1 भगवान नूह अउ सगलू वन पसु अउ रखै बाले पसु नूह के संग जिहाज हे रथै, भगवान सब के सुरक्छा करथै, अउ भगवान भुंइ हे हवा चलाथै, अउ पानी घटे लगथै, 2 अउ भुंइ के पानी अउ समुन्दर लग जउन उप्पर उठके बादर लग आथै, सगलू बरसै का पानी बन्द हुइ जथै। 3 अउ एक सव पचास रोज के बाद भुंइ लग पानी धीरे-धीरे करके घटे लागथै। 4 अउ जिहाज सात महिना के सतरा रोज अरारत नाम के डोंगर हे जाय के टिक जथै। 5 अउ दसमा महिना तक पानी धीरे-धीरे घटत रहिस, दसमा महिना के पहिले रोज डोंगरन के फुलइ दिखथै। 6 नूह चालीस रोज के बाद जिहाज के खिडकी खोलथै, जेही ऊ खुद बनाय रथै, 7 अउ नूह अक्ठी कउवा के उडवाथै, जब तक भुंइ सुखाय नेहको गइस तब तक कउवा इछो-उछो उडत रथै। 8 एखर बाद नूह हइ देखै के निता अक्ठी परेबा के उडाथै, कि भुंइ लग पानी घटिस कि नेहको घटिस। 9 पय परेबा के अपन गोड धरै के निता भुंइ हे जिघा नेहको मिलथै, काखे सगलू भुंइ हे पानी भररेहर रथै, अउ परेबा नूह के लिघ्घो जिहाज हे लउट आथै, नूह अपन हाथ बढाय के परेबा के पकड लेथै, अउ जिहाज के भित्तर अपन संग लइ जथै। 10 तब अउ सात रोज तक रुके रथै, एखर बाद नूह फेरै अक्ठी परेबा के उडाथै, 11 अउ संझा के टेम परेबा ओखर लिघ्घो लउट आथै, ओखर चोंच हे ताजा टोरे हर जैतून कर पत्ता रथै, एखर बाद नूह के पता हुइ जथै कि भुंइ लग पानी घट गय हबै। 12 पय नूह सात रोज तक अउ रुके रथै, एखर बाद नूह परेबा के उडाथै, पय परेबा ओखर लिघ्घो लउटके नेहको आथै। 13 जब नूह छय सव एक साल के होथै, ओखर पहिले महिना के पहिले रोज भुंइ के पानी सुखाय जथै, नूह जिहाज के छत के खोल के देखथै कि भुंइ सुखाय गय हबै। 14 दूसर महिना के सत्ताइस रोज हे भुंइ पूरी तरह सुखाय जथै। 15 तब भगवान नूह लग कथै, 16 "तै अपन डउकी, टोरवन अउ पुतउवन के संग जिहाज लग बाहिर निकर। 17 अउ तोर संग जउन जिन्दा परानी हबै, मतलब कि पसु चिरइया भुंइ हे रेंगै बाले जीव हबै, उनके सब के बाहिर निकार के ले आ जेखर लग भुंइ हे बहोत लरका पइदा करै, अउ उन फलै फुलै अउ भुंइ हे फइल जाय।" 18 तब नूह अपन डउकी, टोरवा अउ पुतउ के संग जिहाज लग बाहिर आथै।✝ 19 सगलू पसु, रेंगै बाले जीव, चिरइया अउ भुंइ हे सगलू चलै फिरै बाले जानवर अपन-अपन जात के संग जिहाज लग बाहिर निकर आइन।

20 नूह परभु के निता अक्ठी बेदी बनाथै, नूह सुध्द पसु अउ सुध्द पक्छी मसे कुछ के चुनथै अउ बेदी हे उनखर बलि चढाथै। 21 जब परभु के बलि के खुसबू मिलथै तब भगवान अपन हिरदय हे सोचथै, "मनसेन के कारन मै भुंइ के अब सराप नेहको देहुं, मनसे बचपन लग जउन कुछ उनखर मन हे पइदा होथै ऊ बुराई पइदा होथै, जसना मै सगलू जीवन के अब मारे हव। ओसना उनके फेरै नेहको मरहुं।✝ 22 जब तक दुनिया हबै, तब तक बोबाई कटाई के टेम आही, अउ हरमेसा सरदी, ठन्ड, घाम, बरसात, दिन, रात, कारतिक लगेतार होवत रही।"