उत्पत्ति 49

याकूब कर भभिस्यवानी

1 तब याकूब अपन सगलू टोरवा के अपन लिघ्घो बुलाइस, ऊ कथै, "मोर सगलू टोरवा, इहां मोर लिघ्घो आबा। मै तुमके गुठेहुं कि भभिस्य हे काहिन होही।" 2 हे याकूब कर टोरवा, अकजुट हुइके मोर बात सुना, अपन बाफ इस्राएल के बातन हे धियान देया। 3 हे रूबेन तै मोर पहिला टोरवा हबस, तै मोर पहिले टोरवा अउ मोर सक्ति के पहिला साबूत हबस, तै मोर सगलू टोरवन लग जादा सक्ति अउ बलवान हबस। 4 तै जउन पानी के जसना उबलै बाले हबस, इहैनिता दूसर लग बडा नेहको ठहरहे, काखे तै अपन बाफ के खटिया हे चढे, तब तै ओही असुध्द करिस, ऊ मोर जेठना हे चढ गइस। 5 सिमोन अउ लेवी भाई हबै, उनके अपन तलबार लग लडै हे पिरिया हबै। 6 हे मोर जीव उनखर गुप्त बइठक हे भाग झइ ले, हे मोर आतमा उनखर दरबार लग मदद झइ कर। काखे ऊ अपन गुस्सा हे मनसे के हत्या करथै, ऊ अपन इक्छा के कारन गोरुन के लंगडा बनाथै। 7 उनखर गुस्सा के धिक्कार हबै, काखे ऊ परचंड हबै। उनखर रोस के धिक्कार हबै, काखे ऊ निरदय हबै। मै उनके याकूब के देस हे अलगे-अलगे करिहों, उनके इस्राएल हे तितर-बितर करिहों। 8 "हे यहूदा, तोर भाई तोर धन्यवाद करहिन, तै अपन बैरी के हराइहे, तोर भाई तोर आगू झुके। 9 यहूदा ऊ सेर के जसना हबै जउन कउनो जानवर के मारे होय, हे मोर टोरवा, तै अपन सिकार हे ठाढ बघवा के जसना हो जउन आराम करै के निता लेटथै, अउ कउ एतका बहादुर नेहको कि उके छेड दे।✝49:9 गिनती 24:9; परकासितवाक्य 5:5 10 जब तक सीलो न आबै तब तक न तो यहूदा के परवार के मनसे राजा हुइहिन। ओखर परवार के राज-चिन्हा ओखर परवार लग सही सासक के आमै लग पहिले खतम नेहको होही। तब कइ मनसे ओखर आदेस के मनहिन अउ सेबा करहिन। 11 ऊ अपन गदही के अंगूर के बेल लग बांधथै, ऊ अपन गदही के लरकन के सब लग निक्खा अंगूर के बेलन हे बांधथै। ऊ अपन कपडा के धोमै के निता सब लग निक्खा दाखरस के निस्तार करथै। 12 ओखर आंखी दाखरस पीय लग लाल रथै। ओखर दांत दूध पीमै लग उजियार हबै।" 13 जबूलून समुन्दर के तट हे निबास करही। ऊ पानी बाले जिहाज के निता बन्दरगाह बनही, ओखर राज के सीमा सीदोन देस तक होही। 14 इस्साकार अक्ठी बलवान गदहा हबै, ऊ पसुन के बाडों के बीच हे रथै। 15 जब ऊ देखिस कि आराम करै के जिघा निक्खा हबै, कि जमीन निक्खा हबै, तब ऊ अपन कांधा के बोझ उठामै के निता झुकाय दइस अउ ऊ बेगार के हरवाह बन जही। 16 दान, इस्राएल के कुलन हे अक्ठी कुल अपन कुल के मनसे के न्याय करही। 17 दान रास्ता के बगल के सपुवा के जसना हबै। ऊ रास्ता के लिघ्घो लेटे हर उस भंयकर सपुवा के जसना हबै, अउ सबार घोडवा लग गिर जथै। 18 हे परभु, मै तोर मुकति के इंतजार करथो। 19 "डाकुन के अक्ठी गिरोह गाद हे लडाई करही, पय गाद उनके मार भगाइस।" 20 "आसेर के जमीन बोहत जादा निक्खा उपज देही, उके उहै भोजन मिलही जउन राजन के निता निस्तार होही।" 21 "नप्ताली आजाद दउरै बाले छिगरी के जसना हबै अउ ओखर आरो उनखर लरकन के जसना हबै।" 22 यूसुफ फलवन्त डगाइल हबै, झरना के बगल हे लगे फलवन्त डगाइल ओखर साखा भीठी हे फइले हबै। 23 बोहत लग मनसे ओखर बिरुध्द हुइन अउ ओखर लग तीर लग लडिन। धनुरधारी मनसे उके परसंद नेहको करथै। 24 तउभरमा ओखर धनही स्थिर रहिस, ओखर भुजा, ओखर हाथ गतिवान रथै, याकूब के सक्तिमान भगवान के हाथ लग, इस्राएल के पथरा मेसपाल के नाम लग, 25 अउ अपन बाफ के भगवान लग सक्ति पाथै, "भगवान तोके आसीस दे, सक्तिमान भगवान तोके आसीस दे, ऊ तोर उप्पर बादर लग आसीस दे अउ तरी गहिरा समुन्दर लग आसीस दे, ऊ तोके स्तन अउ गरभ के आसीस दे।" 26 मोर दाय-बाफ के बोहत निक्खा चीज होवत रहै अउ तुम्हर बाफ लग मोके अउ जादा आसीस मिलै, तुम्हर भाई तोके बेचै चाहै, पय अब तोके अक्ठी ऊंच डोंगर के जसना मोर सगलू आसीस तोके मिलै, उन यूसुफ के मूंड हे जउन अपन भाइयन लग अलगे करे गय रथै। 27 "बिन्यामीन अक्ठी असना भूंखे बिगवा के जसना हबै, जउन सुबेन्ने मारथै अउ उके खाथै। संझा के हइ बचे कुचे लग काम चलाथै।" 28 हइ इस्राएल के बारह परवार हबै अउ उहै चीजन हबै जिनके उनखर बाफ उनखर लग कथै, ऊ हर अक्ठी टोरवा के ऊ आसीस दइस जउन ओखर निता ठीक रथै।

याकूब के मिरतू अउ गाडिन

29 तब इस्राएल उनके आदेस दइस, ऊ कथै, "जब मै मरो ता मै अपन मनसे के बीच रहै चाहथो, मै अपन पुरवजन के संग हित्ती एप्रोन के खेतन के गुफा हे गाडे जाय चाहथो।✝49:29 प्रेरितो 7:16 30 मोके ऊ गुफा हे गाडबे जउन कनान देस हे मम्रे के पूरुब दिसा हे मकपेला के जमीन हे हबै, जिके अब्राहम निजी मरघटी बनामै के निता हित्ती जात एप्रोन लग जमीन सहित खरीदे रथै।✝49:30 उत्पति 23:16 31 उहां उन अब्राहम अउ ओखर डउकी सारा के गाडे रथै। उहां उन इसहाक अउ ओखर डउकी रिबका के गाडिस, उहां मै लिया के गाडों। 32 ऊ गुफा उस खेतवा हे हबै जिके हित्ती मनसे लग खरीदे गय रथै।" 33 अपन टोरवन लग बात समापत करै के बाद याकूब लेट गय, गोडन के अपन बिछोना हे रखिस अउ मर गइस।✝49:33 प्रेरितो 7:15