1 अक रोज लिया के टोरिया दीना, जेही ऊ याकूब के दवारा पइदा करे रथै, कनान देस के टोरियन लग मिलै के निता गइस। 2 ऊ परदेस के राजा के नाम हमोर रथै, हमोर के टोरवा के नाम सकेम रथै, ऊ हिव्वी जात के रथै, जब सकेम दीना के देखथै तब उके पकड लथै, ऊ ओखर संग सोइस अउ ओखर संग गलट काम करिस। 3 तब ओखर मन याकूब कर बिटिया सकेम दीना लग माया करे लगिस अउ ओखर लग काज करै के चाहथै। 4 सकेम अपन बाफ हमोर लग कहिस, मोके हइ टोरिया डउकी के रूप हे परदान कर। 5 याकूब सुनिस कि सकेम ओखर टोरिया दीना के संग गलत काम करे हबै, ऊ टेम ओखर टोरवा पसु के संग पटाउरा हे गय रथै, इहैनिता उन जब तक नेहको आय, तब तक याकूब कुछु नेहको करिस। 6 सकेम के बाफ हमोर याकूब लग बातचीत करै के निता ओखर लिघ्घो आइस। 7 जब याकूब कर टोरवा ओखर बारे हे सुनिन तब ऊ बोहत दुख हुइन, ऊ पटाउरा लग आइन, उन बोहत गुस्सा हे रथै, काखे सकेम याकूब के टोरिया के संग गलत काम करके इस्राएली समाज हे मूरख के काम करे रथै, असना काम नेहको करै के चाही। 8 पय हमोर भाइन लग बात करिस, ऊ कथै, "मोर टोरवा सकेम दीना लग बोहत माया करथै, किरपा करके उके एखर संग काज करन देया। 9 हमर लग काज सम्बन्ध सुरु करा, अपन टोरिया हमके देया, हमर टोरिया तुम लेया। 10 तब तुम हइ देस हे रहि सकही, एखर दूरा तुम्हर निता खुल जही, इहां रहा अउ धन्धा करा, धन डेरा कमाबा।" 11 सकेम याकूब अउ भाई लग बात करिस, सकेम कथै, "किरपा करके मोके स्बीकार करा, अउ मै जउन करे हव ओखर निता माफ कर देया, मोके जउन कुछ तुम करै के निता कइहा, मै उहै करिहों। 12 तुम जेतका भेंट मंगिहा मै देहुं, अगर मोके तुम दीना लग काज करै दइहा।" 13 याकूब कर टोरवा सकेम अउ ओखर बाफ हमोर लग झूठ बोलै के ठान लय रहै, काखे सकेम उनखर बेहन दीना के संग गलत काम करे रथै। 14 इहैनिता भाई उनखर लग कथै, "हम तोके अपन बेहन के संग काज नेहको करन देब काखे तुम्हर खलरी के खतना* नेहको होय हबै, काखे ऊ हमर निता बुराई के बात होही। 15 हम केबल ई सर्त हे तुम्हर बात स्बीकार कर सकथन कि तुमो हमर जसना खतना बाले बनिहा, तुम्हर हर मनसे के खतना करे जाय। 16 तब हम अपन टोरिया तुमके देब अउ तुम्हर टोरिया हम लेब, हम तुम्हर संग रहिबे अउ हम सब एकै जात बन जइबे। 17 पय अगर तुम हमर बात नेहको सुनिहा, अउ खतना नेहको कराइहा ता हम अपन टोरिया के लइके इहां लग कढ जइबे।" 18 उनखर बात लग हमोर अउ ओखर टोरवा सकेम खुस हुइ जथै। 19 सकेम उनखर मांग के पूर करै हे देरी नेहको करिस, काखे ऊ याकूब के टोरिया के बोहत चाहथै, ऊ अपन बाफ के सगलू परवार हे सब लग जादा ईज्जतदार मनसे रथै। 20 हमोर अउ ओखर टोरवा सकेम सहर हे परवेस दूरा हे आइन, उन सहर के निबासी लग कथै, 21 "इस्राएल के हइ मनसे संगी बनै चाहथै, हम उनके अपन परदेस हे रहै दे चाहथन अउ अपन संग सान्ति बनाय रखै चाहथन, हमर लिघ्घो हम सब के निता बोहत जमीन हबै, हम इनखर टोरिया के संग काज करै के आजाद हवन अउ हम अपन टोरिया उनखर संग काज के निता दे हे खुस हवन। 22 हइ एकै बात हे हमर संग रहै के लिता अकजुट होय हवन, कि हम सगलू डउकन के खतना करे जाय, जसना उनखर करे जथै, कि हम सगलू अकजुट हुइ जइ। 23 तब इनखर पसु, इनखर धन अउ इनखर सगलू पसु हमारै हुइ जइहिन, बस हम उनखर इहां अकजुट हुइ जइ, कि ऊ हमर संग निबास करै लगे।" 24 सहर के परवेस दूरा हे आय सगलू मनसे हमोर अउ ओखर टोरवा सकेम के बात मान लइन, हर मनसे जउन सहर के दूरा हे आय रथै, अपन खतना करवइहिन। 25 तीन रोज बात खतना कर दय गइन अउ मनसे पीरा हे रथै, याकूब के दुइठे टोरवा जउन दीना कर भाइ रथै, सिमोन अउ लेवी जानत रथै कि ई टेम मनसे कमजोर हुइहिन, इहैनिता ऊ सहर छो गइन अउ उन सगलू डउकन के मार डालिन। 26 दीना के भाई सिमोन अउ लेवी हमोर अउ ओखर टोरवा के मार डालिन, उन दीना के सकेम के घर लग निकार लइन अउ उन चले आइन। 27 याकूब के दूसर टोरवा सहर हे गइन अउ उन उहां जउन कुछु रथै, लूट लइन, सकेम उनखर बेहन के संग गलत काम करे रथै, ओखर लग तब तक गुस्सा रथै। 28 इहैनिता भाई उनखर सगलू पसु छेडी लइ लइन, उन उनखर गदहा अउ सहर अउ खेतवा हे जउन कुछु रथै सब कुछ लइ लइन। 29 उनखर धन डेरा, उनखर गाय गोरू बाल बच्चा, उनखर डउकी अउ जउन कुछु उनखर घरन हे रथै सगलू के लूटके अपन हक हे कर लइन। 30 पय याकूब सिमोन अउ लेवी लग कथै, "तुम मोके बोहत दुख दय हबा, अउ ई परदेस के निबासी के मन हे घ्रना पइदा कराय दय हबा, सगलू कनानी अउ परिज्जी मनसे हमर बिरोध हुइ जइहिन, इहां हम छुटुहस मनसे हवन, अगर ई परदेस के मनसे हमर बिरोध लडै के निता अकजुट हुइहिन, ता मै नास हुइ जइहों अउ हमर संग हमर सगलू मनसे नास हुइ जइहिन।" 31 पय भाई जबाब देथै, "का हम उनही अपन बेहन के संग बेस्या जसना बेउहार करन दइ?"