मत्ती 14

यीसु समुन्दर हे रेंगथै

22 एखर तुरन्त बाद यीसु अपन चेलन के नाह जिहाज हे चढाइस, कि उन नाह जिहाज हे चढके उनखर लग आगू झील के ऊ पार कढ जाय, जब तक ऊ मनसेन के बिदा कर सकै। 23 यीसु मनसेन के बिदा करै के बाद, भगवान बाफ लग बिनती करै के डोंगर छो कढ गइस, अउ संझा होय लग ऊ उछो अकेल्ले रथै। 24 नाह जिहाज ऊ टेम झील के टाठा लग झील के बीचोबीच हे जाय चुकथै, ऊ लेहरा लग नाह जिहाज डोलथै, काखे हबा आगू लग चलथै।

25 सुब्बेन लगभग तीन अउ छय बजे के टेम के बीच, यीसु झील हे चलत उनखर लिघ्घो आइस। 26 ओखर चेला जब यीसु के झील हे चलत देखथै, ता उन चकराय के अपने हे गुठेमै लगथै, हइ तो कउनो भुतवा हबै, अउ उन डर के मरे किरराय उठिन।

27 यीसु उनखर लग हरबी कथै, हिम्मत धरा, मै यहों, झइ डर।

28 पतरस ओखर लग कथै, परभु अगर तहिन हबस ता मोके आदेस दे, कि मै पानी हे रेंगत तोर लिघ्घो आय जांव।

29 यीसु कथै, "आ जा।" पतरस नाह जिहाज लग उतरथै, अउ पानी हे रेंगत यीसु के पल्ला बढिस। 30 ऊ जब तेज हबा देखथै, ता ऊ डर गइस, जब ऊ बुडै लगिस ता किरराय के कथै, "हे परभु मोके बचा।"

31 यीसु हरबी हाथ बढाय के उके पकड लेथै अउ कथै, "हे चुटु बिस्वास करे बाले, तै संका काखे करथस।"

32 तब उन दुनो नाह जिहाज हे चढ जथै अउ हवा रुक गइस। 33 जउन चेला नाह जिहाज हे रथै, उन यीसु के परनाम करथै अउ कथै, "तै सही हे भगवान कर टोरवा हबस।"