1 राहेल देखथै कि ऊ याकूब के निता कउनो लरका पइदा नेहको कर सकथै, राहेल अपन बेहन लिया लग इसाय लग जथै, इहैनिता राहेल याकूब लग कथै, "मोके लरका दे, नही ता मै मर जइहों।" 2 याकूब राहेल के उप्पर गुस्सा होथै, अउ कथै, "मै भगवान नेहको यहों, ऊ भगवान हबै जउन तोके लरका के पइदा करे लग रोके हबै।" 3 तब राहेल कथै, "तै मोर हरवाहिन बिल्हा के लइ सकथस, ओखर संग सो अउ ऊ मोर निता लरका के पइदा करी, तब मै ओखर दवारा दाय बनिहों।" 4 हइ मेर लग अपन डउका याकूब के निता बिल्हा के दइस, याकूब बिल्हा के संग सोइस। 5 बिल्हा लादा हे हुइस अउ याकूब के निता अक्ठी टोरवा के पइदा करिस। 6 राहेल कथै, "भगवान मोर बिनती के सुन लय हबै, ऊ मोके अक्ठी टोरवा के रूप हे दय हबै," इहैनिता राहेल ओखर नाम दान धरिस। 7 राहेल कर हरवाहिन बिल्हा दूसर बेर लादा हे हुइस अउ याकूब के निता दूसर टोरवा के पइदा करिस। 8 राहेल कथै, "अपन बेहन लग लडै हव मै बोहत झगडा करे हव तब जाके मोके जीत मिले हबै," इहैनिता ऊ हइ टोरवा कर नाम नप्ताली धरिस। 9 लिया सोचिस कि ऊ अउ बोहत लरका के पइदा नेहको कर सकथै, इहैनिता ऊ अपन हरवाहिन जिल्पा के याकूब के निता दइस। 10 अउ लिया के हरवाहिन जिल्पा के याकूब लग अक्ठी टोरवा के पइदा करिस। 11 लिया कथै, "मै भाग्यवती हव," अब डउकी मोके भाग्यवती कइहिन, इहैनिता ऊ टोरवा कर नाम गाद धरिस। 12 लिया के हरवाहिन जिल्पा के याकूब लग दूसर टोरवा के पइदा करिस। 13 लिया कथै, "मै बोहत खुस हव, इहैनिता ऊ टोरवा कर नाम आसेर धरिस।"

14 गोंहू कटाई के रोज हे रूबेन बाहिर गइस, उके मइदान हे कुछ खास दूदा* फडुहा मिलिस, रूबेन दूदा फडुहा के अपन दाय के लिघ्घो आनिस, राहेल लिया लग कथै, किरपा करके तोर टोरवा के लिघ्घो जउन फूल हबै ओही चुटु हस महुं के दइ दे। 15 लिया कथै, "तै तो मोर डउका के पहिलेन लग लइ लय हबस, अब तै मोर टोरवा के फूलो के लय चाहथस," पय राहेल जबाब देथै, "अगर तै अपन टोरवा के फूल के दइहे ता आज तै याकूब के संग सोय सकथस।" 16 ऊ रात याकूब खेत हे सोय रथै, लिया ओही देखिस अउ ओखर लग मिलै कढ गइस, ऊ कथै, आज रात भर मोर संग सुइहे, मै अपन टोरवा के फूल के तोर कीमत के रूप हे दय हव, इहैनिता याकूब उस रात लिया के संग सोय रथै। 17 तब भगवान लिया के बिनती के सुनिस, ऊ लादा हे हुइस अउ ऊ याकूब लग पचमा लरका के पइदा करिस। 18 लिया कथै, भगवान मोके मोर मेहनत के फडुहा दय हबै, काखे मै अपन हरवाहिन के अपन डउका के दय रथो, इहैनिता ऊ ओखर नाम इस्साकार धरिस। 19 लिया फेरै लादा हे हुइस अउ याकूब लग ओखर छटमा लरका के पइदा करिस। 20 लिया कथै, भगवान मोके अक्ठी सुन्दर भेंट दय हबै, अब जरूर याकूब मोके अपनाही, काखे मै उके छयठे लरका दय हव, इहैनिता लिया टोरवा कर नाम जबूलून धरिस। 21 एखर बाद लिया अक्ठी टोरिया के पइदा करिस, ऊ टोरिया के नाम दीना धरिस। 22 तब भगवान राहेल के बिनती सुनिस, अउ भगवान राहेल के कोंख खोलिस। 23 ऊ लादा हे हुइस अउ ऊ अक्ठी टोरवा के पइदा करिस, ऊ कथै, भगवान मोर नाम धराई के दूर कर दय हबै। 24 इहैनिता ऊ हइ कहिके ओखर नाम यूसुफ धरिस, "भगवान मोके अक्ठी टोरवा अउ देही।"

25 यूसुफ के राहेल जब पइदा करिस तब याकूब लाबान लग कथै, "मोके अब अपन घर जाय देया। 26 मोके मोर डउकी, मोर लरका देया, जेखर निता मै तोर सेबा करे हव, मोके जाय देया, काखे जउन सेबा मै तोर करे हव, उके तै खुदय जानथस। 27 लाबान ओखर लग कथै, मोके कुछ कहे दे, काखे मै जान लग हव, कि भगवान तोर बजह लग मोके आसीस दय हबै। 28 तै बता कि तोके मै का दो, जउन कइहे उहै तोके मै देहुं।" 29 याकूब जबाब देथै, "तै जानथस कि मै तोर निता बोहत मेहनत करे हव, तोर पसु बोहत हबै, अउ जब तक मै उनखर देखभाल करे हव, ठीकै हबै। 30 जब मै आय रहों, ता तोर लिघ्घो चुटु हस रहै, अब तोर लिघ्घो बोहत हबै, भगवान तोके बोहत आसीस दय हबै, अब मोर निता टेम आ गय हबै, कि मै अपन काम करो, हइ मोर निता अपन घर बनामै का टेम हबै।" 31 लाबान कथै, "मै तोके काहिन दो?" याकूब जबाब देथै, "तै मोके कुछ झइ दे, अगर तै मोर अक्ठी काम कर, ता मै तोर गेडरा छेडी के चराइहों, अउ ओखर देखभाल करिहों। 32 मोके आज अपन सगलू गेडरा छेडी के बीच हे जाय देया, मै हर चित्ती अउ चितकबरी गेडरा के मोके ले देया, अउ करिया छेडी के चित्ती अउ चितकबरी के ले देया, इहै मोर मजदूरी होही। 33 भभिस्य हे तै सरलता लग देख लइहे कि मै इमानदार हव, ता तै मोर गेडरा अउ छेडी के देखै आ सकथस, अगर कउनो छेडी करिया नेहको होही या गेडरा चितकबरी नेहको होही ता तै जान जाबे कि उके चुराय हव।" 34 लाबान जबाब देथै, "मै तोर बात मानथो, तै जउन कुछु मंगहे हम दइबे।" 35 पय ऊ रोज लाबान दाग बाले छेडी के लुकाय देथै, अउ लाबान सगलू दाग बाले या चितकबरी छेडिन के लुकाय देथै, अउ ऊ सगलू करिया गेडरा के लुकाय देथै, अउ ऊ अपन टोरवा के हइ गेडरा के देखभाल करै का कथै। 36 इहैनिता टोरवा सगलू चितकबरी गेडरा अउ छेडी के लइस अउ ऊ दूसर जिघा कढ गइस, उन तीन रोज तक के यातरा करिस, याकूब रुक गइस, अउ लाबान के बचे हर छेडी अउ गेडरा के चरामै लग जथै, पय उन हे कउन छेडी अउ गेडरा चितकबरी या करिया नेहको रथै। 37 इहैनिता याकूब चिनार, बादाम अउ अर्मोन के रूख के हरियर डेराइया काटिस, ऊ उनखर छाली हइ मेर उतारिस कि डेराइया चरका दिखै लग जथै। 38 ऊ काटे हर डगाइल गेडरा छेडी के लिघ्घो नाला हे, मतलब नदिया हे जिहां उन पानी पिय के निता आथै, ठाढ कर देथै, जब उन पानी के निता आइन, तब उन लादा हे हुइ जथै। 39 छेडी गेडरा डेराइया के लिघ्घो लादा हे होय रथै, इहैनिता उन चित्ताबाले, चितकबरी छउना के पइदा करिन। 40 तब याकूब गेडरा के लरका के अलगे-अलगे करिस, अउ लाबान के गेडरा छेडी के मुंह के चितकबरी अउ सगलू करिया लरका के पल्ला कर दइस, अउ अपन झुंड के उनखर लग अलग रखिस, अउ लाबान के गेडरा छेडी लग मिलै नेहको देथै। 41 जब कबहुन झुंड हे निक्खा छेडी लादा हे होमै के निता मिलथै, तब याकूब उनखर आंखी के सामने डेराइया रख देथै, उन डेरा-इया के करीब हइ छेडी लादा होमै के निता मिलथै। 42 पय जब कमजोर पसु छेडी लादा हे होमै के निता मिलथै ता याकूब उहां डगाइल नेहको धरथै, हइ मेर कमजोर पसु लग पइदा लरका लाबान के रथै, बलवान पसु लग पइदा लरका याकूब के रथै। 43 हइ मेर लग याकूब धनड्ड हुइ गय, ओखर लिघ्घो बडी झुंड, बोहत लग हरवाह, उंटवा, छेडी, गेडरा अउ गदहा रथै।