1 अब्राम अपन डउकी अउ सगलू डेरा के संग मिस्र देस लग कनान देस दख्खिन इलाका लउटिन, लूतो उनखर संग रथै। 2 हइ टेम अब्राम बोहत धनी रथै, ओखर लिघ्घो बोहत जानवर, बोहत चांदी अउ बोहत सोना रथै। 3 अब्राम कनान देस दख्खिन इलाका लग आगू बढके बेतेल सहर के लउट जथै, ऊ बेतेल सहर अउ आई सहर के बीच के परदेस हे पहुंचथै, हइ उहै जिघा रथै जिहां अब्राम अउ ओखर परवार पहिले तम्बू बनाय के रुके रहै। 4 हइ उहै जिघा हबै जिहां अब्राम अक्ठी बेदी बनाय रथै, इहैनिता अब्राम इहां भगवान लग पराथना करथै। 5 हइ टेम लूतो अब्राम के संग चलथै, लूत के लिघ्घो बोहत गोरू छेडी, गेडरा अउ तम्बू रथै। 6 ऊ देस हे एतका बडा चरामै के निता चारा के जिघा नेहको रथै कि अक संग रहि सकै, काखे उनखर लिघ्घो बोहत गोरू अउ डेरा रथै। 7 अब्राम के गोरू के बरेदी अउ लूत के गोरू के बरेदी के बीच झगडा होमै लगिस, ऊ दिनन हे ऊ देस हे कनानी अउ परिज्जी जात के मनसे रथै। 8 अब्राम लूत लग कथै, "हमर अउ तुम्हर बीच कउनो मेर के झगडा नेहको होमै के चाही, हमर अउ तुम्हर मनसेन के बीच झगडा झइ करै, हम सगलू भाई हबन। 9 देख, सगलू देस तोर आगू हबै, तै मोर लग अलगे हुइ जा, अगर तै टेटरा* पल्ला जइहे ता मै दहिना पल्ला जइहों, अगर तै दहिना पल्ला जइहे ता मै टेटरा पल्ला जइहों।" 10 जब लूत अपन नजर लग यरदन नदिया के घाटी के लूत देखथै कि उहां पानी बोहत हबै, हइ ऊ टेम के बात हबै, जब भगवान सदोम अउ अमोरा के नास नेहको करे रथै, ऊ टेम यरदन के नदिया के घाटी सोवर तक भगवान के बगइचा के जसना पूरा रास्ता हे फइले रथै, हइ परदेस मिस्र देस के जसना निक्खा रथै। 11 इहैनिता लूत यरदन नदिया के घाटी हे रहै के सोच लेथै, हइ मेर लग दोनोझन अलगे हुइन अउ लूत पूरुब के पल्ला जाय के सुरु कर देथै। 12 अब्राम कनान देस हे बस गइस, लूत यरदन के घाटी के सहर हे रहै लगिस, लूत सदोम सहर के लिघ्घो अपन तम्बू बनाइस। 13 सदोम सहर के मनसे बोहत पापी रथै उन हरमेसा भगवान के बिरोध पाप करथै।

14 जब लूत अब्राम लग अलगे हुइ गइस, तब भगवान ओखर लग कथै, "अपन चारो पल्ला देख, उत्तर, दख्खिन, पूरुब अउ पस्चिम के पल्ला देख। 15 हइ सगलू जमीन जेही तै देखथस, मै तोके अउ तोर बाद हे आमै बाले लरकन के देथो, हइ जमीन हरमेसा के निता तोर हबै।✝ 16 मै तोर लरकन के भुंइ हे कुदरा* के जसना बढइहों, उनके कउ नेहको गिन पइहिन, अगर कउन भुंइ के कुदरा के गिन लइ, ता ऊ तोर लरकन के गिन लइ। 17 इहैनिता जा, अपन जमीन हे रेंग बाग मै इके अब तोके देथो।" 18 हइ मेर लग अब्राम अपन तम्बू के हटाइस, ऊ मम्रे के बांझ रूख के बीच जउन हेब्रोन सहर हे रथै आय के रहै लागथै, ऊ जिघा अब्राम भगवान कर अक्ठी बेदी बनाइस।