1 उन मसे दुइठे दूत संझा के टेम सदोम सहर हे पहुंचिन, लूत सदोम सहर के दूरा हे बइठे रथै, जब लूत उनके देखथै, तब ऊ उनखर सोगत के निता उठिस, लूत भुंइ हे मूंड के झुकके उनही नमस्कार करिस। 2 लूत कथै, "मै तुम्हर लग बिनती करथो, तुम मोर घर चला, अउ अपन गोड धोय लेया, अउ तुम इहां रात रहि सकथा, तब आने रोज अपन यातरा हे जा सकथा।" स्वरगदूत कथै, "नही, हम चउकी हे रात बितउबे।" 3 पय लूत अपन घर हे लइ जाय के निता उनही बेर-बेर कथै, हइ मेर लग स्वरगदूत ओखर घर हे जाय के निता तइयार हुइ जथै, जब उन घर पहुंचिन ता लूत उनखर निता पीय के निता पानी लइस, लूत उनखर निता रोटी बनाइस, अउ लूत के बनाय हर खाना के खाइन। 4 तब उनखर सोय जाय के पहिले सदोम सहर के मनसेन लूत के घर के आयके चारो चउगिरदा लग घेर लेथै। 5 उन लूत लग कथै, "आज रात के जउन मनसे तोर लिघ्घो आय हबै, उन दोनो डउका कछो हबै? उन डउकन के हमके दइ देया, हम उनखर संग गलत बेउहार करे चाहथन।" 6 लूत बाहिर निकरिस अउ अपन पाछू लग ऊ केवाड के बन्द कर देथै। 7 लूत उन मनसेन लग कथै, मै तुम्हर लग बिनती करथो, कि तुम बेकार काम झइ करा। 8 देखा, मोर दुइठे टोरिया हबै, मै उनही तोर लिघ्घो बाहिर लाथो, जउन तुम्हर नजर निक्खा लगै ओसनेन उनखर संग करा, पय इन डउकन के कुछु झइ करा, काखे इन मोर घर हे आय हबै, अउ उनखर मदद जरूर करिहों। 9 उन मनसेन कथै, "लूत हमर रास्ता लग हट जा," "तै इहां रहै के निता आय हबस अउ अब न्याय करके जज बनै चाहथस, हम उनखर लग जादा तोर संग बुरा बेउहार करब," उन मनसेन लूत के ढकेल देथै, अउ केवाड के टोरै के निता लिघ्घो आथै। 10 पय उन स्वरगदूत हाथ बढाय के लूत के अपन लिघ्घो भित्तर तीन लेथै, अउ केवाड के ढांक देथै। 11 दोनो स्वरगदूत केवाड के बाहिर के मनसेन के अंधरा कर देथै, हइ मेर लग घर हे घुसै बाले जबान, डोकरा सगलू अंधरा हुइ गइन अउ केवाड के खोजत-खोजत थक जथै।✝

12 दोनो स्वरगदूत लूत लग कथै, "का हइ सहर हे असना मनसे हबै जउन तुम्हर परवार के होय? का तुम्हर दमांद, तोर टोरिया या दूसर कउ तुम्हर परवार के मनसे होय? अगर कउ दूसर हइ सहर हे तुम्हर परवार के हबै ता तै अभिन्नै सहर के छांडै के निता कहि दे। 13 हम हइ सहर के नास करब, भगवान उन सगलू बुराइयन के सुन लय हबै, जउन हइ सहर हे हबै, इहैनिता भगवान हमही मनसेन के नास करै के निता पठोय हबै।" 14 इहैनिता लूत बाहिर गइस अउ अपन टोरियन के काज करै बाले देमांदन लग बात करिस, लूत कथै, "हरबी करा अउ हइ सहर के छांड देया।" भगवान हइ सहर के नास करही, पय उन मनसेन समझथै कि लूत मजाक करथै।✝ 15 दूसर रोज के भिनसरहा* के टेम संदेस देय बाले दूत लूत लग हरबी करै के करथै, उन कथै, "देख हइ सहर के सजा मिलही, इहैनिता तै अपन डउकी अउ तुम्हर टोरिया जउन हबै, उनही लइके हइ जिघा के छांड दे, तब तै सहर के संग नास नेहको हुइहे।" 16 पय लूत अउ देरी करथै, पय स्वरगदूत ओही अउ ओखर टोरिया के हाथ पकडके उनही सहर लग बाहिर लइ गइस, काखे भगवान लूत के उप्पर किरपा करथै। 17 इहैनिता दोनोझन स्वरगदूत लूत अउ ओखर परवार के सहर के बाहिर पहुंचाय देथै, जब ऊ बाहिर हुइ गइस ता ऊ सहर मसे अकझन मनसे कथै, "अपन जीवन के बचामै के निता भागा, तब तक भागत रहा जब तक डोंगर हे न पहुंचा अगर तुम असना नेहको करिहा, ता तुम सहर के संग नास हुइ जइहा।" 18 तब लूत दोनो स्वरगदूत लग कथै, "हे परभु, किरपा करके एतका दुरिहां दउरै का मजबूर झइ कर। 19 तुम मोर जसना सेबक हे एतका जादा किरपा करे हबा, तुम मोके बचामै के निता किरपा करे हबा, पय मै डोंगर तक दउर नेहको सकथो, अपन जरूरत लग जादा दउरहों ता कुछ बुरा हुइ सकथै, अउ मै मर सकथो। 20 देख इहां का ऊ नान हस सहर नेहको हबै? हमके ऊ सहर तक दउरन दे, तब हमर जीवन बच जही।" 21 स्वरगदूत लूत लग कथै, "मै हइ सहर के बारे हे तुम्हर बिनती सुने हव, जउन सहर के बारे हे तै कहे हबस, ओही मै नास नेहको करिहों। 22 पय उहां तक तेज दउर, मै तब तक सदोम सहर के नास नेहको करिहों। जब तक तुम ऊ सहर हे सुरक्छित नेहको पहुंच जा।" इहैनिता हइ सहर के नाम सोवर हबै, काखे हइ सहर नान हबै।

23 जब लूत सोवर सहर हे घुसिस तब सुबेरे हुइस अउ बेरा निकर आइस 24 अउ भगवान सदोम सहर अउ अमोरा सहर के नास करै भगवान आगी अउ जलत गंधक के बादर लग बरसाइस। 25 हइ मेर लग भगवान उन सहरन के नास कर देथै, अउ पूर मइदान के सगलू जिन्दा मनसे अउ सगलू रूख के नास कर देथै। 26 जब उन भागत रथै, ता लूत के डउकी पाछू मुडके सहर के देखथै, तब ऊ नून के खम्भा बन गइस।✝ 27 उहै रोज बोहत सकारे अब्राहम उठिस अउ ऊ जिघा हे गइस जिहां ऊ भगवान के आगू ठाढ होय करथै। 28 अब्राहम सदोम अउ अमोरा सहर के नजर डालथै, ऊ परदेस लग बोहत कुहिरा के उठत देखथै, बडा भंयकर आगी जसना कुहिरा उप्पर उठत दिखथै। 29 असना हुइस कि भगवान घाटी के सहरन के नास करिस, तब अब्राहम के सुरता आथै, जब भगवान उन सहरन के उलट-पुलट कर देथै, जिहां लूत रथै, तब बिनास के बीच लग लूत के निकार के दूसर सहर हे पठोय देथै।

30 लूत सोवर सहर हे लगेतार रहै लग डरथै, इहैनिता ऊ अउ ओखर दोनो टोरिया डोंगर हे गइन उन उहां अक्ठी गुफा हे रहै लगिन। 31 अक रोज बडा टोरिया नान हस टोरिया लग कथै, "हमर बाफ डोकरा हबै, अउ इहां अक्को असना मनसे नेहको हमै जउन दुनिया के रीति रिवाज के जसना हमर लिघ्घो आमै अउ हम लरका पइदा करी। 32 इहैनिता आ, हम अपन बाफ के दारू पियाके अउ ओखर संग सोउबे, जेखर लग हम अपन बाफ के दवारा ओखर वंस के बचाय सकी।" 33 ऊ रात दोनो टोरिया अपन बाफ के लिघ्घो गइन अउ लूत के उन दारू पियाके नसा हे कर देथै, तब बडा टोरिया बाफ के जठना हे गइस, अउ ओखर संग सोइस, लूत बोहत नसा हे रथै, इहैनिता हइ नेहको जान सकिस कि ओखर संग कोन सोय हबै। 34 दूसर रोज बडा टोरिया नान बेहन लग कथै, "पिछले बेर मै अपन बाफ के संग सोय रहों, आ हइ रात फेरै हम उके दारू पियाके नसा हे कर दइ, तब तै ओखर जेठना हे जाय सकथस, अउ ओखर संग सोय सकथस, हइ मेर लग हम अपन बाफ के निस्तार करके लरकन के पइदा करके अपन वंस के चलामै के निता करै चाही।" 35 इहैनिता उन दोनो टोरिया अपन बाफ के दारू पियाके नसा हे कर देथै, तब नान बेहन ओखर जेठना हे गइस अउ ओखर लिघ्घो सोइस, लूत इहो बेर नेहको जान सकिस कि ओखर संग ओखर टोरिया सोय हबै। 36 हइ मेर लग लूत के दोनो टोरिया अपन बाफ लग लादा हे हुइन अउ उनखर बाफ उनखर लरका के बाफ बन गइस। 37 बडा टोरिया अक्ठी टोरवा के पइदा करिस, अउ ऊ टोरवा के नाम मोवाब रखिस, मोवाब उन सगलू मोवाबी जात मनसेन के बाफ हबै, जउन अब तक रहत हबै। 38 नान बेहन टोरिया उहो अक्ठी टोरवा के पइदा करिस, इहो अपन टोरवा के नाम बेनम्मी रखिस, बेनम्मी अब उन सगलू अम्मोनी जात मनसेन के बाफ हबै जउन अब तक रहत हबै।