1 तब याकूब आगू बढिस ऊ पूरब के परदेस छो गइस। 2 याकूब देखथै, कि मइदान हे अक्ठी कुंवा दिखथै, उहै कुंवा के लिघ्घो गेडरा के तीनठे झुंड बइठे देखथै, ऊ उहै कुंवा रथै, जिहां गेडरा पानी पीय करथै, कुंवा के मुंह हे अक्ठी बडा पथरा रथै। 3 जब सगलू गेडरा इकठ्ठा हुइ जाय करथै, तब बरेदी कुंवा के पथरा के हटाय के उनही पानी पियाय करथै, पियाय के बाद ऊ पथरा के उहै जिघा हे मढाय देथै। 4 याकूब बरेदिन लग पूंछथै, भाई, तुम कछो लग आय हबा? उन जबाब देथै, हम हारान सहर लग आय हवन। 5 तब याकूब कथै, का तुम नाहोर के टोरवा लाबान के जानथा? उन कथै, हां हम जानथन। 6 तब याकूब पूंछथै, "का उन सब ठीक हबै? उन कथै, हां, उन सब ठीक हबै, देख ओखर टोरिया राहेल अपन गेडरा के संग आउत हबै।" 7 याकूब कथै, "देख, अबहुन दिन हबै अउ बेरा के बूढै हे बोहत देरी हबै, रात के निता पसु अउ गेडरा के इकठ्ठा करै का अबे टेम नेहको होय हबै, इहैनिता उनके पानी देया उनके मइदान हे फेरै लइ जा।" 8 पय उन कथै, अबे हम असना नेहको कर सकथन, जब सगलू झुंड इकठ्ठा हुइ जइहिन अउ कुंवा के पथरा के हटाय जही, तब हम गेडरा के पानी पियाब। 9 याकूब जब तक बरेदिन लग बात करत रहै तब राहेल अपन बाफ के गेडरा के संग आइस, ओखर काम गेडरा के चरामै का रथै। 10 याकूब अपन मामा लाबान के टोरिया राहेल अउ ओखर गेडरा के देखके कुंवा के लिघ्घो गइस, ऊ कुंवा के पथरा के हटाइस, अउ अपन मामा के गेडरा के पानी पिलाइस। 11 तब याकूब राहेल के चूमिस अउ खुसी लग बोहत रोमै लगिस। 12 याकूब गुठेथै कि मै तोर बाफ के बिरादरी लग हव, ऊ राहेल के गुठेथै कि मै रिबका के टोरवा यहों, इहैनिता राहेल घर छो दउडत गइस अउ अपन बाफ लग हइ बात बताइस। 13 जब लाबान अपन बेहन के टोरवा याकूब के बारे हे सुनिस तब ऊ ओखर लग मिलै के निता दउडत आथै, ऊ याकूब के गले लगाइस अउ ओही चुमिस, ऊ याकूब के अपन घर लइ गइस, याकूब जउन कुछु होय रथै, अपन मामा लाबान के सगलू बात गुठेइस। 14 तब लाबान ओखर लग कथै, तै हमर हाडा अउ मास के हबस, अउ याकूब मामा लाबान के संग अक महिना तक रहिस।

15 अक रोज लाबान याकूब लग कथै, "का तै मोर बिरादरी होमै के कारन बिना मजदूरी लय मोर सेबा करत रइहे? मोके बता कि तोर मजदूरी काहिन हबै?" 16 लाबान के दुइठे टोरिया रथै, बडी के नाम लिया अउ नान टोरिया के नाम राहेल रथै। 17 राहेल दिखै हे बोहत सुन्दर रथै, अउ लिया के आंखी लग धुंधला रथै। 18 याकूब राहेल लग माया करथै, ऊ लाबान लग कथै, "अगर तै मोके अपन टोरिया राहेल लग काज करन दइहे ता मै तोर इहां सात साल तक काम कर सकथो।" 19 लाबान कथै, मै राहेल के पराय डउका के दो, पय एखर लग निक्खा हबै कि मै उके तोहिन के सउप दो, तै मोर संग रइहे। 20 हइ मेर लग याकूब राहेल के निता सात साल तक काम करथै, पय हइ टेम याकूब के बोहत कम लगथै, काखे ऊ राहेल लग बोहत माया करथै। 21 याकूब अपन मामा लाबान लग कथै, "मोके राहेल के देया जेखर लग मै ओखर संग काज कर सको, काखे तुम्हर इहां मोर काम करै के टेम पूर हुइ चुके हबै।" 22 लाबान ऊ जिघा हे मनसेन के बुलाय के इकठ्ठा करथै, अउ अक्ठी भोजन तइयार करवाथै। 23 पय संझा के टेम ऊ अपन बडा टोरिया लिया के लइके याकूब के लिघ्घो गइस, याकूब ओखर संग रात बिताइस। 24 (लाबान अपन टोरिया लिया के सेबिका के रूप हे हरवाहिन होमै के कारन जिल्पा के दइस) 25 याकूब सुबेन्ने उठथै ता पता चलथै कि मै लिया के संग सोय रहों, याकूब लाबान लग कथै, "तै मोके नरे हबस, मै तोर निता बोहत मेहनत इहैनिता करो कि मै राहेल लग काज कर सको, तै मोके काखे नरे हबस?" 26 लाबान कथै, "हमर देस हे नान टोरिया के काज बडा टोरिया लग पहिले नेहको होथै। 27 हइ हफ्ता तो पूर कर, ओखर बाद हम दूसर टोरिया राहेल के तोर संग काज कर देब, पय तोके अउ सात साल तक सेबा करै के होही।" 28 याकूब असनै करिस, अउ लिया के हफ्ता के पूर करिस, तब लाबान उके अपन टोरिया राहेलो दइ दइस कि ऊ ओखर डउकी बनै। 29 लाबान अपन टोरिया राहेल के अपन हरवाहिन बिल्हा के दान के रूप हे दइ दइस ताकि ऊ राहेल के सेबा करै। 30 याकूब राहेल के लिघ्घो गइस, पय ऊ लिया लग कम राहेल लग जादा माया करथै, ऊ सात साल तक लाबान के सेबा करिस।

31 भगवान देखिस कि याकूब लिया लग कम राहेल लग बोहत माया करथै, इहैनिता भगवान लिया के हइ काबिल बनाइस कि ऊ लरका के पइदा कर सके, पय राहेल के कउनो लरका नेहको हुइस। 32 लिया अक्ठी टोरवा के पइदा करिस, ऊ ओखर नाम रूबेन धरिस, लिया ओखर हइ नाम इहैनिता धरिस काखे ऊ कथै, "भगवान मोर परेसानी के देखे हबै, मोर डउका मोर लग माया नेहको करथै, इहैनिता हुइ सकथै कि मोर डउका अब मोर लग माया करै।" 33 लिया फेरै लादा हे हुइस, अउ ऊ दूसर टोरवा के पइदा करिस, ऊ हइ टोरवा के नाम सिमोन धरिस, लिया कथै, "भगवान मोर बात के सुने हबै कि मोके माया नेहको मिलथै, इहैनिता ऊ मोके हइ टोरवा दय हबै।✝" 34 लिया फेरै लादा हे हुइस, अउ ऊ अक्ठी टोरवा के पइदा करिस, ऊ टोरवा के नाम लेवी धरिस, लिया कथै, "अब जरूर मोर डउका मोर लग माया करही, मै उके तीनठे टोरवा दय हव।" 35 ऊ फेरै लादा हे हुइस, ऊ अक्ठी टोरवा के पइदा करिस, ऊ ओखर नाम यहूदा धरिस, लिया उके नाम इहैनिता दइस कि ऊ कहे रथै, "अब मै भगवान के धन्यवाद करिहों," तब लिया के लरका होय के बन्द हुइ जथै।