1 अक रोज याकूब लाबान के टोरवा के बात करत सुनथै उन कथै, याकूब हमर बाफ के सब कुछ के लूट लय हबै, याकूब धनड्ड हुइ गय हबै, अउ हइ सगलू डेरा ऊ हमर बाफ लग लय हबै। 2 याकूब लाबान के मुंह के देखके समझ जथै कि ऊ ओखर पल्ला पहिले जसना माया नेहको हबै। 3 तब परभु याकूब लग कथै, "अपन सियान के देस छो लउट जा, जिहां तै पइदा होय रहस, मै तोर संग हव।" 4 इहैनिता याकूब राहेल अउ लिया के उहां बुलवा लेथै, जिहां ऊ गेडरा छेडी के झुंड रथै। 5 याकूब उनखर लग कथै, मै तोर बाफ के मुंह के देखके समझ गय हव, कि ऊ मोर पल्ला पहिले जसना माया नेहको करथै, पय भगवान मोर बाफ के संग हबै। 6 दुनो तुम जानथस कि मै अपन पूर मेहनत लग तोर बाफ के सेबा सक्ति करे हव। 7 पय तुम्हर बाफ मोके धोखा दय हबै, तोर बाफ मोर मजदूरी के दस बेर बदल लय हबै, पय हइ पूर टेम हे भगवान मोके लाबान के सगलू धोखा लग बचाय हबै। 8 जब उन कहे रथै, "चितकबरी बाले लरका तोर मजदूरी होही," तब सगलू गेडरा छेडी चितकबरी लरका के पइदा करिन, जब उन कथै, "धारीदार लरका तोर मजदूरी होही," तबो सगलू गेडरा छेडी धारीदार लरका के पइदा करिन। 9 हइ मेर भगवान तोर बाफ के पसु लइके मोके दइ दय हबै। 10 जउन टेम छेडी बोकडा लादा हे होमै के निता मिलथै, मै अक्ठी सपना देके रहों, मै देखथो कि छेडी के उप्पर बोकडा चढथै, जउन लादा हे करै के निता मिलत रहै धारीदार अउ चितकबरी रथै। 11 तब भगवान के स्वरगदूत मोर लग कथै, "याकूब" मै उके जबाब दयों, "काहिन आदेस हबै?" 12 ऊ आदेस दइस, "अपन आंखी उठाय के देख कि छेडी हे चढै बाले सगलू बोकडा धारीदार चित्ते अउ चितकबरी हबै, लाबान तोर संग जउन कुछु करथै, ऊके मै देखो हव। 13 मै ऊ बेतेल का भगवान यहों, जिहां तै अक्ठी खम्भा हे तेल डाले रहस, अउ तै मोर मन्नत माने रथस, अब उठ हइ देस लग बाहिर निकड अउ अपन पइदाइसी जिघा लउट जा।"✝ 14 राहेल अउ लिया याकूब के कथै, "का हमर बाफ के लिघ्घो मरै के बाद हमके देय के निता कुछु हबै कि नेहको? 15 ऊ हमर संग पराय जसना बेउहार करे हबै, ऊ हमके अउ तुमके बेच दइस अउ हइ मेर हमर सगलू डेरा ऊ खरच कर दइस। 16 भगवान हइ सगलू डेरा के हमर बाफ लइ लय हबै अउ अब हइ हमर हबै, इहैनिता तुम उहै करा जउन भगवान करै के निता कहे हबै।" 17 याकूब अपन लरका अउ डउकी के उंटवा हे बइठाइस। 18 तब ऊ कनान देस छो लउटै लगिस जिहां ओखर बाफ इसहाक रथै, सगलू पसु सगलू झुंड, जउन याकूब के रथै, उनखर आगू चलथै, ऊ सगलू चीज संग लइ जात रथै जउन ऊ पद्दनराम हे रहत मिले रथै। 19 हइ टेम लाबान अपन गेडरा के ऊन काटै गय रथै, जब ऊ बाहिर गय तब राहेल ओखर घर हे घुसिस अउ अपन बाफ के देउता के चुराय लइ आनिस। 20 याकूब अरामी लाबान के धोखा दइस, ऊ लाबान के नेहको बताइस कि ऊ उहां लग जथै। 21 पय ऊ अपन सब कुछ लइके भाग गइस, ऊ फरात नदिया पार करके अउ ऊ गिलाद के पहाडी देस परदेस चल पडथै।

22 तीन रोज बाद लाबान के पता चलथै कि याकूब भाग गइस। 23 इहैनिता लाबान अपन मनसे के अकजुट करिस अउ याकूब के पीछा करै के सुरु करिस, सात रोज बाद लाबान याकूब के गिलाद डोंगर के लिघ्घो पाइस। 24 ऊ रात भगवान अरामी लाबान के लिघ्घो सपना हे परगट हुइस, भगवान कथै, "याकूब लग तै जउन कुछ कह ओखर अक्ठी सब्द के निता साचेत रह।" 25 लाबान याकूब के पकर लेथै, ऊ अपन तम्बू डोंगर हे गाडे रथै, ऊ अपन मनसे के संग गिलाद के डोंगर परदेस हे तम्बू डालिस। 26 लाबान याकूब लग कथै, "तै मोके धोखा काखे दय? तै मोर टोरिया के असना काखे लइ जात हबस माना उन लडाई हे पकडे गय टोरिया होय? 27 मोर लग बेगैर पूंछे काखे भगे अगर तै कहे होतस, ता मै तोके दावत दय होतो? ओहमा बाजा के संग नाचना अउ गाना होथै। 28 तै मोके अपन नाती के चुमै नेहको दय अउ न टोरिया के बिदा कहै दय, तै हइ करके बोहत बड मूरख के काम करे हवस। 29 तोके सहीमा चोंट पहुंचामै के सक्ति मोर हे हबै, पय पिछली रात तुम्हर बाफ के भगवान मोर सपना हे आइस, ऊ मोके चेतन्त दइस कि याकूब लग न तो भला कइहा अउ न बुरा। 30 मै जानथो कि तै अपन घर छो लउटै चाहथस, इहै कारन हबै कि तै उहां लग कढ जा, पय तै मोर घर लग देउता के काखे चोरे हबस?" 31 याकूब लाबान के जबाब देथै, "मै डर गय रथो, मै सोचत रहों कि कहुं तै अपन टोरिया के मोर लग छंडाय लइहे। 32 पय मै तुम्हर देउता के नेहको चोरे यहों, अगर तै इहां मोर लिघ्घो कउनो मनसे के, जउन तोर देउता के चोराय हबै, पाबा ता उके मार देया, तुम्हर मनसे मोर गवाह हुइहिन, तै अपन कउनो चीज के इहां ढूंढ सकथा, जउन कुछु तुम्हर होय, लइ लेया।" याकूब के हइ नेहको पता रथै, कि राहेल लाबान के देउता चोरे हबै। 33 इहैनिता लाबान याकूब के तम्बू हे गइस अउ ओहमा ढूंढै लगिस, ऊ याकूब के तम्बू हे ढूंढिस अउ तब लिया के तम्बू हे ढूंढिस, तब ऊ उस तम्बू हे ढूंढिस जेहमा दोनोझन हरवाहिन रुके रथै, पय ऊ ओखर घर के देउता के नेहको पाइन, तब लाबान राहेल के तम्बू हे गइस। 34 राहेल उंटवा के कांधा हे देउता के लुकाय देथै, अउ ऊ ओखरै उप्पर बइठ जथै, तब लाबान पूर तम्बू हे ढूंढिस पय ऊ देउता के नेहको पाइस। 35 राहेल अपन बाफ लग कथै, "हे मोर परभु गुस्सा झइ हो, मै तोर आगू ठाढ नेहको हुइ सकथै, काखे मोर मासिक धरम चलत हबै," हइ मेर लाबान ढूंढिस, पय उके देउता नेहको मिलिस। 36 तब याकूब बोहत गुस्सा हुइ के लाबान लग झगडा करै लग जथै, अउ कथै, "मै काहिन पाप करे हव? मै कोन सा नियम टोरे हव? कि मोर पाछू करैका अउ मोके रोकै के तोर हक नेहको हबै? 37 मोर जउन कुछु हबै ओहमा तै ढूंढ लय, तै असना कउनो चीज नेहको पाय हबा जउन तुम्हर हबै, अगर तै कउनो चीज पाय हबा ता मोके दिखाबा, उके इहां धर जेहमा हमर संगी देख सकै, हमर संगी के तय करै देया कि हम दोनो हे कोन निक्खा हबै। 38 मै तुम्हर निता बीस साल तक काम करे हव, ई पूर टेम हे लरका पइदा करत टेम हे कउनो गेडरा छेडी तुम्हर समूह मसे नेहको खाय हबै। 39 जउन पसु के डोंगर के जानवर मार डालत रहै, उके मै तोर लिघ्घो नेहको लाय करथो अउ मै खुद ऊ घाटा के पूरा करत रथो, पसु के चोरी चाहे रात के होय, या दिन के, तै मोर लग लइ ले करत रहस। 40 मोर असना हालत खराब रहै, दिन के घाम अउ रात के ठंड लग मै मारे जथो, मोर नींद मोर आंखी लग भाग जाय करथै। 41 मै बीस साल तक तोर घर हे रहों, मै तोर दुइठे टोरिया के निता चउदा साल तक, अउ तोर गेडरा छेडी कर निता छय साल तक तोर सेबा करो, तै दस बेर मोर मजदूरी के बदले। 42 मोर बाफ के भगवान, अब्राहम के भगवान अउ इसहाक के भय मोर संग रथै, अगर भगवान मोर संग नेहको होथै ता तै मोके खाली हाथ पठोय देथै, पय भगवान मोर समस्या के देखिस, भगवान मोर करे हर काम के देखिस अउ पिछले रात भगवान साबित कर दइस कि मै निक्खा हव।"

43 लाबान याकूब लग कथै, "हइ टोरिया मोर बिटिया हबै, उनखर लरका मोर हबै, हइ गेडरा मोर हबै, जउन कुछु तै इहां देखथा, मोर हबै, पय मै अपन टोरिया अउ उनखर लरका के रखै के निता कुछु नेहको कर सकथो। 44 इहैनिता मै तोर लग अक्ठी टीमा करै चाहथो, हमन पथरा के अक्ठी ढेर बनाउबे जउन हइ बताही कि हम टीमा करे चुके हवन।" 45 तब याकूब अक्ठी पथरा लइके उके खम्भा के रूप हे डाढ करिस। 46 तब याकूब अपन परवार लग कथै, पथरा के टुकडा अकजुट करा। उन पथरा के अकजुट करके अक्ठी ढेर बनाइस, अउ उहां ओखर उप्पर बइठ के भोजन करिस। 47 लाबान ऊ जिघा के नाम धरिस यज्रसहादुथा*, पय याकूब ऊ जिघा के नाम गिलियाद धरिस। 48 लाबान याकूब लग कथै, "हइ पथरा के ढेर हम दोनोझन के हमर टीमा के सुरता दिलामै हे मदत मिलही।" हइ कारन हबै कि याकूब ऊ जिघा के गिलियाद धरिस। 49 तब लाबान कथै, "भगवान, हम के अक दूसर लग अगले होमै के देखभाल करत रहै, इहैनिता ऊ जिघा के नाम मिजपा होही। 50 तब लाबान कथै, अगर तै मोर टोरिया के चोंट पहुंचइहे ता सुरता रखबे, भगवान तोके सजा देही, अगर तै दूसर डउकी लग काज करिहे ता सुरता रखबे, भगवान तोके देखथै।" 51 फेर लाबान याकूब लग कथै, "इहां हइ पथरा हबै, जउन हमर बीच हे रखे हबै अउ हइ खासकर पथरा हबै जउन बताही कि हम टीमा करे हबै। 52 हइ ढेर गवाह हबै, हइ पथरा सबूत हबै कि अपन टीमा के सुरता करामै हे मदत करही, तोर लग लडै के निता हइ पथरा के पार नेहको जहुं, अउ तै मोर लग लडै के निता हइ पथरा लग आगू मोर पल्ला कबहुन नेहको आबे। 53 अब्राहम के भगवान, नाहोर के भगवान अउ उनखर बाफ दादान के भगवान हमके न्याय करही।" याकूब के बाफ इसहाक भगवान के "भय" नाम लग पुकारिस, इहैनिता याकूब टीमा के निता ऊ नाम के निस्तार करिस। 54 तब याकूब अक्ठी पसु के मारिस अउ डोंगर हे बलि के रूप हे बलि चढाइस अउ अपन मनसे के भोजन हे सामिल होमै के निता बुलाइस, भोजन करै के बाद उन डोंगर हे रात बिताइस। 55 दूसर रोज सुबेन्ने लाबान अपन नाती के चुमिस अउ टोरिया के बिदा करिस, ऊ उनके आसिरवाद दइस अउ अपन घर छो लउट गय।