उत्पत्ति 32

याकूब के एसाव लग मिलै के तइयारी

1 याकूब ऊ जिघा छांडे रहै, जब ऊ यातरा करत रथै, ऊ भगवान के स्वरगदूत के देखिस। 2 जब याकूब उके देखथै तब ऊ बोलथै, हइ तो भगवान कर दल हबै। इहैनिता याकूब ऊ जिघा के नाम महनैम*32:2 दुइठे दल धरिस। 3 याकूब के भाई सेईर नाम परदेस हे रथै, हइ एदोम के डोंगर परदेस रथै, याकूब एसाव के लिघ्घो दूत पठोइस। 4 याकूब स्वरगदूत लग कथै, "मोर मालिक एसाव के हइ संदेस दे, तुम्हर सेबक याकूब कथै, मै ई सगलू साल अबे तक लाबान के इछो परदेसी हुइके रहों। 5 मोर लिघ्घो गाय गोरू छेडी, गदहा, गेडरा अउ नोकर नोकरानी हबै, मै अपन मालिक के बतामै के निता हइ संदेस पठोथो, जेहमा मै तोर किरपा नजर मोके मिलै।" 6 स्वरगदूत याकूब के लिघ्घो लग लउटिस अउ कथै, "हम तुम्हर भाई एसाव के लिघ्घो गयन, ऊ तोर लग मिलै के निता अउत हबै, ओखर संग चार सव डउका हबै।" 7 तब याकूब बोहत डर गइस, अउ परेसानी हे पड गय, अउ हइ सोचके अपन संगी के, अउ छेडी गेडरा, अउ गाय गोरू, उंटवा के अलगे-अलगे दुइ भाग हे कर दइस। 8 याकूब सोचिस, अगर एसाव आयके अक्ठी भाग के नास करही, ता दूसर भाग के बच सकथै। 9 याकूब कथै, "हे मोर बाफ अब्राहम के भगवान, हे मोर बाफ इसहाक के भगवान, तै मोके अपन देस हे लउटै के अउ अपन परवार हे आमै के निता कहे, तै कहे रथस कि तोर निक्खा करिहों। 10 जउन करुना अउ सही तै अपन सेबक हे करे हबस ओखर निता मै हरमेसा अयोग्य हव, जब मै हइ यरदन नदिया पार करे रथो तब डेरा के नाम हे मोर लिघ्घो केबल अक्ठी डंडा रथै, पय अब मै एतका धनी हुइ गय हव कि मै दुइ भाग हे बांट के लउटत हव। 11 किरपा करके मोके मोर भाई एसाव के हाथ लग मुकति कर, मै ओखर लग डरथो, असना झइ होय कि ऊ आयके हम सब के, लरका सहित दाय के मार डालै। 12 हे भगवान, तै मोर लग कहे हबस, मै तुम्हर निक्खा करिहों, मै तुम्हर परवार के बढाहूं अउ तोर आय बाले लरका के समुन्दर के कुदरा के जसना बढाय देहुं, उन एकता हुइहिन कि गिने नेहको जाय सके।✝32:12 उत्पति 22:17" 13 याकूब रात के उहै जिघा रुकिस, याकूब कुछ चीज एसाव के भेंट दे के निता तइयार करिस। 14 याकूब दुइ सव छेडी, बीस बोकडा, दुइ सव गेडरा, बीस नर गेडरा लइस। 15 याकूब तीस उंटवा अउ उनखर लरका, चालीस गइया अउ दस गोरू, बीस गदही अउ दस गदहा लइस। 16 याकूब पसु के हर अक्ठी झुंड नोकर के दइस, तब याकूब नोकर लग कथै, "सब पसु के हर झुंड के अलगे कर लेया, सब पसु के हर झुंड के बीच कुछ दूर रखा।" 17 याकूब उनके आदेस दइस, पसु के पहिले झुंड बाले नोकर लग याकूब कथै, "मोर भाई एसाव जब तुम्हर लिघ्घो आही अउ तुम्हर लग पुछै, हइ पसु तोर सेबक याकूब के हबै? तै कछो जथस? तै केखर नोकर हबस? 18 तै जबाब देबे, हइ पसु तोर सेबक याकूब के हबै, याकूब इनके अपन मालिक एसाव के भेंट के रूप हे पठोय हबै, अउ याकूब हमर पाछू आउत हबै।" 19 याकूब दूसर नोकर, तीसर नोकर, अउ सगलू दूसर नोकरन के जउन झुंड के पाछू रथै, उनही इहै बात करै का आदेस दइस, ऊ कथै, "जब तुम एसाव लग मिलिहा ता इहै बात कइहा। 20 तुम कइहा, हइ भेंट तुम्हर हबै, अउ तोर सेबक याकूबो मनसे के पाछू आउत हबै।" याकूब सोचिस, "अगर मै भेंट के संग हइ मनसे के आगू पठोहुं ता हइ हुइ सकथै कि एसाव मोके अपन गुस्सा के सान्त करके माफ कर दे अउ मोके स्बीकार कर ले।" 21 इहैनिता याकूब एसाव के भेंट पठोइस, पय याकूब ऊ रात अपन तम्बू हे रुकिस।

याकूब कर कुस्ती

22 याकूब उहै रात उठिस, ऊ अपन दोनो डउकी अउ दोनो नोकर नोकरानी अउ गेराह टोरवा के लइके यब्बोक नदिया के घाट के पार करिस। 23 ऊ उनके नदिया के पार छो पठोय देथै, जउन कुछु ओखर लिघ्घो रथै, उके ऊ नदिया के पार छो पठोय देथै। 24 याकूब नदिया के पार करै बाले आखरी मनसे रथै, पय पार करै लग पहिले अक्ठी मनसे आइस अउ ओखर लग मल्लयुध्द करै लगिस, ऊ मनसे ओखर लग तब तक लडिस, जब तक बेरा नेहको निकल गय। 25 जब ऊ मनसे देखिस कि ऊ याकूब के नेहको हराय सकथै, तब ऊ याकूब के जांघ के नस के छिस, पय ओखर लग लडत-लडत याकूब के जांघ के नस उखड गइस। 26 ऊ मनसे कथै, मोके जाय दे, सुबेन्ने होत हबै, याकूब कथै, जब तक तै मोके आसिरवाद नेहको दइहे, मै तोके नेहको जाय दइहों। 27 ऊ पूंछिस, "तोर नाम का हबै?" ऊ जबाब देथै, "याकूब।" 28 तब ऊ कहिस, अब तोर नाम याकूब नेहको होही, पय "इस्राएल" होही काखे तै भगवान अउ मनसे लग लडके जीत पाय हबस। 29 तब याकूब ओखर लग ओखर नाम पूंछिस, पय ऊ मनसे कथै, "तै मोर नाम काखे पूंछथस?" ऊ टेम ऊ मनसे याकूब के आसिरवाद दइस। 30 इहैनिता याकूब ऊ जिघा के नाम पनीएल धरिस याकूब कथै, "ई जिघा मै भगवान के पूर रूप लग देखे हव, तउभरमा मोर जीवन बच गय हबै।" 31 ओसनेन ऊ पनीएल लग गुजरिस, तब बेरा निकर आइस, याकूब अपन गोड के कारन लंगराय के चलत रहै। 32 इस्राएली जउन पसु के जांघ के जोड बाले जांघ नस के आज के दिन तक नेहको खाथै, एखर कारन इहै हबै कि ऊ डउका याकूब के जांघ के जोड हे जांघ के नस के छिय रथै।