1 दुइ साल बाद फिरोन राजा सपना देखिस, फिरोन सपना हे देखिस कि ऊ नील नदिया के टाठा हे ठाढ हबै। 2 तब फिरोन राजा सपना हे नदिया लग सातठे गोरू के बाहिर आउत देखथै, गोरू मोट अउ अच्छी रथै, गोरू उहां ठाढ रथै अउ चारा चरत रथै। 3 तब सातठे दूसर गोरू नदिया लग बाहिर आइस, अउ नदिया के टाठा हे मोट गोरू के लिघ्घो ठाढ हुइ गइन, पय हइ गोरू पातर अउ बेकार रथै। 4 हइ सातठे पातर गोरू, अच्छी मोट गोरू के खाय गइन, तब फिरोन जग उठिस। 5 ऊ फेर सोय गइस, ऊ दूसर बेर सपना देखिस कि दाना सात बाली अक्ठी दाना के पाछू उगे हर देखथै, दाना के बाली मोट अउ अच्छी रथै। 6 तब ऊ उहै दाना के पाछू सात दूसर बाली उगे हर देखथै, दाना के हइ बाली पातर अउ ताथ हवा लग मुरझाय गय रथै। 7 तब सात पातर बाली सात मोट अउ अच्छी बाली के खाय लेथै, फिरोन फेर जग गइस अउ ऊ समझिस कि हइ केबल सपना हबै। 8 सुबेन्ने फिरोन हइ सपनन के बारे हे परेसान रथै, इहैनिता ऊ मिस्र के सगलू टोनहन के अउ सगलू दिमाक बाले के बुलाइस, फिरोन उनके सपना गुठेइस, पय उन मनसे मसे कउ सपना के मतलब के नेहको गुठेय सकिन।✝ 9 तब अंगूर कर रस दे बाले हरवाह फिरोन लग कथै, "जउन मै पाप करे रहों ऊ सुरता मोके आइस। 10 फिरोन तै मोर उप्पर अउ अक दूसर हरवाह हे गुस्सा रथस, अउ तै हम दोनो के जेल हे बेडवाय दय रहस। 11 जेल हे एक्कै रात हम दोनो सपना देखे रहन, हर सपना के अलगे-अलगे मतलब रथै। 12 उहां हमर संग अक्ठी इबरानी डउका रथै, ऊ सेनापति के सुपाही के सेबक रथै, हम उके अपन-अपन सपना सुनायन अउ ऊ हमके उनखर मतलब गुठेइस। 13 जसना ऊ हमके मतलब गुठेय रथै, ओसनेन होथै, मोके अपन काम फिरै मिल गइस अउ रोटी बनामै बाले के फांसी लगाय के लटकाय गइस।" 14 इहैनिता फिरोन यूसुफ के जेल लग बुलवाइस, सेना हरबी यूसुफ के जेल लग बाहिर लाइन, यूसुफ अपन चूंदी कटवाइस अउ साफ कपडा पहनिस, तब ऊ फिरोन के आगू ठाढ हुइस। 15 तब फिरोन यूसुफ लग कथै, "मै अक्ठी सपना देखे हव, पय कउ असना नेहको हबै जउन सपना के बारे हे मोके समझाय सकै, मै सुने हव कि जब कउ सपना के बारे हे तोर लग कथै तब तै सपना के मतलब गुठेथस।" 16 यूसुफ फिरोन के जबाब देथै, मै नेहको जानथो, पय भगवान फिरोन के सही जबाब देही। 17 फिरोन यूसुफ लग कथै, देख, मै सपना हे नील नदिया के टाठा हे ठाढ रथै। 18 मै सातठे गोरू के नदिया लग बाहिर आउत देखो अउ चारा चरत देखेव, हइ गोरू मोट अउ अच्छी रथै। 19 तब मै दूसर सातठे गोरू के नदिया लग बाहिर आउत देखथो, ऊ गोरू पातर अउ कमजोर रथै, मै मिस्र देस हे जेतका गोरू देखे हव, उन मसे सब लग जादा कमजोर रथै। 20 अउ हइ कमजोर अउ पातर गोरू पहिले अच्छी सातठे मोट गोरू के खाय डारिस। 21 पय जब ऊ उनके खाय चुकथै, तब कउनो के असना बिस्वास नेहको होथै कि उन उनके खाय हबै, काखे जसना पहिले रथै, ओसनेन अबे रथै, तब मै जाग गयों। 22 तब मै अपन दूसर सपना हे दाना के सातठे बाली एक्कै दाना के पाछू उगत देखो, ऊ दाना के बाली भररेहर अच्छी अउ सुन्दर रथै। 23 तब उनखर बाद सातठे दूसर चूंदी उगिन, पय हइ बाल पातर, कमजोर अउ पूरब लग गरम हवा लग मुरझाय जथै। 24 तब पातर बाल सातठे अच्छी बालन के खाय डारिन, "मै हइ अपन मनसे के गुठेयों जउन सपना के मतलब गुठेमै बाले ज्योतिसी रथै, पय कउनो सपना के मतलब मोके नेहको समझाइन कि एखर काहिन मतलब हबै?" 25 तब यूसुफ फिरोन लग कथै, "हइ दोनो सपना के एक्कै मतलब होथै, भगवान तोके गुठेथै जउन हरबी होही। 26 सात अच्छी गोरू अउ सात अच्छी दाना के बाल सात साल हबै, दोनो सपना के एक्कै मतलब हबै। 27 सात पातर अउ कमजोर गोरू अउ सात कमजोर दाना के बाल देस हे भुखमरी के सात साल हबै, हइ सात साल, अच्छी सात साल के बाद आही। 28 जउन बात मै फिरोन लग कहे हव, ऊ इहै हबै, जउन काम भगवान करै बाले हबै, ओही तोके देखाय हबै। 29 सुन, सगलू मिस्र देस हे सात साल हे बोहत दाना पइदा होही। 30 पय उनखर बाद अकाल के सात साल आही, अउ सगलू मिस्र देस हे मनसे हइ सगलू दाना पइदा के बिसर जइहिन, अउ अकाल लग देस नास होही। 31 अकाल एतका भंयकर होही कि अच्छी दाना अउ पइदा कउनो के सुरता नेहको होही। 32 अउ फिरोन एक्कै सपना दुइ बेर इहैनिता देखाय हबै कि भगवान दवारा हइ बात निस्चित करे जाय चुके हबै, अउ ऊ हरबी घटे बाले हबै। 33 इहैनिता हे फिरोन तै अक्ठी असना मनसे के चुन जउन बोहत समझदार अउ दिमाकदार होय, तै उके मिस्र देस के राजा बना। 34 तब फिरोन दूसर मनसे के दाना अकजुट करै के निता चुने हर मनसे सात निक्खा साल हे जेतका दाना पइदा करै, मिस्र देस उपज ओखर पचमा हिस्सा दे। 35 तब निक्खा दाना के सात साल हे सगलू दाना चीज अकजुट करे जाय अउ दाना फिरोन के हक हे भंडार सहरन हे सुरक्छित रखत जाय। 36 अउ हइ दाना सात साल के अकाल लग बचै के निता पूरा मिस्र देस के दे के निता अकजुट करे, ताकि मनसे दाना के कमी लग झइ मरै।"

37 हइ बात फिरोन अउ ओखर सगलू अधिकारिन के निक्खा लगिस। 38 इहैनिता फिरोन अपन अधिकारिन लग कथै, "का हमके असना मनसे, जसना हइ हबै जेहमा भगवान के आतमा रथै, मिल सकथै?" 39 फेर फिरोन यूसुफ लग कथै, "भगवान हइ सगलू चीज तोके देखाय हबै, इहैनिता तहिन जादा दिमाक बाले हबस। 40 तै मोर देस के राजा हुइहे, मोर मनसे तोर आदेस के मनहिन, केबल मै राजगद्दी हे तोर लग बडा राजा रइहों।" 41 फेर फिरोन यूसुफ लग कथै, "सुन, मै तोके मिस्र देस के सगलू देस के उप्पर अधिकारी ठहराय देथो।" 42 तब फिरोन अपन हाथ लग मुंदरी उतार के यूसुफ के हाथ हे डाल देथै, अउ ओही निक्खा मलमल के कपडा पहेनवाय दइस, अउ ओखर नटइ हे सोना के चैन पेहना दइस। 43 तब फिरोन यूसुफ के अपन दूसर रथ हे चढके इज्जत दइस, रथन के आगू-आगू चलत रहै अधिकारी बोलथै, कि "घुटवा टेका।" हइ मेर फिरोन यूसुफ के सगलू मिस्र के परधानमन्तरी बनाय दइस। 44 फिरोन यूसुफ लग इहो कथै, "मै फिरोन यहों, तोर आदेस के बेगैर कउनो मनसे सगलू मिस्र देस हे हाथ नेहको उठाय सके, अउ न गोड।" 45 तब फिरोन यूसुफ के नाम सापनत्पानेह* रखिस, अउ ओन सहर के पुजारी पोतीपेरा के टोरिया आसनत लग ओखर काज कर दइस, अउ यूसुफ सगलू मिस्र देस हे यातरा करे लगिस। 46 जब यूसुफ मिस्र देस के फिरोन राजा के सेबा हे परवेस करिस तब ऊ तीस साल के रथै, ऊ फिरोन के दरबार लग निकर के सगलू मिस्र देस हे यातरा करिस। 47 सात साल हे देस हे बोहत जादा पइदाबार हुइस। 48 अउ यूसुफ मिस्र देस हे सात साल खाय के चीज बचाइस, यूसुफ दाना सहरन हे अकजुट करिस, यूसुफ सहर के चारो पल्ला खेत कर पइदाबार दाना के हर सहर हे अकजुट करिस। 49 यूसुफ बोहत दाना अकजुट करिस, हइ समुन्दर के कुदरा के जसना रथै, ऊ एतका दाना अकजुट करिस कि ओखर बजन के तउले नेहको सकै। 50 यूसुफ के डउकी आसनत ओन के पुजारी पोतीपेरा के टोरिया रथै, अकाल के पहिले साल के आमै लग यूसुफ अउ ओसनत के दुइठे टोरवा हुइन। 51 यूसुफ पहिले टोरवा के नाम मनस्से रखिस काखे उन सोचिस, "भगवान सगलू दुख परेसानी अउ मोर बाफ के परवार के भुलवामै हे मोर मदत करे हबै।" 52 यूसुफ दूसर टोरवा के नाम एप्रैम रखिस, काखे ओखर कहै के मतलब हइ रथै, कि मोके दुख मिलै के जिघा हे हइ देस हे भगवान मोके आसीस दय हबै। 53 जब मिस्र देस हे दाना के ऊ सात साल खतम हुइस, 54 तब अकाल के सात साल सुरुवात हुइस, जसना यूसुफ कहे रथै, सगलू देस हे अकाल रथै, पय मिस्र देस हे दाना के कउनो कमी नेहको रथै।✝ 55 जब मिस्र देस हे दाना के कमी होमै लगिस तब मनसे फिरोन लग दाना मांगै लगिन, फिरोन मिस्र के मनसे लग कथै, तुम "यूसुफ के लिघ्घो जा, ऊ जउन कुछु कहै उहै करिहा।✝" 56 जब पूरे देस हे अकाल पडिस, तब यूसुफ अपन गोदाम के खोल के मिस्र देस के निवासी के दाना बेचै का सुरु करिस, काखे अकाल बोहत जादा रथै। 57 दूसर-दूसर देस के मनसे मिस्र हे यूसुफ के लिघ्घो दाना खरीदै के निता आमै लगिन, काखे सगलू देस हे अकाल बोहत जादा हुइ चुकथै।