ यहूदा कर बिरादरी कर रथै, दानिय्येल, हनन्याह, मीसाएल, अउ अजरयाह नाम के रथै।