1 तब भगवान याकूब लग कथै, "बेतेल सहर छो जा, उहां बस जा अउ उहां उपास के बेदी बना, भगवान के सुरता कर, ऊ जउन तुम्हर आगू परगट होय रथै, जब तै अपन भाई एसाव लग बचाय के भागत रहस, ऊ भगवान के उपास के निता उहां बेदी बना।" 2 तब याकूब अपन परवार अउ उन सगलू मनसे लग जउन ओखर संग रथै, "तुम्हर बीच हे दूसर जात के देबी देउता हबै, उनके हटाय देया अउ खुद के सुध्द करा, अपन कपडा के बदल डाला। 3 हम ई जिघा के छांडब अउ बेतेल छो जइबे, ऊ जिघा हे अपन भगवान के निता अक्ठी बेदी बनाइबे, हइ इहै भगवान हबै जउन मोर परेसानी के टेम हे मोर मदत करिस अउ जिहां कहुं मै गयों ऊ मोर संग रहिस।" 4 इहैनिता मनसे के लिघ्घो जउन ठगरा देउता रथै, उन सगलू के उन याकूब के दइ देथै उन अपन कानन हे पहिने हर सगलू बाली के याकूब के दइ देथै, याकूब सकेम नाम के सहर के लिघ्घो अक्ठी सिन्दूर कर रूख के तरी हइ सगलू चीजन के गाड दइस। 5 याकूब अउ ओखर टोरवा ऊ जिघा के छांड दइन, ऊ इलाका सहर कर मनसे उनखर पीछा करै चाहथै, अउ उनके मार डालै चाहथै पय उनखर मन हे भगवान असना डर समुवाय दइस कि उन याकूब के पीछा नेहको करिन। 6 इहैनिता याकूब अउ ओखर मनसे लूज सहर छो पहुंचिन, अब लूज सहर के बेतेल सहर कथै, हइ कनान परदेस हे हबै। 7 याकूब उहां अक्ठी बेदी बनाइस, याकूब ऊ जिघा के नाम "एलबेतेल" रखिस, याकूब ई नाम के इहैनिता चुनिस कि जब ऊ अपन भाई के इहां लग भागत रहै, तब पहली बेर भगवान इहां परगट होय रथै। 8 उहै टेम रिबका के दाय के दबोरा के मिरतू हुइ गइस, उके बेतेल के बाहिर बांझ रूख के तरी गाड दइन, ऊ रूख कर नाम अल्लोनबक्कूत रखे गइस। 9 जब याकूब पद्दनराम इलाका लग लउटिस तब भगवान फेरै ओखर आगू परगट हुइस, भगवान याकूब के आसिरवाद दइस। 10 भगवान याकूब लग कथै, "तोर नाम याकूब हबै, पय मै ऊ नाम के बदलिहों, अब तै याकूब नेहको कहाबे, तोर नबा नाम इस्राएल होही।" इहैनिता एखर बाद याकूब के नाम इस्राएल हुइस। 11 फेर भगवान ओखर लग कथै, "मै सक्तिमान भगवान हव, तै फल फूल अउ बढा, अउ तोर लग मनसेन के अक्ठी मंडली पइदा होही, अउ तोर वंस हे राजा पइदा हुइही। 12 मै अब्राहम अउ इसहाक के खास भुंइ दय रथो, अब ऊ भुंइ मै तुमके देथो।" 13 तब भगवान ऊ जिघा लग जिहां ऊ याकूब लग बात करे रथै, तब भगवान ऊ जिघा के छांड दइस। 14 याकूब ऊ जिघा हे, जिहां भगवान ओखर लग बात करे रथै, पथरा के अक्ठी खम्भा ठाढ करिस, ऊ ओखर उप्पर दाखरस उंडेलिस। 15 जिहां भगवान याकूब लग बात करिस, ऊ जिघा के नाम ऊ बेतेल रखिस।

16 एखर बाद याकूब अउ ओखर परवार बेतेल सहर लग गइन, जब ऊ एप्राता सहर लग कुछ दुरिहां रथै तब राहेल के लरका पइदा करै के पीरा उमडै लगिस, उके बोहत पीरा रथै। 17 पय राहेल के बोहत जादा कस्ट होमै लगिस, उके बोहत दरद होथै, राहेल के दाय उके देखिस अउ कथै, "राहेल, झइ डेरा, तै अक्ठी टोरवा के पइदा करिहे।" 18 ऊ टोरवा के पइदा करत टेम मर गइस, मरै के पहिलेन राहेल लरका के नाम बेनोनी* रखिस, पय याकूब ओखर नाम बिन्यामीन* रखिस। 19 राहेल के मिरतू हुइ गय, उके एप्राता मतलब बैतलहम के रास्ता हे गाडे गइस। 20 याकूब ओखर मरघटी हे अक्ठी खम्भा ठाढ करिस, उके राहेल के मरघटी के खम्भा कथै, ऊ आजो उहां ठाढ हबै। 21 तब याकूब* अपन यातरा सुरु करथै, ऊ एदेर खम्भा के ठीक दख्खिन हे डेरा धरिस।

22 उहां इस्राएल चुटुहस टेम ठहरिस, जब ऊ उहां रथै तब रूबेन इस्राएल के दासी रखेल बिल्हा के संग सोइस, इस्राएल हइ बारे हे सुनिस ता बोहत गुस्साइस, अउ याकूब कर बारहठे टोरवा रथै। 23 ओखर डउकी लिया लग मतलब याकूब कर छयठे टोरवा रथै, रूबेन, सिमोन, लेवी, यहूदा, इस्साकार, जबूलून। 24 ओखर डउकी राहेल लग ओखर दुइठे टोरवा रथै, यूसुफ, बिन्यामीन। 25 राहेल के दासी बिल्हा लग ओखर दुइठे टोरवा रथै, दान, नप्ताली। 26 अउ लिया के दासी जिल्पा लग ओखर दुइठे टोरवा रथै, गाद, आसेर, हइ याकूब के टोरवा हबै जउन पद्दनराम इलाका हे पइदा होय रथै।

27 याकूब अपन बाफ के लिघ्घो मम्रे सहर हे, जउन किर्यतर्बा मतलब कि हेब्रोन सहर हबै, उहां अब्राहम अउ इसहाक परदेसी बनके रहे करथै, अपन बाफ इसहाक के लिघ्घो आइस।✝ 28 जब इसहाक के एक सव अस्सी साल के हुइस। 29 तब इसहाक बोहत साल तक जिन्दा रहिस, तब ऊ बोहत डोकराय जथै, तब ऊ मर गइस, ओखर टोरवा एसाव अउ याकूब उके गाडिन जिहां ओखर बाफ के गाडे गय रथै।