1 अम्रापेल सिनार के राजा रथै, अर्योक एल्लासार के राजा रथै, कदोर्लाओमेर एलाम के राजा रथै अउ तिदाल गोयीम के रथै, हइ राजकाल के घटना हबै। 2 इन राजा मिलके सदोम के राजा बेरा, अमोरा के राजा बिर्सा, अउ अदमा के राजा सिनाब, सबोयीम के राजा सेमेबेर अउ बेला (बेला जउन सोवर कहाथै) मतलब कि सोवर के राजा के बिरोध अक्ठी लडाई लडिन। 3 हइ पांच राजा सिद्दीम के घाटी मतलब म्रत सागर हे इकठ्ठा हुइन। 4 हइ राजा कदोर्लाओमेर के सेबा बारह साल तक करे रथै, पय तेरहवां साल हे सगलू उनखर बिरोध हे हुइ गइन। 5 इहैनिता चउदा साल हे कदोर्लाओमेर अउ ओखर संग उनखर लग लडै आइन, कदोर्लाओमेर अउ ओखर संग राजा रपाई मनसेन के असतरोत्कनम हे हराइन, उन हाम हे जूजी जात मनसेन के हराइन, उन एमि जात के मनसेन के सावे किर्यातैम हे हराइन। 6 अउ उन होरियो मनसेन के सेईर के डोंगर परदेस लग हराय के एल्पारान के पल्ला भग गइन, एल्पारान मरुभूमि के लिघ्घो हबै। 7 तब राजा कदोर्लाओमेर पाछू मुडिस अउ एन्मिसपात इलाका छो गइस, हइ कादेस कहलाथै, अउ सगलू अमालेकी मनसेन के हराइस, ऊ एमोरी मनसेन के हराइस, हइ मनसे हसासोन्तामार के जिघा हे रथै। 8 ऊ दिनन हे सदोम के राजा, अमोरा के राजा, अदमा के राजा, सबोयीम के राजा, अउ बेला के राजा मतलब कि सोवर के राजा, सगलू एक्कै संग लडै के निता गइन। 9 एलाम के राजा कदोर्लाओमेर, गोयीम के राजा तिदाल, सिनार के राजा अम्रापेल, अउ एल्लासार के राजा अर्योक लग लडिन, हइ मेर लग चारठे राजा पांच राजन लग लडथै। 10 सिद्दीम के मइदान हे चिपचिपी माटी के बोहत गडहा रथै, जब सदोम अउ अमोरा के राजा भागिन तब उनखर बोहत सुपाही गडहा हे गिर पडथै, पय दूसर मनसे डोंगर हे भाग गइन। 11 सदोम अउ अमोरा के लिघ्घो जउन कुछु रथै, उन उनखर सगलू खाय-पिये बाले चीजन के लूट लेथै अउ उहां लग कढ जथै। 12 अब्राम के भाई के टोरवा लूत सदोम हे रथै, ओखर लिघ्घो जउन कुछु रथै ओखरो सब कुछ डेरा के लइ आनिन। 13 अक्ठी मनसे जउन भाग के बच गय रथै, ऊ इब्रानी रथै, ऊ अब्राम के सगलू बात गुठेथै अब्राम पवितर बांझ रूख के पतेरा छो रथै, हइ पतेरा एमोरी मम्रे नाम के मनसे रथै, ऊ एस्कोल अउ आनेर के भाई रथै, हइ तीनोझन अब्राम के संगी रथै अउ उन अब्राम के मदद के निता अक्ठी टीमा* बांधथै। 14 जब अब्राम के पता चलथै कि लूत के पकड लय हबै, ता ऊ अपन पूरा परवार के अकजुट करथै, अउ उन मसे तीन सव अठारा सिक्छित सुपाही के लइके अब्राम दान सहर तक उनखर पीछा करथै। 15 अब्राम रात हे अपन सेबकन के दल हे बांट देथै, अउ अपन सेबकन के संग हमला कराइस अउ दमिस्क सहर के उत्तर हे होबा सहर तक उनखर पीछा करथै। 16 तब अब्राम उनखर दवारा लूटे हर सगलू चीज लइ आनिस, लूत अउ लूत के सगलू चीज के लूटे हर के वापिस लइ आनिस।

17 कदोर्लाओमेर अउ ओखर संग सगलू राजा के हराय के बाद अब्राम अपन घर छो लउट आथै, तब सदोम के राजा, अब्राम लग भेंट करै के निता सावे किर्यातैम कर घाटी पहुंचथै, इके अब राजा के घाटी कथै। 18 सालोम के राजा मलिकिसिदक अब्राम लग मिलै गइस, मलिकिसिदक, सब लग ऊंच भगवान के पुजारी रथै।✝ 19 मलिकिसिदक अब्राम के आसीस देथै अउ कथै, बादर अउ भुंइ के बनामै बाले भगवान अब्राम के आसीस दे। 20 अउ हम सब लग बडा भगवान के महिमा होय, भगवान बैरी* के हरामै हे तोर मदद करे हबै, तब अब्राम लडाई हे मिले हर चीज के दसमा हिस्सा मलिकिसिदक के दइस। 21 तब सदोम के राजा अब्राम लग कथै, मोके केबल मोर मनसेन के दइ दे जउन बैरी उनके पकड के लइ गय रहै। 22 अब्राम सदोम के राजा लग कथै, मै बादर अउ भुंइ के बनाय बाले भगवान के किरिया खाय हव, 23 कि जउन तोर चीज आय ओहमा लग कुछु नेहको लेहूं, इहां तक कि जूता के डोरा धरै के जिघा तक नेहको लेहूं, मै हइ नेहको चाहथो कि तै असना कइहे कि मै अब्राम के धनी बनाय हबो। 24 मै केबल ऊ भोजन के स्बीकारथो, जउन हमर जबान खाय हबै, पय तै दूसर मनसेन के उनखर हिस्सा दइ दे, हमर लडाई हे जीते हर चीज तै ले अउ एहमा लग कुछ आनेर, एस्कोल अउ मम्रे के दइ दे, हइ मनसे लडाई हे मोर मदद करे रथै।