उत्पत्ति 23

सारा कर मिरतू अउ आखरी किरिया करम

1 सारा एक सव सत्ताइस साल तक जिन्दा रहिस। 2 एखर बाद सारा कनान परदेस के किर्यतर्बा हेब्रोन सहर हे मर गइस, अब्राहम बोहत दुखी हुइस अउ सारा के निता उहां रोइस। 3 तब अब्राहम अपन मरेहर डउकी के छांडिस अउ हित्ती मनसेन लग बात करै के निता गइस, 4 अब्राहम कथै, "मै अनचिन्हार अउ परदेस हबो, मै केबल अक्ठी यातरी यहों, इहैनिता मोर लिघ्घो अपन डउकी के गाडै के निता जिघा नेहको हबै, मै तुम्हर लग चुटु हस जमीन मांगथो, जेखर लग मै अपन डउकी के गाड सको।✝23:4 इब्रानिन 11:9,13" 5 हित्ती मनसे अब्राहम लग कथै, 6 "हे गुरू, तै हमर बीच हे भगवान के खास मनसे हबस, तै अपन मरेहर डउकी के गाडे के निता सब लग निक्खा जिघा जउन हमार लिघ्घो हबै, तै लइ सकथस, हम मसे कउ तोके तोर डउकी के गाडे लग नेहको रोके।" 7 अब्राहम उठिस अउ हित्ती मनसेन के पल्ला जउन ऊ देस निवासी रथै, अपन मूंड के झुकाइस। 8 अब्राहम उनखर लग कथै, "अगर तुम सही हे मोर मरेहर डउकी के गाडै हे मोर मदद करै चाहथा ता सोहर के टोरवा एप्रोन लग मोर निता बात करा। 9 मै मकपेला नाम के गुफा के खरीदै चाहथो, एप्रोन एखर मालिक हबै हइ ओखर खेत के मेड हबै, मै एखर पूरा पइसा दइहों, मै चाहथो कि तुम हइ बात के गवाह रइहा, कि मै हइ जमीन के मरघटी के रूप हे खरीदे हव।" 10 एप्रोन उहै हित्ती मनसे के बीच हे बइठे रथै, इहैनिता जेतका हित्ती ओखर सहर के फाटक लग हुइ के भित्तर जथै, उन सभा के आगू एप्रोन अब्राहम के जबाब देथै, 11 "हां, गुरू जी, मै तोके जमीन दइहों, मै तोके गुफा दइहों, मै तोके इहैनिता दइहों कि तै एहमा अपन डउकी के गाड सकस।" 12 तब अब्राहम हित्ती मनसेन के आगू अपन मूंड के झुकाइस। 13 अब्राहम सगलू मनसेन के आगू एप्रोन लग कथै, "पय मै तो खेत के पूरा पइसा देय का चाहथो, मोर पइसा लेय के निता तइयार हुइ जा, मै अपन मरेहर डउकी के एहमा गाड सको।"

14 एप्रोन अब्राहम के जबाब देथै, 15 "गुरू जी, मोर बात सुन, ऊ जमीन के कीमत चार सव चांदी के खोटन्ना हबै, पय ऊ तोर अउ मोर बीच हे का मतलब रखथस? जमीन ले अउ अपन मरेहर डउकी के गाड दे।" 16 अब्राहम समझिस कि एप्रोन उके जमीन के कीमत बताय हबै, इहैनिता हित्ती मनसेन के मानके अब्राहम चार सव चांदी के खोटन्ना एप्रोन के निता तउलिस, अब्राहम पइसा के ऊ बनिया के दइ देथै, जउन हइ जमीन के बेचय के काम करथै। 17 हइ मेर एप्रोन के जमीन, जउन मम्रे के लिघ्घो मकपेला के इलाका हे रथै, ऊ गुफा सहित अउ उन सगलू रूख सहित जउन जमीन हे अउ चारो पार मेड हे रथै, 18 सहर के दूरा हे आय बाले सगलू हित्ती मनसेन के उपस्थिति हे अब्राहम के हक हे कर दय गइस। 19 एखर बाद अब्राहम अपन डउकी सारा के मम्रे कनान परदेस हे (हेब्रोन) के लिघ्घो ऊ मकपेला खेत के गुफा हे गाड दइस। 20 अब्राहम ऊ खेत अउ ओखर गुफा के हित्ती मनसेन लग खरीदिस, हइ ओखर डेरा हुइ गइस, अउ अब्राहम एखर निस्तार मरघटी के रूप हे करिस।