1 भगवान अब्राम लग कथै, "तै अपन देस अउ अपन घरबार के छांड दे, अपन बाफ के परवार के छांड के अउ ऊ देस छो जा जेही मै तोके दिखाहुं✝। 2 मै तोर लग अक्ठी बडा देस बनइहों, मै तोके आसीस देहुं, अउ तोर नाम के बडा बनइहों कि मनसेन के निता आसीस के कारन बनी। 3 मै उन मनसेन के आसीस देहुं जउन मनसे तोके आसीस देइहिन, पय जउन कउ तोर संग बुरा करहिन, उनके मै सराप देहुं, दुनिया के सगलू मनसेन तोर दवारा मोर लग आसीस पइहिन।" 4 अब्राम भगवान के आदेस के मानिस, ऊ हारान देस के छांड देथै, अउ अपन भतीज लूत के अपन संग लइ जथै, ऊ टेम अब्राम पछत्तर साल के रथै। 5 जब अब्राम हारान देस के छांडिस ता ऊ अकेल्ले नेहको रथै, अब्राम अपन डउकी सारै, अउ अपन भतीज लूत के अउ हारान देस हे जउन कुछु उनखर लिघ्घो डेरा रथै, सगलू के धर लेथै अउ जउन हारान देस हे अब्राम के दास-दासी मिले रथै, उनोन के अपन संग लइके कनान देस के पल्ला चल पडिन, उन कनान देस हे परवेस करिन✝ 6 उन चलत-चलत अब्राम सकेम नाम के जिघा हे पहुंचथै, जिहां मोरे नाम के बडा बांझ रूख रथै, ऊ टेम कनानी मनसे ऊ देस हे रथै। 7 जब भगवान अब्राम के आगू आइस तब अब्राम लग कथै, "मै हइ देस के तोर लरकन के दइहों।" भगवान अब्राम के आगू जउन जिघा हे परगट होय रथै, ऊ जिघा के अब्राम अक्ठी बेदी बनाइस✝ 8 एखर बाद अब्राम ऊ जिघा के छांड के बेतेल के पूरुब के पल्ला आई सहर हे पहुंचथै, उहां अब्राम अपन तम्बू बनाइस, डोंगर के पस्चिम हे बेतेल सहर रथै अउ हइ सहर पूरुब हे रथै, ऊ जिघा अब्राम भगवान के निता दूसर बेदी बनाइस अउ ऊ उहां पराथना करिस। 9 एखर बाद अब्राम यातरा करत रथै, ऊ नेगव सहर के दख्खिन इलाका छो कढ गइन।

10 कनान देस हे बोहत अकाल पडथै अउ जमीन बहोत सुखाय जथै, बरसा नेहको होथै अउ कउनो चीज खाय के निता नेहको उगथै, इहैनिता अब्राम जिन्दा रहै के निता मिस्र देस हे कढ जथै, अउ उहां कुछ रोज तक रथै। 11 जब अब्राम देखिस कि मोर डउकी सारै बोहत सुन्दर हबै, इहैनिता मिस्र देस पहुंचै लग पहिलेन अब्राम सारै लग कथै, "मै जानथो कि तै बोहत सुन्दर हबस। 12 मिस्र के मनसे तोके देखहिन अउ उन कइहिन कि हइ ओखर डउकी आय, तब उन मोके मार डरहिन पय तोके जिन्दा रहै दइहिन।" 13 इहैनिता तै मनसेन लग कहबे कि तै मोर बेहन हबस, तब उन मोके नेहको मरहिन उन मोर उप्पर दया करहिन, काखे उन समझहिन कि मै तोर भाइ यहों हइ मेर लग तै मोर जीवन बचइहे। 14 जब अब्राम मिस्र देस हे परवेस करथै, तब उहां के मनसे देखथै कि ऊ डउकी बोहत सुन्दर हबै। 15 कुछ मिस्र के अधिकारी ओही देखथै अउ उन फिरोन राजा लग कथै कि ऊ बोहत सुन्दर हबै। उन अधिकारी सारै के फिरोन राजा के घर लइ गइन। 16 फिरोन राजा अब्राम के उप्पर दया करिस काखे ऊ समझथै कि ऊ सारै के भाई आय, फिरोन राजा अब्राम के गेडरा, गोरुवन, अउ गदहा-गदही दइस अब्राम के उंटवा के संग-संग मनसे अउ डउकी मतलब कि दास-दासी के रूप हे मिलिस। 17 फिरोन राजा अब्राम के डउकी सारा के अपन लिघ्घो रोक लेथै, एखर लग भगवान फिरोन अउ ओखर घराना के मनसेन हे महामारी फइलाय देथै। 18 इहैनिता फिरोन अब्राम के बुलाइस अउ कथै, "तै मोर संग हइ काहिन करे हबस? तै मोके काखे नेहको बताय कि सारै मोर डउकी आय? 19 तै मोर लग काखे कहे रहस कि ऊ तोर बेहन आय? इहैनिता मै उके अपन डउकी बनामै के उद्देस्य लग लइ आयों, पय अब तै अपन डउकी के लइके कढ जा।" 20 तब फिरोन अपन अधिकारी के आदेस देथै, कि अब्राम के मिस्र के बाहिर पहुंचाय दे, हइ मेर लग अब्राम अउ ओखर डउकी ऊ जिघा के छांडिन अउ उन सगलू डेरा के अपन संग लइ जथै जउन उनखर रथै।