1 जब आदम अपन डउकी हव्वा के लिघ्घो गइस, तब ऊ लादा हे हुइके कैन के पइदा करिस अउ कथै, "मै भगवान के पल्ला लग अक्ठी टोरवा के पाय हव।" 2 एखर बाद हव्वा कैन के भाई हाबिल के पइदा करथै, हाबिल गेडरा के बरेदी बन गइस, पय कैन जमीन हे खेती करैबाले किसान बन गइस। 3 कैन टेम आमै लग खेत कर उपज परभु के भेंट चढाइस✝। 4 अउ हाबिलो अपन गेडरा छेडी मसे सब लग पहिले छउना के भेंट चढाइस अउ चरबियो भेंट चढाइस भगवान हाबिल अउ ओखर भेंट के स्बीकार करिस✝, 5 पय कैन अउ ओखर भेंट के नेहको स्बीकारिस, तब कैन बोहत गुस्साइस, अउ ओखर चेहरा मुरझाय जथै। 6 तब भगवान कैन लग कथै, तै काखे गुस्सा हबस? अउ तोर चेहरा काखे मुरझाय हबै? 7 अगर तै निक्खा काम करहे ता तै मोर नजर हे निक्खा रहबे, तब मै तोके अपनइहों, पय अगर तै बेकार काम करहे ता ऊ पाप तोर जीवन हे रही। तोर पाप तोके अपन बस हे रखै के चाहथै, पय तोके अपन पाप के अपन बस हे रखै के होही। 8 कैन अपन भाई हाबिल लग कथै, "आ पटाउरा हे चली।" इहैनिता कैन अउ हाबिल पटाउरा हे गइन, तब कैन अपन भाई हे हमला करिस अउ उके मार डारिस। 9 तब भगवान कैन लग पूंछथै, "तोर भाई हाबिल कछो हबै?" ऊ कथै, "मै नेहको जानथो, का मै अपन भाई के देख-रेख करै बाले हव?" 10 भगवान कथै, "हइ तै काहिन करे हबस? तोर भाई कर खून जमीन लग बोल-बोल के मोके पुकारथै।✝ 11 तै अपन भाई के खून करे हवस, भुंइ तोर हाथ लग ओखर खून लेय के निता खुल गय हबै, इहैनिता अब ऊ भुंइ सरापित हबै। 12 चाहे तै जमीन हे खेती कर, तउभरमा ओखर पूर उपज तोके नेहको मिलही, अउ तै भुंइ हे भटकै बाले अउ भगाइला हुइहे। 13 तब कैन भगवान लग कथै, हइ सजा एतका जादा हबै कि मै नेहको सह पइहों। 14 मोर पार देख, तै मोके भुंइ हे खेत कर काम छांडै लग मजबूर कर दय हबस अउ अब मै तोर लिघ्घो नेहको रइहों, मोर घर नेहको होही अउ भुंइ हे मै नास हुइ जइहों अउ अगर कउनो मनसे मोके पाही ता मार डारही।" 15 तब भगवान कैन लग कथै, "मै हइ नेहको होमै देहुं, अगर कउ तोके मारही ता मै ऊ मनसे लग सात गुना बदला लय जही।" तब भगवान कैन के उप्पर अक्ठी चिन्हा बनाइस, हइ चिन्हा ऊ गुठेथै कि कैन के कउ झइ मरै। 16 अउ कैन भगवान के आगू लग कढ गइस, जउन अदन के पूरब दिसा हे हबै, ऊ देस हे रहै लगिस जउन भटकै बाले भगोडा कहाथै।

17 जब कैन अपन डउकी के लिघ्घो गइस तब ऊ लादा हे हुइस, अउ ऊ हनोक के पइदा करिस, फेर कैन अक्ठी सहर बसाइस अउ ऊ सहर के नाम अपन लरका कर नाम "हनोक सहर" धरिस। 18 हनोक लग ईराद हुइस, अउ ईराद लग महूयाएल पइदा हुइस, महूयाएल लग मतूसाएल, अउ मतूसाएल लग लेमेक पइदा हुइस। 19 लेमेक दुइठे डउकी लग काज कर लइस, जेखर लग अक्ठी कर नाम आदा, अउ दूसर कर नाम सिल्ला रथै। 20 आदा याबाल के पइदा करिस, ऊ तम्बुवन हे रथै, अउ पसु के पालके अपन जीवन बिताथै। 21 आदा कर दूसर टोरवा यूबालो रथै, यूबाल, याबाल कर भाई रथै। यूबाल उन मनसेन कर बाफ रथै, जउन बीडा अउ बंसुरी बजाथै। 22 अउ सिल्लो तूबलकैन नाम के अक्ठी लरका के पइदा करिस, ऊ पीतर अउ लोहा के सगलू धारबाले हथियारन के गढैबाले हुइस, तूबलकैन कर बेहन नामा रथै। 23 लेमेक अपन डउकिन लग कथै, हे आदा अउ सिल्ला मोर बात सुना, लेमेक के डउकी जउन बात मै कथै, सुना, अक्ठी डउका मोके चोंट पहुंचाइस, मै उके मार डाले हव, अक्ठी जबान मोके चोंट दइस, इहैनिता उहो के मै मार डाले हव। 24 अगर कैन के बदला सात गुना हबै, ता लेमेक के सतहत्तर गुना होही।

25 आदम अपन डउकी के लिघ्घो फेर गइस, अउ ऊ अक्ठी टोरवा के पइदा करिस, अउ ओखर नाम सेत रखिस, भगवान मोर निता हाबिल के बदला हे जेही कैन मार डारे रहै, इहैनिता भगवान हइ दूसर लरका दय हबै।✝ 26 सेत कर अक्ठी टोरवा हुइस, अउ ऊ ओखर नाम एनोस रखिस, उहै टेम लग मनसे भगवान लग बिनती करै लगिन।