1 अब्राम के डउकी सारा के कउनो लरका नेहको रथै, सारा के लिघ्घो अक्ठी मिस्र के हरवाहिन रथै, ओखर नाम हाजिरा रथै। 2 सारा अब्राम लग कथै, "देख, भगवान मोके कउनो लरका नेहको दय हबै, इहैनिता मोर हरवाहिन के राख ले, मै ओखर लरका के अपन लरका मान लेहूं, अब्राम अपन डउकी के बात के मान लेथै।" 3 जब अब्राम कनान देस हे दस साल रह चुकथै, तब सारा अपन मिस्री हाजिरा के दइ देथै, ताकि अब्राम के डउकी बनै। 4 अब्राम हाजिरा के लिघ्घो गइस, तब हाजिरा लादा हे हुइस, जब हाजिरा देखथै कि लादा* हे हव अउ हइ महसूस करे लागथै, कि मै अपन मालकिन सारा लग निक्खा हव। 5 पय सारा अब्राम लग कथै, मोर हरवाहिन अब मोर लग घिनाथै इहैनिता मै तोके दोसी मानथो, मै ओही तोके दय रहों, ऊ लादा हे हुइस अउ तब ऊ महसूस करे लगिस, कि ऊ मोर लग निक्खा हबै, मै चाहथो कि भगवान सही नियाव करै। 6 अब्राम सारा लग कथै, देख, तै हाजिरा के मालकिन हबस, तै ओखर संग जउन करै के चाहथस, ऊ कर, तब सारा हाजिरा के दुख देय लगिस इहैनिता हाजिरा उहां लग भाग जथै। 7 भगवान के स्वरगदूत पतेरा हे पानी के झरना के लिघ्घो पाथै, हइ झरना सूर के पल्ला जाय बाले रास्ता हे रथै। 8 परभु के दूत पूंछथै, "हाजिरा, तै सारा के हरवाहिन हवस, तै कछो लग आथस अउ कछो जथस?" हाजिरा कथै, "मै अपन मालकिन के इहां लग भाग के आय हबो।" 9 भगवान के दूत ओखर लग कथै, "तै अपन मालकिन के घर जा अउ ओखर बात के मान।" 10 भगवान के दूत ओखर लग इहो कहे रथै, "तोर लग बोहत लरका पइदा हुइहिन, हइ लरका एतका हुइ जइहिन, कि गिने नेहको जाय सके।" 11 भगवान के दूत फेरै ओखर लग कथै, देख, तै लादा हे हबस, तै अक्ठी टोरवा के पइदा करिहे, तै ओखर नाम इस्माइल रखबे, काखे भगवान तोर परेसानी के सुने हबै अउ ऊ तोर मदद करही। 12 ऊ मनसे इस्माइल पतेरा के गदहा के जसना आजाद होही, ओखर हाथ सब के बिरोध उठही, ऊ अक जिघा लग दूसर जिघा तक जही, ऊ अपन भाई के बिरोध निबास करही। 13 तब भगवान हाजिरा लग बात करिस, ओखर बाद हाजिरा भगवान के अक्ठी नबा नाम लग पुकारिस, अत्ताएलरोई*, ऊ नाम इहैनिता धरिस, काखे हाजिरा खुदय कथै, "मै देखे हव कि ऊ मोर उप्पर नजर रखथै।" 14 इहैनिता ऊ कुंवा के नाम लहैरोई रखे गइस, हइ कुंवा कादेस अउ बेरेद के बीच हे हबै। 15 हाजिरा अब्राम के टोरवा के पइदा करिस, अउ ऊ टोरवा के नाम इस्माइल रखिस। 16 अब्राम ऊ टेम छियासी साल के रथै, जब हाजिरा इस्माइल के पइदा करे रथै।